ବାଣିଗୋଛା ଅଞ୍ଚଳରେ ପୁଣି ଏକ ହତ୍ୟାକାଣ୍ଡ: ସ୍ତ୍ରୀକୁ ଟାଙ୍ଗିଆରେ ହାଣି ହତ୍ୟା କଲା ସ୍ୱାମୀ

ନୟାଗଡ଼, (ବାଘୁଆବାର୍ତ୍ତା): ବର୍ତ୍ତମାନର ବଡ଼ ଖବର । ବାଣିଗୋଚ୍ଛା ଥାନା ଅଞ୍ଚଳରେ ପୁଣି ଏକ ହତ୍ୟାକାଣ୍ଡ ଘଟିଛି । ଜଙ୍ଗଲକୁ ଡାକିନେଇ ସ୍ତ୍ରୀକୁ ଟାଙ୍ଗିଆରେ ହାଣି ହତ୍ୟା କରିଛି ସ୍ୱାମୀ । ଖବର ପାଇ ଘଟଣାସ୍ଥଳରେ ପହଞ୍ଚି ମୃତ ମହିଳାଙ୍କ ଶବ ଜବତ କରିଥିବା ବେଳେ ସାଇଣ୍ଟିଫିକ୍ ଟିମ୍ ଅପେକ୍ଷାରେ ରହିଛି ବାଣିଗୋଛା ପୁଲିସ୍ । ସୂଚନାନୁସାରେ, ନୟାଗଡ଼ ଜିଲ୍ଲା ବାଣିଗୋଛା ଥାନା ଅଧିନରେ ଥିବା ବାମ ଚଢେୟାପଲ୍ଲୀ ଗାଁର ରାଧାକାନ୍ତ ନାଏକ ତାଙ୍କ ସ୍ତ୍ରୀ ସତ୍ୟଭାମା ନାଏକ(୪୦)ଙ୍କୁ ନିକଟସ୍ଥ ଜଙ୍ଗଲରୁ କାଠ ଆଣିବାକୁ ଡାକି ନେଇଥିଲେ । ତେବେ ଜଙ୍ଗଲରେ କୌଣସି ଘଟଣାକୁ ନେଇ ସ୍ୱାମୀ ରାଧାକାନ୍ତ ସ୍ତ୍ରୀ ସତ୍ୟଭାମାକୁ ଗାଙ୍ଗିଆରେ ହାଣି ହତ୍ୟା କରି ଫେରାର ହୋଇଯାଇଛି । ଖବର ପାଇ ବାଣିଗୋଛା ପୁଲିସ୍ ଓ ଦଶପଲ୍ଲା ପୁଲିସ୍ ମିଳିତ ଭାବେ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହ ପ୍ରାଥମିକ ତଦନ୍ତ ଆରମ୍ଭ କରିଛି । ଏନେଇ ବାଣିଗୋଛା ଥାନାରେ ୩୧/୨୦୨୧ରେ ଏକ ହତ୍ୟା ମାମଲା ରୁଜୁ କରାଯାଇଛି । ତେବେ ହତ୍ୟାକାଣ୍ଡର କାରଣ ବର୍ତ୍ତମାନ ସୁଦ୍ଧା ଜଣାପଡିନଥିବା ବେଳେ ପୁଲିସ୍ ସାଇଣ୍ଟିଫିକ୍ ଟିମକୁ ଅପେକ୍ଷା କରିଥିବା ନେଇ ବାଣିଗୋଛା ଥାନା ଅଧିକାରୀ ବୈଦ୍ୟଭୂଷଣ ଭୋଇ ସୂଚନା ଦେଇଛନ୍ତି ।