ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲାରେ ଆଜିଠାରୁ ରାତ୍ରୀକାଳୀନ କର୍ଫ୍ୟୁକୁ କଡ଼ାକଡ଼ି କରାଯାଇଛି । ଫଳରେ ଆଜି ଜିଲ୍ଲାପାଳ ଡ. ପୋମା ଟୁଡୁ, ବନଖଣ୍ଡ ଅଧିକାରୀ ଧନରାଜ୍ ଏଚ୍୍ଡି, ଉପଜିଲ୍ଲାପାଳ ଲଗ୍ନଜିତ ରାଉତ, ଅତିରିକ୍ତ ଜିଲ୍ଲାପାଳ ବିଧାନ ଚନ୍ଦ୍ର ରାୟ, ପ୍ରକଳ୍ପ ନିର୍ଦ୍ଦେଶକ ସୁବାସ ଚନ୍ଦ୍ର ରାୟ, ଆରକ୍ଷୀ ଅଧିକ୍ଷକ ପ୍ରତ୍ୟୁଷ ଦିୱାକର ପ୍ରମୂଖ ପୁଲିସ ଦଳ ସହ ନୟାଗଡ଼ ବଜାର ଉପରେ ଚଢ଼ାଉ କରିଥିଲେ । ସହରରେ ସଂନ୍ଧ୍ୟା ୭ଟା ପର୍ଯ୍ୟନ୍ତ ଦୋକାନ ଉପରେ ପ୍ରଥମେ ଚଢ଼ାଉ କରାଯାଇଥିବା ବେଳେ ଦ୍ୱିତୀୟରେ ବିନା ମାସ୍କରେ ବୁଲୁଥିବା ବ୍ୟକ୍ତିଙ୍କୁ କଡ଼ା ତାଗିଦ୍ କରାଯାଇଛି । ଏପରିକି କର୍ଫ୍ୟୁ ସମୟରେ ମନଇଚ୍ଛା ବୁଲୁଥିବା ଅନେକ ବ୍ୟକ୍ତି ଆଜି ହରଣଘଣାରେ ପଡ଼ିଥିବା ଜଣାଯାଇଛି । ଜିଲ୍ଲାପାଳଙ୍କ ନିର୍ଦ୍ଦେଶରେ ଆଜି ସହରରେ ଏଭଳି ଚଢ଼ାଉ ଫଳରେ ସହରରେ ଚାଞ୍ଚଲ୍ୟ ସୃଷ୍ଟି ହୋଇଥିବା ଜଣାଯାଇଛି । ଅନ୍ୟପକ୍ଷରେ ଆଜି ପ୍ରଶାସନିକ ଅଧିକାରୀମାନେ ଇଟାମାଟି ଅଂଚଳରେ ମଧ୍ୟ ଚଢ଼ାଉ କରିଥିବା ଜଣାଯାଇଛି । ଜିଲ୍ଲାରେ କରୋନା କାୟା ବିସ୍ତାର କରୁଥିବା ବେଳେ ରାଜ୍ୟ ସରକାରଙ୍କ ନିୟମ କଡ଼ାକଡ଼ି ପାଳନ କରିବାକୁ ନିୟମ ରହିଛି । ଯାହା ଫଳରେ ଜିଲ୍ଲାରେ ଆଜି ଠାରୁ ବିଭିନ୍ନ ନିୟମରେ ପରିବର୍ତ୍ତନ କରାଯାଇଛି ।
