୧୩ ବର୍ଷର କନ୍ୟାକୁ ୧୪ ବର୍ଷର ବର, ହେଉଥିଲା ବାହାଘର, ଏହାପରେ କ’ଣ ହେଲା

ଯାଜପୁର (ବାଘୁଆବାର୍ତ୍ତା): ଆଜିର ସମାଜରେ ଶିକ୍ଷିତ, ଉଚ୍ଚଶିକ୍ଷିତ ଲୋକ ବସବାସ କରୁଥିଲେ ମଧ୍ୟ ବାଲ୍ୟ ବିବାହ ପରି କୁପ୍ରଥା ଉପରେ ରୋକ ଲାଗୁନି । ଏବେବି ଯାଜପୁର ଜିଲ୍ଲା ସୁକିନ୍ଦା ବ୍ଲକ ନଗଡା ଅଞ୍ଚଳରେ ଚାଲିଛି ବାଲ୍ୟବିବାହ । ତେବେ ମଙ୍ଗଳବାର ଦିନ ସଂପୃକ୍ତ ଅଞ୍ଚଳରେ ବାଲ୍ୟ ବିବାହ ହେଉଥିବା ଖବର ପାଇ ପୋଲିସ ସହାୟତାରେ ବାହାଘରକୁ ବନ୍ଦ କରିଛି ଯାଜପୁର ଚାଇଲ୍ଡ ଲାଇନ । ତଳନଗଡା ଅଞ୍ଚଳର ୧୪ ବର୍ଷର ନାବାଳକ ସହ କେନ୍ଦୁଝର ଅଞ୍ଚଳର ୧୩ ବର୍ଷର ନାବାଳିକା ଝିଅର ବାହାଘର କରିବାକୁ ପ୍ରସ୍ତୁତି ଚାଲିଥିଲା । ବାହାଘରକୁ ବନ୍ଦ କରିଛି ଯାଜପୁର ଚାଇଲ୍ଡ ଲାଇନ । ତେବେ ଉଭୟ ପୁଅ ଝିଅଙ୍କୁ ଯାଜପୁର ଶିଶୁ ମଙ୍ଗଳ ସମିତିରେ ହାଜର କରାଯିବା ସହ ପୁଅକୁ ଯାଜପୁର ବାଳାଶ୍ରମ ଓ ଝିଅକୁ ସଖୀ କେନ୍ଦ୍ରରେ ରଖାଯାଇଛି । ସେମାନଙ୍କ ସମସ୍ତ ଯାଞ୍ଚ ପରେ ଆଇନ ଅନୁଯାୟୀ କାର୍ୟ୍ୟାନୁଷ୍ଠାନ ଗ୍ରହଣ କରାଯାଇ ପରିବାରକୁ ହସ୍ତାନ୍ତର କରାଯିବ ବୋଲି ଚାଇଲ୍ଡ ଲାଇନର କୋ-ଅର୍ଡିନେଟର କହିଛନ୍ତି ।