ଭୁବନେଶ୍ୱର, (ବାଘୁଆବାର୍ତ୍ତା): ରାଜ୍ୟରେ କରୋନା ମହାମାରୀ ସଂକ୍ରମଣକୁ ରୋକିବା ପାଇଁ ସରକାରଙ୍କ ଦ୍ୱାରା ଯାତ୍ରୀ ପରିବହନ ଉପରେ କଟକଣା ଜାରି କରାଯାଇଥିବାବେଳେ ରାଜଧାନୀ ଅଟୋରିକ୍ସା ମହାସଂଘ ସାଧାରଣ ଲୋକଙ୍କ ଉପରେ ଅତିରିକ୍ତ ବୋଝ ଲଦି ଦେଇଛି । ଏଣିକି ରାଜଧାନୀ ଭୂବନେଶ୍ୱରରେ ସର୍ବନିମ୍ନ ୩ କିମି ପାଇଁ ଯାତ୍ରୀଙ୍କୁ ମୁଣ୍ଡପିଛା ୨୦ଟଙ୍କା ଭଡା ଦେବାକୁ ପଡ଼ିବ । ରାଜଧାନୀର ଅଟୋରିକ୍ସା ମହାସଂଘର ସାଧାରଣ ସମ୍ପାଦକ ବିଜୟ କୁମାର ପଟ୍ଟନାୟକ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ବାରମ୍ବାର ତୈଳଦର ବୃଦ୍ଧି ଓ କୋଭିଡ୍ କଟକଣା ଯୋଗୁ ଅଟୋରେ ସର୍ବାଧିକ ୨ଜଣ ଯାତ୍ରୀଙ୍କୁ ପରିବହନ କରିବାର ନିୟମକୁ ଦୃଷ୍ଟିରେ ରଖି ଏହି ଭଡା ବୃଦ୍ଧି କରାଯାଇଛି । ଯାତ୍ରୀଙ୍କୁ ସର୍ବନିମ୍ନ ୩ କିମି ପାଇଁ ୨୦ ଟଙ୍କା ଦେବାକୁ ପଡ଼ିବ । ତା’ଠୁ ଅଧିକ ହେଲେ ୧ କିମି ପିଛା ୧୦ ଟଙ୍କା ଦେବାକୁ ପଡ଼ିବ । ଯଦି ଅଟୋ ରିଜର୍ଭ କରିବେ ତା’ହେଲେ ୩ କିମି ପାଇଁ ଯାତ୍ରୀଙ୍କୁ ୫୦ ଟଙ୍କା ଓ ତା’ଠୁ ଅଧିକ ହେଲେ ୧କିମି ପିଛା ଅତିରିକ୍ତ ୧୫ ଟଙ୍କା ଦେବାକୁ ପଡ଼ିବ । ଗତ କିଛି ଦିନ ହେଲା କ୍ରମାଗତ ଭାବେ ତୈଳ ଦର ବୃଦ୍ଧି ପାଇବାରେ ଲାଗିଛି । କୋଭିଡ ପାଇଁ ଅଟୋଚାଳକଙ୍କ ଜୀବିକା ପ୍ରତି ମଧ୍ୟ ବିପଦ ସୃଷ୍ଟି ହୋଇଛି । ତେଣୁ ମହାସଂଘ ଆଜି ଏହି ଦରବୃଦ୍ଧି ନିଷ୍ପତ୍ତି ନେଇଛି ।
