ଦୁର୍ଘଟଣାରେ ଜଣେ ମୃତ ଓ ୫ ଆହତ

ନୟାଗଡ଼,(ବାଘୁଆବାର୍ତ୍ତା): ଖୋର୍ଦ୍ଧା ବଲାଙ୍ଗୀର ଜାତୀୟ ରାଜପଥର ଇଟାମାଟି ଥାନା ବାଉଁଶିଆପଡା ନିକଟରେ ଗତକାଲି ରାତିରେ ଏକ ଦୁର୍ଘଟଣା ଘଟିଛି । ଦୁଇ ବାଇକ ଦୁର୍ଘଟଣା ପରେ ବସ ତଳେ ପଡି ଜଣଙ୍କ ମୃତ୍ୟୁ ହୋଇଛି। ଆହତଙ୍କ ମଧ୍ୟରେ ୩ ଶିଶୁ , ଜଣେ ମହିଳା ରହିଛନ୍ତି । ଜଣେ ଶିଶୁଙ୍କ ଅବସ୍ଥା ଗୁରୁତର ରହିଛି । ବାଇକ୍ ଧକ୍କା ପରେ ବସ୍ ତଳେ ପଡିଯିବାରୁ ଯୁବକଙ୍କ ମୃତ୍ୟୁ । ମୃତକ ହେଲେ ମାଣିକାଗୋଡ଼ା ଗାଁର ଜ୍ୟୋତିରଞ୍ଜନ ସ୍ବାଇଁ । କଳାଙ୍ଗ ଗ୍ରାମର ଜ୍ଞାନରଞ୍ଜନ ସାହୁ ନିଜର ତିନି ଛୁଆ ଏବଂ ସ୍ତ୍ରୀଙ୍କୁ ବାଇକରେ ଧରି ବାଉଁଶିଆପଡା ଗାଁରୁ ଯାତ୍ରା ଦେଖି ଫେରୁଥିବା ବେଳେ ବିପରିତ ଦିଗରୁ ଆସୁଥିବା ଜ୍ୟୋତିରଞ୍ଜନଙ୍କ ବାଇକ୍ ସହିତ ମୁହାଁମୁହିଁ ଧକ୍କା ହୋଇଥିଲା । ଜ୍ୟୋତିରଞ୍ଜନ ତଳେ ପଡିଯିବା ବେଳେ ପଛରୁ ଆସୁଥିବା ବସ୍ ତାଙ୍କ ଉପରେ ଚଢି ଯାଇଥିଲା । ଫଳରେ ଘଟଣାସ୍ଥଳରେ ଜ୍ୟୋତିରଞ୍ଜନଙ୍କ ମୃତ୍ୟୁ ହୋଇଥିଲା । ଦୁର୍ଘଟଣା ପରେ ଘଟଣାସ୍ଥଳରେ ଉତ୍ତେଜନା ଦେଖାଦେଇଥିଲା । ନୟାଗଡ ଏସଡିପିଓ ଜ୍ୟୋତିରଞ୍ଜନ ସାମନ୍ତରାୟ ଏବଂ ଇଟାମାଟି ପୁଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ।