ବାଲେଶ୍ୱର, (ବାଘୁଆବାର୍ତ୍ତା): ବାଲେଶ୍ୱର ଜିଲ୍ଲା ଚାନ୍ଦିପୁର ବେଳାଭୂମି ଅଞ୍ଚଳର ଏକ ହୋଟେଲ୍ରେ ଜଣେ ନାବାଳିକାଙ୍କୁ ଗଣବଳାତ୍କାର ହୋଇଛି । ଏହି ଅଭିଯୋଗରେ ପୁଲିସ୍ ହୋଟେଲ ମ୍ୟାନେଜର୍ ସମେତ ୪ ଜଣଙ୍କୁ ଅଟକ ରଖିଛି । ଅଭିଯୁକ୍ତମାନଙ୍କ ଘର ବାଲେଶ୍ୱର ସଦରଥାନା ହଳଦୀପଦା ଅଞ୍ଚଳରେ । ଅନ୍ୟପଟେ ଲୋକଲଜ୍ଜା ସହି ନ ପାରି ପୀଡ଼ିତା ଜଣକ ବିଷ ପିଇ ଆତ୍ମହତ୍ୟା ଉଦ୍ୟମ କରିଛନ୍ତି । ସୂଚନା ମୁତାବକ, ବାଲେଶ୍ୱର ସଦରଥାନା ଅଞ୍ଚଳର ଜଣେ ନାବାଳିକା (୧୫) ୩ ଜଣ ଯୁବକଙ୍କ ସହ ଗୁରୁବାର ଚାନ୍ଦିପୁର ବେଳାଭୂମି ବୁଲିବାକୁ ଯାଇଥିଲେ । ସେମାନେ ଚାନ୍ଦିପୁରରେ ଥିବା ଏକ ହୋଟେଲରେ ରୁମ୍ ଭଡ଼ା ନେଇ ରହିଥିଲେ । ସେଠାରେ ସେମାନେ ନାବାଳିକାଙ୍କୁ ଗଣବଳାତ୍କାର କରିଥିଲେ । ନାବାଳିକା ଜଣଙ୍କ ସେଠାରୁ ଆସିବା ପରେ ଘରେ ବିଷ ପିଇ ଆତ୍ମହତ୍ୟା ଉଦ୍ୟମ କରିଥିଲେ । ପରେ ଏହି ଘଟଣା ଲୋକଲୋଚନକୁ ଆସିଥିଲା । ପୀଡ଼ିତାଙ୍କ ପରିବାର ଲୋକେ ଏ ସଂପର୍କରେ ସଦର ଥାନାରେ ଲିଖିତ ଅଭିଯୋଗ କରିଛନ୍ତି । ଅଭିଯୋଗକ୍ରମେ ମାମଲା ରୁଜୁ କରି ସଦର ଥାନା ପୁଲିସ୍ ତଦନ୍ତ ଆରମ୍ଭ କରିଛି । ପୁଲିସ୍ ହଳଦୀପଦା ଅଞ୍ଚଳର ସଞ୍ଜୀବ, ବିକାଶ, ଶୀତାଂଶୁଙ୍କ ସମେତ ସଂପୃକ୍ତ ହୋଟେଲ୍ ମ୍ୟାନେଜର ଉମାକାନ୍ତ ସାହୁଙ୍କୁ ମଧ୍ୟ ଥାନାରେ ଅଟକ ରଖିଛି । ଅପରପକ୍ଷରେ ଗୁରୁତର ଅବସ୍ଥାରେ ପୀଡ଼ିତା ଫକୀର ମୋହନ ମେଡିକାଲ କଲେଜ୍ ଓ ହସ୍ପିଟାଲରେ ଚିକିତ୍ସାଧୀନ ଅଛନ୍ତି । ଏହି ସମ୍ବେଦଶୀଳ ଘଟଣାର ତଦନ୍ତ ଚାଲିଥିବା ଏସ୍ଡିପିଓ ଡ. ଶଶାଙ୍କ ଶେଖର ବେହୁରା କହିଛନ୍ତି । ତଦନ୍ତ ପରେ ଦୋଷୀଙ୍କ ବିରୋଧରେ କାର୍ୟ୍ୟାନୁଷ୍ଠାନ ନିଆଯିବ । ହୋଟେଲ ସିଲ୍ ହେବ କି ନାହିଁ ପରବର୍ତ୍ତୀ ସମୟରେ ନିଷ୍ପତ୍ତି ନିଆଯିବ ବୋଲି ସେ ସୂଚନା ଦେଇଛନ୍ତି ।





