ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ବିଧାୟକ ତଥା କୃଷି ଓ କୃଷକ ସଶକ୍ତି କରଣ, ମତ୍ସ୍ୟ ଓ ପ୍ରାଣୀ ସଂପଦ ବିକାଶ ଏବଂ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ଦ୍ୱାରା ଆଜି ନୟାଗଡ଼ ବାଇପାସ ରାସ୍ତା ସଂପର୍କରେ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି । ଜିଲ୍ଲାପାଳ ଡା. ପୋମା ଟୁଡୁଙ୍କ ଉପସ୍ଥିତିରେ ଅନୁଷ୍ଠିତ ଏହି ବୈଠକରେ ରାସ୍ତା ନିର୍ମାଣ ପାଇଁ ଜମି ଅଧିଗ୍ରହଣକୁ ଗୁରୁତ୍ୱ ଦିଆଯାଇଛି । ଖୋର୍ଦ୍ଧା ବଲାଙ୍ଗିରୀ ଜାତୀୟ ରାଜପଥର ରାସ୍ତା ବଡ଼ପଣ୍ଡୁସରଠାରୁ ବାହାରି ବିଭିନ୍ନ ଗ୍ରାମ ଦେଇ ମାଙ୍କପଲ୍ଲୀ ନିକଟରେ ପୁଣିଥରେ ୫୭ ନଂ ଜାତୀୟ ରାଜପଥକୁ ଛୁଇଁବ । ଏଥିପାଇଁ ନୟାଗଡ଼ ତହସିଲଦାରଙ୍କୁ ଜମି ଅଧିଗ୍ରହଣ କରିବା ସହିତ ଜମିର କିସମ ପରିବର୍ତନ ନ କରିବା ଏବଂ ମୂଲ୍ୟ ଆକଳନ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଜାତୀୟ ରାଜପଥର ନୋଟିଫିକେସନ୍ ଅନୁଯାୟୀ ଜିଲ୍ଲା ସବରେଜିଷ୍ଟ୍ରାର ଉକ୍ତ ରାସ୍ତା ମଧ୍ୟରେ ପଡ଼ୁଥିବା ବେସରକାରୀ ଜମିଜମାର ସରକାରୀ ଦର ନିର୍ଦ୍ଧାରଣ କରିବା ସହିତ କ୍ରୟ ବିକ୍ରୟ ସ୍ଥଗିତ ରଖିବାକୁ ମଧ୍ୟ ଆଦେଶ ଦିଆଯାଇଛି । ବାଇପାସ ରାସ୍ତା ନିର୍ମାଣ ପାଇଁ ଚିହ୍ନିତ ଜମି ଉଭୟ ପାଶ୍ୱର୍ରେ ଖମ୍ବ ପୋତାଯିବା ପାଇଁ ଆଜିର ବୈଠକରେ ସ୍ଥିର କରାଯାଇଛି । ସେହିପରି ଫଳନ୍ତି ଗଛ ଏବଂ ପରିବା ଚାଷ ହେଉଥିବା ଜମିଜମାର ଚିହ୍ନଟ ଓ ମୂଲ୍ୟାଙ୍କନ କରିବା ପାଇଁଉଦ୍ୟାନ ବିଭାଗ ଉପ ନିର୍ଦ୍ଦେଶଙ୍କୁ ନିର୍ଦ୍ଦେଶ ଦିଆଯାଇଛି । ମୁଖ୍ୟ ଜିଲ୍ଲା କୃଷି ଅଧିକାରୀ ଉକ୍ତ ଅଞ୍ଚଳରେ ହେଉଥିବା ଚାଷଜମିର ଚିହ୍ନଟ ସହିତ ଅମଳ ହେଉଥିବା ଶସ୍ୟର ମୂଲ୍ୟାଙ୍କନ କରିବା ପାଇଁ କୁହାଯାଇଛି । ସରକାରୀ ଓ ବେସରକାରୀ ଜମିରେ ଥିବା ବିଭିନ୍ନ ଗଛ ଓ ବନୀକରଣର ଚିହ୍ନଟ କରିବା ସହିତ ମୂଲ୍ୟ ନିର୍ଦ୍ଧାରଣ କରିବା ପାଇଁ ନୟାଗଡ଼ ବନଖଣ୍ଡ ଅଧିକାରୀ ଧନରାଜ ଏଚ୍.ଡିଙ୍କୁ ପରାମର୍ଶ ଦିଆଯାଇଛି । ଏହି ବୈଠକରେ ଜାତୀୟ ରାଜପଥ ବିଭାଗର ସମସ୍ତ ଅଧିକାରୀ ଏବଂ ଲାଇନ ବିଭାଗ ଅଧିକାରୀମାନେ ଯୋଗ ଦେଇଥିବା ଜଣାଯାଇଛି ।
