ନବରଙ୍ଗପୁର (ବାଘୁଆବାର୍ତ୍ତା): ବିଗିଡିଗଲେ ମହିଳା, ଭାଙ୍ଗିଲେ ଲକ୍ଷାଧିକ ଟଙ୍କାର ବିଦେଶୀ ମଦ ଭରା ବତଲ । ନବରଙ୍ଗପୁର ଜିଲ୍ଲାରେ କୋରନାର ଭୟବହତା ଭିତରେ ବିଦେଶୀ ମଦ ଦୋକାନକୁ ବିରୋଧ କରାଯାଇଛି । ଗାଁ ଭିତରେ ବିଦେଶୀ ମଦ ଦୋକାନ ଖୋଲାକୁ ନେଇ ଗ୍ରାମର ଶତାଧିକ ମହିଳା ଓ ପୁରୁଷ ତାତିଛନ୍ତି । ପେଟି ପେଟି ମଦ ଦୋକାନ ଭିତରୁ ଆଣି ବିଚ ରାସ୍ତାରେ ଭାଙ୍ଗି ଦେଇଛନ୍ତି ଗ୍ରମବାସୀ । ନବରଙ୍ଗପୁର ଜିଲ୍ଲା କୋଷାଗୁମୁଡା ବ୍ଳକ ଅନ୍ତର୍ଗତ ସନ୍ତୋଷପୁର ଠାରେ ଥିବା ବିଦେଶୀ ମଦ ଦୋକାନକୁ ବନ୍ଦ କରିବାକୁ ନେଇ ସନ୍ତୋଷପୁର ଗ୍ରାମବାସୀ ଅନେକ ଥର ପ୍ରଶାସନ ନିକଟରେ ଦାବି କରି ଆସୁଥିଲେ । ଜିଲ୍ଲା ପ୍ରଶାସନ ୧୫ ଦିନ ମଧ୍ୟରେ ନିଷ୍ପତ୍ତି ନେବ ବୋଲି ପ୍ରତିଶୃତି ଦେଇଥିଲା । କିନ୍ତୁ ପ୍ରଶାସନର ପ୍ରତିଶ୍ରୁତିର ଅବଧି ସରି ଦୀର୍ଘ ଦିନ ବିତି ଯାଇଥିଲେ ମଧ୍ୟ ବିଦେଶୀ ମଦ ଦୋକାନ ବନ୍ଦ ନକରିବାରୁ ଆଜି ଗ୍ରାମର ଶତାଧିକ ପୁରୁଷ-ମହିଳା ବିଦେଶୀ ମଦ ଦୋକାଳ ଭିତରେ ପଶି ମଦ ସବୁ ବାହାର କରି ଭଙ୍ଗାରୁଜା କରିଛନ୍ତି । ସନ୍ତୋଷପୁର ଗ୍ରାମ ଠାରେ ବହୁ ବର୍ଷ ହେଲା ଗୋଟିଏ ବିଦେଶୀ ମଦ ଦୋକାନ ଖୋଲାଯାଇଛି । ଉକ୍ତ ଦୋକାନଟି ମଙ୍ଗଳ ବିଭାଗ ଆଶ୍ରମ ସ୍କୁଲର ଅତି ନିକଟରେ ରହିଛି । ଏହାସହ ଗ୍ରାମର ମଧ୍ୟ ଭାଗରେ ଉକ୍ତ ଦୋକାନ ଖୋଲାଯାଇଛି । ଏହା ଦ୍ୱାରା ଉକ୍ତ ବିଦେଶୀ ଦୋକାନରେ ମଦୁଆଙ୍କ ଭିଡ ଜମୁଥିବା ବେଳେ ସ୍କୁଲ ଯାଉଥିବା ଛାତ୍ରୀମାନଙ୍କୁ ଅନେକ ସମୟରେ ମଦୁଆଙ୍କ ଅଶ୍ଳୀଳ ବ୍ୟବହାରର ସାମ୍ନା କରିବାକୁ ପଡୁଛି । ଗାଁ ଭିତରେ ମଦ ଦୋକାନ ଥିବା ହେତୁ ଏକ ଅସ୍ୱାସ୍ଥ୍ୟକର ପରିବେଶ ସୃଷ୍ଟି ହେଉଛି । ଗାଁରେ ଦିନକୁ ଦିନ ମଦୁଆଙ୍କ ପ୍ରାଦୃଭାବ ବଢ଼ୁଥିବା ବେଳେ ଭବିଷ୍ୟତରେ ଗ୍ରାମର ଅନେକ ଯୁବକ ମଧ୍ୟ ମଦ କବଳରେ ସହଜରେ କବଳିତ ହେବାର ଆଶଙ୍କା ରହିଛି । ଯାହାକୁ ବିରୋଧ କରି ଗ୍ରାମବାସୀ ବହୁତ ଦିନ ହେବ ଉକ୍ତ ବିଦେଶୀ ମଦ ଦୋକାନକୁ ସେଠାରୁ ଉଚ୍ଛେଦ କରିଦେବା ସହ ଗ୍ରାମରୁ ସମ୍ପୂର୍ଣ୍ଣ ବନ୍ଦ କରିବାକୁ ଜିଲ୍ଲା ପ୍ରଶାସନ ନିକଟରେ ଦାବି କରିଥିଲେ । ଏନେଇ ମଧ୍ୟ ଗତ କିଛିଦିନ ତଳେ ଗ୍ରାମର ଶତାଧିକ ଗ୍ରାମବାସୀ ଉକ୍ତ ବିଦେଶୀ ଦୋକାନର କର୍ମଚାରୀଙ୍କୁ ଅଟକ ରଖି ଦୋକାନ ବନ୍ଦ ଦାବିରେ ଆନ୍ଦୋଳନ କରିଥିଲେ । ଖବର ପାଇ କୋଷାଗୁମୁଡା ପୁଲିସ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବାରୁ ଅଟକ ଥିବା କର୍ମଚାରୀଙ୍କୁ ଛାଡି ଦେଇଥିଲେ । କିନ୍ତୁ କୌଣସି ସୁଫଳ ନମିଳିବାରୁ ଆଜି ପୁଣି ଗ୍ରାମର ଶତାଧିକ ମହିଳାଙ୍କ ନେତୃତ୍ୱରେ ଗ୍ରାମର ପୁରୁଷ ମାନେ ଏକତ୍ରିତ ହୋଇ ବିଦେଶୀ ମଦ ଦୋକାନ ଭିତରୁ ମଦ ସବୁକୁ ଭଙ୍ଗାରୁଜା କରିଥିବା ଦେଖିବାକୁ ମିଳିଛି ।
