ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଟାଉନଥାନା ଅନ୍ତର୍ଗତ ଭାଟସାହି ଗ୍ରାମରେ ଗତକାଲି ଘଟିଥିବା ବିଭତ୍ସ ହତ୍ୟା ଘଟଣାରେ ପୁଲିସ ହତ୍ୟାକଣ୍ଡରେ ସଂପୃକ୍ତ ଥିବା ଅଭିଯୋଗରେ ଅଟକଥିବା ବାପା ପୁଅଙ୍କୁ ଘଟଣା ସଂମ୍ପର୍କରେ ପଚରାଉଚରା ଚଳାଇଥିବା ଜଣାଯାଇଛି । ସୂଚନାନୁସାରେ, ଭାଟସାହି ଗ୍ରାମର ଅର୍ଜ୍ଜୁନ ପ୍ରଧାନଙ୍କର ଶବ ଗତକାଲି ରକ୍ତାକ୍ତ ଅବସ୍ଥାରେ ଚାଷ ଜମିରୁ ଉଦ୍ଧାର କରାଯାଇଥିଲା । ତାଙ୍କ ମୁଣ୍ଡକୁ ହାଣି ହତ୍ୟା କରାଯାଇଥିବା ନେଇ ଅର୍ଜ୍ଜୁନଙ୍କ ପୁଅ ହାଡ଼ୁବନ୍ଧୁ ପ୍ରଧାନ ଥାନାରେ ଅଭିଯୋଗ କରିଛନ୍ତି । ଗତକାଲି ଶବ ମିଳିବା ବେଳକୁ ସଂନ୍ଧ୍ୟା ହୋଇ ସାରିଥିବାରୁ ଆଜି ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଛି । ଅର୍ଜ୍ଜୁନଙ୍କ ବଡ଼ପୁଅ ଅଭିଯୋଗ ମୁତାବକ ଉକ୍ତ ଗ୍ରାମର ରାଜନ ଦାଶଙ୍କ ପୁଅ କାବୁଲି ଦାଶ, ବାବୁଲି ଦାଶ ଏବଂ ଚରଣ ବେହେରାଙ୍କ ପୁଅ ବିଜୟ ବେହେରାଙ୍କ ସହ ତାଙ୍କ ବାପାଙ୍କର ପୂର୍ବ ଶୁତ୍ରତା ରହିଥିଲା । ଏହି ବ୍ୟକ୍ତିମାନଙ୍କ ସହ ଜମିବାଡ଼ି ବିବାଦକୁ ନେଇ ପୂର୍ବରୁ ତାଙ୍କର ଗଣ୍ଡଗୋଳ ହୋଇଥିବା ବେଳେ ଏନେଇ ଟାଉନଥାନାରେ ପୂର୍ବରୁ ମାମଲା ମଧ୍ୟ ରହିଥିଲା । ସୁଯୋଗ ପାଇଁ ଏହି ବ୍ୟକ୍ତିମାନେ ତାଙ୍କ ବାପାଙ୍କୁ ହତ୍ୟା କରିଥିବା ନେଇ ହାଡ଼ୁବନ୍ଧୁ ଥାନାରେ ଅଭିଯୋଗ କରିଥିବା ବେଳେ ଗତକାଲି ରାତିରେ ପୁଲିସ ଦୁଇ ଜଣଙ୍କ ଧରି ଥାନାକୁ ଆଣି ପଚାରାଉଚରା ଚଳାଇଥିବା ଜଣାଯାଇଛି । ଏହି ଦୁଇ ଜଣ ରାଜନ ଦାଶ ଏବଂ ତାଙ୍କ ପୁଅ କାବୁଲି ଦାଶ ବୋଲି ଜଣାଯାଇଛି । ଏପରିକି ଏହି ହତ୍ୟାକାଣ୍ଡରେ ଅନ୍ୟ କିଛି ବ୍ୟକ୍ତିଙ୍କ ହାତ ରହିଥିବା ବେଳେ ତାହାର ତଦନ୍ତ ପୁଲିସ ଚଳାଇଥିବା ଜଣାଯାଇଛି । ଏହି ଘଟଣାରେ ଖୋଦ୍ ନୟାଗଡ଼ ଟାଉନଥାନା ଅଧିକାରୀ ଜୟଦୀପ ମହାନ୍ତି ତଦନ୍ତକାରୀ ଅଧିକାରୀ ରହିଥିବା ଜଣାଯାଇଛି ।
