ଭୁବନେଶ୍ବର, (ବାଘୁଆବାର୍ତ୍ତା): ଡିସେମ୍ବର ୧୫ରେ ବିଜେଡି ରାଜ୍ୟ କାର୍ଯ୍ୟକାରିଣୀ । ୨୦୨୪ ନିର୍ବାଚନ ପାଇଁ ଚୂଡ଼ାନ୍ତ ହେବ ରଣନୀତି । ପ୍ରତିଷ୍ଠା ଦିବସ ଏବଂ ସଙ୍ଗଠନ ସମ୍ପର୍କରେ ନିଆଯିବ ଗୁରୁତ୍ବପୂର୍ଣ୍ଣ ନିଷ୍ପତ୍ତି । ପ୍ରଥମ ଥର ପାଇଁ ଶଙ୍ଖ ଭବନରେ ରାଜ୍ୟ କାର୍ଯ୍ୟକାରିଣୀ ବୈଠକ ବସିବ । ଏଥିରେ ଯୋଗଦେବେ ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କାର୍ଯ୍ୟକାରିଣୀରେ ୩ଟି ପ୍ରସ୍ତାବ ଉପରେ ବାଜିବ ମୋହର । ସମାଜିକ, ରାଜନୈତିକ ଏବଂ ସାଙ୍ଗଠନିକ ପ୍ରସ୍ତାବ ପାରିତ ହେବାର କାର୍ଯ୍ୟକ୍ରମ ରହିଛି । ଏହା ସହିତ ନବୀନ ପଟ୍ଟନାୟକଙ୍କୁ ଷଷ୍ଠ ଥର ଲାଗି ମୁଖ୍ୟମନ୍ତ୍ରୀ ପଦରେ ବସାଇବା ପାଇଁ ବଜେଡିର ସମସ୍ତ ନେତା ଓ କର୍ମୀ ସକଳ୍ପ ନେବେ । ଏହି କାର୍ଯ୍ୟକାରଣୀ ବୈଠକରେ ସମସ୍ତ ସାଂସଦ, ବିଧାୟକ ଏବଂ ପରିବର୍ଦ୍ଧିତ କାର୍ଯ୍ୟକାରିଣୀ ସଦସ୍ୟ, ଛାମୁଆ ସଂଗଠନ ସଭାପତି ଓ ନିମନ୍ତ୍ରିତ ଅତିଥି ଯୋଗ ଦେବେ । ଡିସେମ୍ବର ୨୬ ତାରିଖରେ ବିଜେଡିର ୨୭ତମ ପ୍ରତିଷ୍ଠା ଦିବସ । ଦଳର ପ୍ରତିଷ୍ଠା ଦିବସକୁ ରାଜ୍ୟବ୍ୟାପୀ ପାଳନ କରିବାକୁ ଯୋଜନା ହୋଇଛି । ପ୍ରତି ନିର୍ବାଚନ ମଣ୍ଡଳୀ, ବ୍ଲକ ଏବଂ ପୌରାଞ୍ଚଳରେ ବିଭିନ୍ନ କାର୍ଯ୍ୟକ୍ରମର ଆୟୋଜନ କରାଯିବ । ୨୬ ବର୍ଷ ଧରି ବିଜେଡି ଓଡିଶା ଲୋକଙ୍କ ସେବା କରିଆସିଥିବାରୁ ଏହି ଅବସରରେ ରକ୍ତ ଦାନ ଶିବିର ଆୟୋଜନ କରି ୨୬ ହଜାର ୟୁନିଟ ରକ୍ତ ସଂଗ୍ରହ କରିବାକୁ ଲକ୍ଷ୍ୟ ରଖିଛି ବିଜୁ ଯୁବ ଏବଂ ଛାତ୍ର ଜନତା ଦଳ । ସେଥିପାଇଁ ସବୁ ନିର୍ବାଚନୀ ମଣ୍ଡଳୀରେ ବୃକ୍ଷ ରୋପଣ,ସାଇକେଲ ରାଲି ଏବଂ ଗଣଦୌଡ କାର୍ଯ୍ୟକ୍ରମ କରାଯିବ । ଏଥିରେ ଅଧିକରୁ ଅଧିକ ଯୁବକ ଓ ଛାତ୍ରଙ୍କୁ ଯୋଡିବା ପାଇଁ ପ୍ରୟାସ କରିବ ଦଳ । କଟକ ଆନନ୍ଦଭବନରୁ ଶଙ୍ଖ ଭବନ ଯାଏଁ ସାଇକେଲ ରାଲି କରିବ ବିଜୁ ଯୁବ ଓ ଛାତ୍ର ଜନତା ଦଳ । ଆଗକୁ ନିର୍ବାଚନ ଥିବାରୁ ବିଜେଡି ସରକାରର ବିକାଶ ମୂଳକ କାର୍ଯ୍ୟକ୍ରମକୁ ଲୋକଙ୍କ ପାଖରେ ପହଞ୍ଚାଇବା ସହିତ ଯୁବ , ଛାତ୍ର ଏବଂ ମହିଳାଙ୍କୁ ଦଳ ସହିତ ଯୋଡିବାକୁ ପ୍ରୟାସ କରୁଛି ବିଜେଡି । ପ୍ରତିଷ୍ଠା ଦିବସରୁ ସଙ୍ଗଠନକୁ ସୁଦୃଢ଼ କରିବା ପାଇଁ କର୍ମୀମାନଙ୍କୁ ତାଲିମ ଦେବା ସହ ମୁଁ ହେବି ନବୀନ ଓଡିଶା ସାରଥୀ କାର୍ଯ୍ୟକ୍ରମର ଅୟୋଜନ କରିବ ବିଜେଡି ।
ଡିସେମ୍ବର ୨୬ରେ ବିଜେଡିର ୨୭ତମ ପ୍ରତିଷ୍ଠା ଦିବସ
