ଆଜିଠୁ ସଂସଦର ବଜେଟ ଅଧିବେଶନ, ବିଜେଡି ଉଠାଇବ ଓଡ଼ିଶାକୁ ସ୍ବତନ୍ତ୍ର ପାହ୍ୟା ଓ ଏମଏସପି ଭଳି ପ୍ରସଙ୍ଗ

ନୂଆଦିଲ୍ଲୀ, (ବାଘୁଆବାର୍ତ୍ତା): ଆଜିଠୁ ସଂସଦର ବଜେଟ ଅଧିବେଶନ । ଓଡ଼ିଶାକୁ ସ୍ବତନ୍ତ୍ର ପାହ୍ୟା ପ୍ରଦାନ, ମୁଦ୍ରାସ୍ଫୀତି ଓ ଦରବୃଦ୍ଧି, ଉତ୍କଟ ବେକାରୀ, ଚାଷୀଙ୍କୁ ଏମଏସପି ଦୁଇଗୁଣ କରିବା, ପୋଲାଭରମ ଓ ମହାନଦୀ ବିବାଦ, କୋଇଲା ରୟାଲଟି, ଗ୍ରୀନ ଟାକ୍ସ, ଜାତୀୟ ରାଜପଥ, ସମ୍ବଲପୁର, କୋରାପୁଟ ଓ ବାଲେଶ୍ବରରେ ପୂର୍ଣ୍ଣକାଳୀନ ଏମସ ହସ୍ପିଟାଲ ପ୍ରତିଷ୍ଠା ଆଦି ପ୍ରସଙ୍ଗ ସଂସଦରେ ଉଠାଇବ ବିଜେଡି। ଏହା ସହ ହୋ, ମୁଣ୍ଡାରି, ଭୂମିଜ ଓ କୁଇ ଭାଷାକୁ ଅଷ୍ଟମ ପରିଚ୍ଛେଦରେ ସ୍ଥାନୀତ କରିବା, କେନ୍ଦୁପତ୍ର ଉପରୁ ଜିଏସଟି ପ୍ରତ୍ୟାହାର, ରେଳବାଇ ଆଦି ପ୍ରସଙ୍ଗରେ ବିଜେଡି ଜୋରଦାର ସ୍ବର ଉତ୍ତୋଳନ କରିବ। ଗତକାଲି ଗୃହକୁ ଶାନ୍ତିଶୃଙ୍ଖଳାରେ ପରିଚାଳନା କରିବା ଲାଗି ବସିଥିବା ସର୍ବଦଳୀୟ ବୈଠକରେ ହୋଇଥିଲା ଆଲୋଚନା। ବୈଠକରେ ବିଭିନ୍ନ ଦଳର ପ୍ରତିନିଧିମାନେ ଉପସ୍ଥିତ ଥିଲେ। ଏଥିରେ କେନ୍ଦ୍ର ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ଅଧ୍ୟକ୍ଷତା କରିଥିବାବେଳେ ସାମିଲ ହୋଇଥିଲେ କେନ୍ଦ୍ରମନ୍ତ୍ରୀ କିରଣ ରିଜିଜୁ, ଜେ.ପି. ନଡ୍ଡା, ଅର୍ଜୁନରାମ ମେଘୱାଲ ଓ ଏଲ ମୁରୁଗାନଙ୍କ ସମେତ ଅନ୍ୟାନ୍ୟ ନେତା। ଏହା ସହ କଂଗ୍ରେସର ଜୟରାମ ରମେଶ, କେ. ସୁରେଶ, ଗୌରବ ଗୋଗଇ, ଟିଏମସି ଏମପି ସୁଦୀପ ବନ୍ଦୋପାଧ୍ଯାୟ, ଡେରେକ ଓବ୍ରିୟେନ, ବିଜେଡିର ସସ୍ମିତ ପାତ୍ରଙ୍କ ସମେତ ଅନ୍ୟାନ୍ୟ ଦଳର ନେତା ସାମିଲ ହୋଇଥିଲେ।