ନୟାଗଡ଼,(ବାଘୁଆବାର୍ତ୍ତା): କରୋନା ମହାମାରୀ ପାଇଁ ଦେଶରେ ଲକ୍ଡାଉନ୍ ଚାଲିଥିବା ବେଳେ ଲକ୍ଷ ଲକ୍ଷ ବିଡ଼ି ଶ୍ରମିକ କାମ ଧନ୍ଦା ନକରି ଘରୁ ବାହାରି ପାରୁ ନାହାନ୍ତି । ଫଳରେ ଏହି ଶ୍ରମିକମାନେ ଆର୍ଥୀକ ଅନଟନ ମଧ୍ୟରେ ଗତି କରୁଛନ୍ତି । ଯାହାକୁ ନେଇ ସେମାନେ ଏବେ ପରିବାର ଚଳାଇବା କଷ୍ଟକର ହୋଇପଡ଼ିଛି । ନିର୍ମାଣ ଶ୍ରମିକମାନଙ୍କୁ ରାଜ୍ୟ ସରକାର କରୋନା ସହାୟତା ରାଶି ୧୫ ଶହ ଟଙ୍କା ଯୋଗାଇଥିବା ଯୋଗୁଁ ବିଜୁ ଶ୍ରମିକ ସାମ୍ମୁଖ୍ୟ ରାଜ୍ୟ ସରକାରଙ୍କୁ କୃତଜ୍ଞତା ଜଣାଇଛି । କେନ୍ଦ୍ର ସରକାର କେନ୍ଦୀୟ ଶ୍ରମ ଆଇନ ଦ୍ୱାରା ପଂଜିକୃତ ବିଡ଼ି ଶ୍ରମିକମାନଙ୍କୁ ଜନକଲ୍ୟାଣ ପାଣ୍ଠିରୁ ମୃତ୍ୟୁ କାଳୀନ, ଶିକ୍ଷା, ଗୃହ ଓ ଝିଅ ବିବାହ ପାଇଁ ସହାୟତା ଯୋଗାଇ ଦେଉଛନ୍ତି । କେନ୍ଦ୍ର ସରକାର ଶ୍ରମ ଆଇନର ପରିବର୍ତ୍ତନ କରି ବିଡ଼ି ଶ୍ରମିକମାନେ ପାଉଥିବା ସହାୟତା ରାଶିକୁ ୨୦୧୬ ମସିହାଠାରୁ ବନ୍ଦ କରି ଦେଇଛନ୍ତି । ଫଳରେ ଲକ୍ଷଲକ୍ଷ ବିଡ଼ି ଶ୍ରମିକମାନଙ୍କୁ ପୂର୍ବପରି ସହାୟତା ରାଶି ଯୋଗାଇ ଦେବା ସହ କରୋନା ସହାୟତା ରାଶି ଘୋଷଣା କରି ଅର୍ଥ ପହଂଚାଇବାର ବ୍ୟବସ୍ଥା କରାଇବା ପାଇଁ ବିଜୁ ଶ୍ରମିକ ସାମ୍ମୁଖ୍ୟ ରାଜ୍ୟ ସହ ସଂପାଦକ ଶ୍ରୀକାନ୍ତ ପଟ୍ଟନାୟକ ଦାବି କରିଛନ୍ତି ।
