ବିରିଡିହିକୁ ରାଜସ୍ୱ ଗ୍ରାମ ମାନ୍ୟତା ଦାବିରେ ଜିଲ୍ଲାପାଳଙ୍କୁ ଭେଟିଲେ ଗ୍ରାମବାସୀ

ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଖଣ୍ଡପଡ଼ା ନିର୍ବାଚନ ମଣ୍ଡଳୀ ଅନ୍ତର୍ଗତ ରାଣିପଡ଼ା ପଂଚାୟତ ବିରିଡିହିକୁ ରାଜସ୍ୱ ଗ୍ରାମ ମାନ୍ୟତା ଦାବିରେ ଆଜି ଶତାଧିକ ଗ୍ରାମବାସୀ ଜିଲ୍ଲାପାଳଙ୍କ ନିକଟକୁ ଆସି ଦାବି ଜଣାଇଛନ୍ତି । ସୂଚନାନୁସାରେ, ବିରିଡିହି ଗ୍ରାମ ରାଣିପଡ଼ା ରାଜସ୍ୱ ଗ୍ରାମରେ ରହିଥିବା ବେଳେ ସରକାରୀ ଓ ବେସରକାରୀ ସ୍ତରରେ ଏହା ପୃଥକ ଗ୍ରାମ ବୋଲି ଗ୍ରାମବାସୀ ଅଭିଯୋଗ କରିଛନ୍ତି । ରାଣିପଡ଼ା ଗ୍ରାମଠାରୁ ବିରିଡିହି ଗ୍ରାମର ଦୂରତା ୧ କିଲୋମିଟରରୁ ଅଧିକ ହୋଇଥିବା ବେଳେ ରାଣିପଡ଼ା ଶିଖରପୁର ପୋଷ୍ଟ ଅନ୍ତର୍ଗତ ହୋଇଥିବା ବେଳେ ବିରିଡିହି ଶାଳଝରିଆ ପୋଷ୍ଟ ଅନ୍ତର୍ଗତ ଅଟେ । ଯାହାକୁ ନେଇ ଗ୍ରାମବାସୀ ବିରିଡିହିକୁ ରାଜସ୍ୱ ଗ୍ରାମ୍ୟ ମାନ୍ୟତା ଦାବି କରୁଥିବା ବେଳେ ଖଣ୍ଡପଡ଼ା ତହସିଲ ଅନ୍ତର୍ଗତ ଶିଖରପୁର ଆର.ଆଇ ଗ୍ରାମକୁ ରାଜସ୍ୱ ଗ୍ରାମ ନକରିବା ପାଇଁ ରିର୍ପୋଟ ପ୍ରଦାନ କରିଥିବା ଗ୍ରାମବାସୀ କହିଛନ୍ତି । ଏହାକୁ ନେଇ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଥିବା ବେଳେ ୭ ଦିନ ମଧ୍ୟରେ ବିରିଡିହିକୁ ରାଜସ୍ୱ ଗ୍ରାମ ମାନ୍ୟତା ଦେବାକୁ ଆଜି ଜିଲ୍ଲାପାଳଙ୍କ ନିକଟରେ ଦାବି ହୋଇଛି । ଗ୍ରାମବାସୀମାନେ ଜିଲ୍ଲାପାଳଙ୍କ ସମେତ ବିଧାୟକଙ୍କଠାରୁ ଆରମ୍ଭ କରି ରାଜସ୍ୱ ଆୟୁକ୍ତ ଏବଂ ରାଜସ୍ୱମନ୍ତ୍ରୀଙ୍କ ନିକଟକୁ ଦାବି ପତ୍ର ପଠାଇଛନ୍ତି ।