ନୟାଗଡ଼, (ବାଘୁଆବାର୍ତ୍ତା): ସମ୍ବଲପୁର ଜିଲ୍ଲା କୁଚିଣ୍ଡା ଏନଏସି ମାର୍କେଟ୍ କମ୍ପ୍ଲେକ୍ସର ସଂଶୋଧିତ ଦୋକାନ ଘର ଚୁକ୍ତିନାମା ବିରୋଧରେ ବ୍ୟବସାୟୀ ସଂଘ ପକ୍ଷରୁ ୬ ଘଣ୍ଟିଆ ବନ୍ଦ ପାଳନ କରାଯାଉଛି। ବ୍ୟବସାୟୀ ମାନେ ଦୋକାନ ଗୃହ ଭଡାରେ ନେବା ସହ ଭଡା ଦେଉ ନ ଥିଲେ । ଏପରିକି ଭଡା ନେଇଥିବା ଦୋକାନ ଘର ଅନ୍ୟକୁ ଦେବା ଏବଂ ଦୋକାନ ଘରକୁ ବର୍ଦ୍ଧିତ କରାଯାଇଥିବା କାରଣରୁ ଏନଏସି କର୍ତୃପକ୍ଷ ଫାଇନ ଲଗାଇବାକୁ ନିଷ୍ପତ୍ତି ନେଇଥିଲେ । ଯାହାର ପ୍ରତିବାଦ କରି ଦୋକାନୀମାନେ ମଙ୍ଗଳବାର କୁଚିଣ୍ଡା ସହରର ସମସ୍ତ ଦୋକାନ ବଜାର ବନ୍ଦ କରିଛନ୍ତି । ସେମାନେ ସକାଳ ୬ଟାରୁ ଦିନ ୧ଟା ପର୍ୟ୍ୟନ୍ତ ବନ୍ଦ କରି ପ୍ରତିବାଦ ଜଣାଉଛନ୍ତି। ଅନ୍ୟ ପକ୍ଷରେ ଉପଖଣ୍ଡ ପ୍ରଶାସନକୁ ଲିଖିତ ଦାବିପତ୍ର ଦେବାର କାର୍ୟ୍ୟକ୍ରମ ରହିଛି ବୋଲି ଜଣାପଡିଛି। ତେବେ କେବଳ ଦୋକାନ ବଜାର ବନ୍ଦ ରହିଥିବା ବେଳେ ସାଧାରଣ ଜୀବନ ଯାତ୍ରା ସ୍ବାଭାବିକ ରହିଛି। ବସ ଚଳାଚଳ ମଧ୍ୟ ସ୍ବାଭାବିକ ରହିଥିବା ଦେଖିବାକୁ ମିଳିଛି ।
