ନୟାଗଡ଼,(ବାଘୁଆବାର୍ତ୍ତା): ଡିଆର୍ଡିଏ ସୃଜନ ସଭା ଗୃହରେ ବନଖଣ୍ଡ ଅଧିକାରୀ ଧନରାଜ୍ ଏଚ୍.ଡିଙ୍କ ଅଧ୍ୟକ୍ଷତାରେ ବିଶ୍ୱ ବନ ଦିବସ ପାଳିତ ହୋଇଯାଇଛି । ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଜିଲ୍ଲାପାଳ ଡ. ପୋମା ଟୁଡୁ ଯୋଗ ଦେଇଥିଲେ । ନିଆଁ ଜଙ୍ଗଲର ବଡ଼ ଶତ୍ରୁ ହୋଇଥିବା ବେଳେ ଚଳିତମାସରେ ନିଆଁ ଲିଭାଇବା ପାଇଁ ଯଥାସାଧ୍ୟ ଚେଷ୍ଟା କରିଥିବା ବନକର୍ମଚାରୀଙ୍କୁ ଜିଲ୍ଲାପାଳ ଧନ୍ୟବାଦ ଦେଇଥିଲେ । ଏହି ଅବସରରେ ଜଙ୍ଗଲର ଉପକାରିତା ଏବଂ ଏହା ଦ୍ୱାରା ମାନବ ସଭ୍ୟତାର ଲାଭ ବିଷୟରେ ବନଖଣ୍ଡ ଅଧିକାରୀ ବକ୍ତବ୍ୟ ଦେଇଥିଲେ । ଏହି ଅବସରରେ ନୟାଗଡ଼ ବ୍ଲକ ଲକ୍ଷ୍ମୀପ୍ରସାଦର ଶ୍ରୀଧର ପ୍ରଧାନ, ନୂଆଗାଁ ବ୍ଲକ ବାହାଡ଼ଝୋଲାର ସୂର୍ଯ୍ୟ ନାରାୟଣ ସାହୁ, ଓଡ଼ଗାଁ ବ୍ଲକ ଆଙ୍ଗିସିଙ୍ଗର ସୁବାଷ ଚନ୍ଦ୍ର ନାୟକ, ଭାପୁର ବ୍ଲକ ମାଣିବନ୍ଧର ରଘୁନାଥ ମହାପାତ୍ର, ଦଶପଲ୍ଲା ବ୍ଲକ ବାମ ଗ୍ରାମର ବିଭିଷଣ ନାୟକ, ରଣପୁର ବ୍ଲକ କୁଳାସରର ବିଜୟ କୁମାର ମହାପାତ୍ରଙ୍କୁ ଚଳିତ ବର୍ଷର ପ୍ରକୃତି ବନ୍ଧୁ ସମ୍ମାନରେ ସମ୍ମାନିତ କରାଯାଇଛି । ସେହିଭଳି ଭାବେ ଓଡ଼ଗାଁ ବ୍ଲକର ଶଙ୍କର ଚାରିଟେବୁଲ ଟ୍ରଷ୍ଟ, ଭାପୁର ବ୍ଲକ ସମ୍ବାଦ ସାହିତ୍ୟ ଘର, ଦଶପଲ୍ଲାର ସାମୁହିକ ବିକାଶ ସମିତି, ରଣପୁର ବ୍ଲକ ଘାଟ ନିର୍ମାଣ ସେବା ସଂଘକୁ ପ୍ରକୃତି ମିତ୍ର ସମ୍ମାନରେ ସମ୍ମାନିତ କରାଯାଇଛି । ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ବନଖଣ୍ଡ ଅଧିକାରୀ ଅରବିନ୍ଦ ମହାନ୍ତି, ଶ୍ୱେତାଲୀନା ସାହୁ, ଅତିରିକ୍ତ ଆରକ୍ଷୀ ଅଧିକ୍ଷକ ମାଧୁରୀ ସାମଲଙ୍କ ସମେତ ଅନେକ ବନକର୍ମଚାରୀ, ବୁଦ୍ଧିଜୀବୀ ଏବଂ ଛାତ୍ରଛାତ୍ରୀ ଯୋଗ ଦେଇଥିଲେ । ପୂର୍ବାହ୍ନରେ ବନବିଭାଗ ପକ୍ଷରୁ ଏକ ସଚେତନତା ଶୋଭାଯାତ୍ରା ସହର ପରିକ୍ରମା କରିଥିଲା ।
