‘କରୁଣା-ସାଗର’ ପୁସ୍ତକର ଉନ୍ମୋଚନ
ଭୂବନେଶ୍ୱର, (ବାଘୁଆବାର୍ତ୍ତା ବ୍ୟୁରୋ) : ଭାରତ ଏକ ଭାବର ପ୍ରତୀକ । ତାତ୍ତ୍ୱିକ ଅର୍ଥରେ ଏହାକୁ ଭୌଗୋଳିକ ସୀମାରେଖା ମଧ୍ୟରେ ରଖିହେବ ନାହିଁ । ସମଗ୍ର ବ୍ରହ୍ମାଣ୍ଡର ରୂପରେଖ ହେଉଛି ଭାରତ, ଯାହାର ପରିଚୟ ଆଧ୍ୟାତ୍ମିକ ଚେତନା ଉପରେ ପର୍ଯ୍ୟବସିତ ଏବଂ ଏହି ଚେତନାର ସର୍ବଶ୍ରେଷ୍ଠ ଗ୍ରନ୍ଥ ହେଉଛି ଶ୍ରୀମଦ୍ ଭଗବତ ଗୀତା ଯାହା କାଳାତୀତ ଓ ସାର୍ବଜନୀନ ବୋଲି ରାଜ୍ୟପାଳ ପ୍ରଫେସର ଗଣେଶୀ ଲାଲ ପ୍ରକାଶ କରିଛନ୍ତି । ଆଜି ଭୁବନେଶ୍ୱରରେ ଇସ୍କନ ଗୁଣ୍ଡିଚା ମନ୍ଦିରରେ ପରମ ପୂଜ୍ୟ ଭକ୍ତି ଚାରୁ ସ୍ୱାମୀ ମହାରାଜାଙ୍କ ‘କରୁଣା-ସାଗର’ ପୁସ୍ତକକୁ ଉନ୍ମୋଚନ କରି ରାଜ୍ୟପାଳ ପ୍ରଫେସର ଲାଲ କହିଲେ ଯେ ଗୀତାର ଭାବାର୍ଥ ପ୍ରତ୍ୟେକ ବ୍ୟକ୍ତି ପାଇଁ ପ୍ରଯୁଜ୍ୟ । ପ୍ରତ୍ୟେକ ମୁହୂର୍ତ ହେଉଛି ଗୁରୁତ୍ୱପୂର୍ଣ୍ଣ । ଏକ ମୁହୂର୍ତ ମଧ୍ୟ ଜୀବନକୁ ନୂଆ ଗତି ପଥ ଦେଇପାରେ । ଏଣୁ ପ୍ରତିଟି ମୁହୂର୍ତକୁ ସର୍ବୋତ୍ତମ ଚେତନା ସହ ସଂଯୁକ୍ତ କରିବାକୁ ରାଜ୍ୟପାଳ ପରାମର୍ଶ ଦେଇଛନ୍ତି । ଭଗବାନ ଶ୍ରୀକୃଷ୍ଣଙ୍କ ମୁଖନିସୃତ ‘ଗୀତା’ ରେ ସକଳ ସମସ୍ୟାର ସମାଧାନର ସୂତ୍ର ରହିଛି । ଏହାର ନିୟମିତ ଅଧ୍ୟୟନ ଓ ବ୍ୟାଖାନର ଆବଶ୍ୟକତା ରହିଛି । ସଂପ୍ରତି ମଣିଷ ପରଚିତି ସଂକଟ 
ମଧ୍ୟରେ ଗତି କରୁଛି । ଏହି ପରିଚିତି ଯେ ଏକ ବୃହତ୍ତମ ପରିଚିତିର ଅଂଶବିଶେଷ, ଏପରି ଧାରଣା ମାଧ୍ୟମରେ ହୀନମନ୍ୟତା ଲୋପ ପାଇବ ଓ ମଣିଷର ଉତ୍ତରଣ ସଂଭବ ହୋଇପାରିବ ବୋଲି ରାଜ୍ୟପାଳ ପ୍ରଫେସର ଲାଲ କହିଛନ୍ତି । ‘କରୁଣା-ସାଗର’ ପୁସ୍ତକର ଲେଖକ ପରମ ପୂଜ୍ୟ ଭକ୍ତି ଚାରୁ ସ୍ୱାମୀ ମହାରାଜ ଏହି ପୁସ୍ତକ ରଚନାର ପ୍ରେରଣା ସେ ପରମ ପୂଜ୍ୟ ଭକ୍ତି ବେଦାନ୍ତ ସ୍ୱାମୀ ପ୍ରଭୁ ।ଦଙ୍କ ଠାରୁ ପାଇଥିବା ସୂଚନା ଦେଇ ନିଜର ଆଧ୍ୟାତ୍ମିକ ଅନ୍ୱେଷଣ ସଂପର୍କରେ ବକ୍ତବ୍ୟ ରଖିଥିଲେ । ଗୀତା ଜୟନ୍ତୀ ଉପଲକ୍ଷେ ଆୟୋଜିତ ବିଭିନ୍ନ ପ୍ରତିଯୋଗିତାର କୃତୀ ପ୍ରତିଯୋଗୀମାନଙ୍କୁ ରାଜ୍ୟପାଳ ପୁରସ୍କୃତ କରିଥିଲେ । ଇସ୍କନ ଭୁବନେଶ୍ୱରର ଅଧ୍ୟକ୍ଷ ପ୍ରେମାନନ୍ଦ ଦାସ, ପରମପୂଜ୍ୟ ସୁଭାଗ ସ୍ୱାମୀ ମହାରାଜ ପ୍ରମୁଖ ଇସ୍କନର ବିଭିନ୍ନ କାର୍ଯ୍ୟଧାର ବିଷୟରେ ଆଲୋଚନା କରିଥିଲେ ।
