ବଡ଼ମ୍ବା, (ବାଘୁଆବାର୍ତ୍ତା): ସଚେତନ ହେଲେ ନାବାଳିକା । ନିଜ ବାହାଘର ବନ୍ଦ କରିବା ପାଇଁ ଆଇଆଇସିଙ୍କୁ ଚିଠି ଲେଖିଛନ୍ତି ନାବାଳିକା । ଏଭଳି ଘଟଣା ସାମ୍ନାକୁ ଆସିଛି କଟକ ଜିଲ୍ଲା ବଡ଼ମ୍ବା ଥାନା ଅଞ୍ଚଳରୁ । ସୁଚନାନୁସାରେ, କଟକ ଜିଲ୍ଲା ବଡ଼ମ୍ବା ଥାନା ଅନ୍ତର୍ଗତ ସନ୍ତରାବଳୀ ଗାଁର ଜଣେ ୧୬ବର୍ଷିୟ ନାବାଳିକାଙ୍କ ପରିବାର ଲୋକ ଜୋର ଜବରଦସ୍ତ ବିବାହ କରିବା ପାଇଁ ସ୍ଥିର କରିଛନ୍ତି । ଏଥିପାଇଁ ମଧ୍ୟ ଦିନ ଧାର୍ଯ୍ୟ କରାଯାଇଛି । ଆଉ ଦିନ କେଇଟା ଗଲେ ନାବାଳିକାର ବିବାହ ହୋଇଥାନ୍ତା । ହେଲେ ନାବାଳିକା ଜଣକ ବାଲ୍ୟ ବିବାହ ଆଇନ ଅନୁସାରେ ବଡ଼ ଅପାରଧ । ଏହା ଜାଣିବା ପରେ ନାବାଳିକା ଜଣକ ପରିବାର ଲୋକଙ୍କୁ ଯେତେ କାକୁତି ମିନତି ହୋଇ ବିବାହ ବନ୍ଦ କରିବାକୁ ଅନୁରୋଧ କରିଥିଲେ ମଧ୍ୟ ନାବାଳିକାଙ୍କ ବାପା ମାନିବାକୁ ନାରାଜ୍ ଥିଲେ । ଆସନ୍ତା ୨୦ତାରିଖରେ ନାବାଳିକାର ବିବାହ ହୋଇଥାନ୍ତା । ସେଥିପାଇଁ ମଧ୍ୟ ସବୁ ପ୍ରସ୍ତୁତି ସରିଥିଲା । ତା’ପୂର୍ବରୁ ନାବାଳିକା ଜଣକ ବଡ଼ମ୍ବା ଥାନାରେ ନୂଆ କରି ଯୋଗ ଦେଇଥିବା ଥାନା ଅଧରକାରୀ ପ୍ରମୋଦ କୁମାର ଲେଙ୍କାଙ୍କୁ ବାହାଘର ବନ୍ଦ କରିବାକୁ ଚିଠି ଲୋଖିଛନ୍ତି । ଯଦି ବାହାଘର ବନ୍ଦ ନହୁଏ ତେବେ ନାବାଳିକା ଜଣକ ଆତ୍ମହତ୍ୟା କରିବେ ବୋଲି ଚେତାବନୀ ଦେଇଛନ୍ତି । ମୋର ବୟସ ହୋଇନି । ମୋ ଇଚ୍ଛା ବିରୁଦ୍ଧରେ ମୋର ବାହାଘର ସ୍ଥିର କରିଛନ୍ତି । ମୋର ବୟସ ମାତ୍ର ୧୬ବର୍ଷ । ବାଲ୍ୟ ବିବାହ କରିବା ସବୁଠାରୁ ବଡ଼ ଅପରାଧ । ତେଣୁ ମୋ ବାହାଘର ବନ୍ଦ କର ବୋଲି ଆଇଆଇସିଙ୍କୁ ଚିଠି ଲେଖି ଅବଗତ କରାଇଛନ୍ତି ନାବାଳିକା । ଚିଠି ପାଇବା କ୍ଷଣି ବଡ଼ମ୍ବା ଥାନା ଅଧିକାରୀ ଜିଲ୍ଲା ଶିଶୁ ସୁରକ୍ଷା ଅଧରକାରିଙ୍କୁ ଅବଗତ କରାଇବା ସହିତ ନାବାଳିକାର ଗାଁ ପହଞ୍ଚିଥିବା ଜଣାପଡିଛି ।
