ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ସଦରଥାନା ଅନ୍ତର୍ଗତ ଯଦୁପୁର ଗ୍ରାମରେ ଘଟିଥିବା ବହୁ ଚର୍ଚ୍ଚିତ ପରୀ ହତ୍ୟାକାଣ୍ଡ ଘଟଣାକୁ ନେଇ ଯଦୁପୁର ଗ୍ରାମରେ ୨୧ ତାରିଖରେ ଉତ୍ତେଜନା ସୃଷ୍ଟି ହୋଇଥିଲା । ପରୀ ବାପା ଅଶୋକ ଏକ ପଡ଼ୋଶୀ ଶିଶୁକୁ ପାଉରୁଟି ଖାଇବାକୁ ଦେବାକୁ ନେଇ କିଛି ବ୍ୟକ୍ତି ତାଙ୍କ ପରିବାର ଉପରେ ଆକ୍ରମଣ କରିଥିଲେ । ଏହି ଘଟଣାରେ ଗତକାଲି ବିଳମ୍ବିତ ରାତିରେ ନୟାଗଡ଼ ସଦରଥାନା, ଟାଉନଥାନା ପୁଲିସ ଯଦୁପୁର ଗ୍ରାମରେ ଚଢ଼ାଉ କରି ୧୪ ଜଣଙ୍କୁ ହେପାଜତକୁ ନେଇଥିବା ଜଣାଯାଇଛି ।
ସୂଚନାନୁସାରେ, ପରୀ ନିଖୋଜ ଏବଂ ହତ୍ୟା ପରେ ଗଳିତ ଶବ ଉଦ୍ଧାର ଘଟଣାକୁ ୩ ମାସ ବିତିଥିବା ବେଳେ ପୁଲିସ ଅଭିଯୁକ୍ତକୁ ଗିରଫ କରି ପାରିନାହିଁ । ଗତକାଲି ପରୀର ବାପା ଅଶୋକ କୁମାର ସାହୁ ପରୀ ସହ ନିଖୋଜ ଦିନ ଖେଳୁଥିବା ଏକ ଛୋଟ ଶିଶୁ ବିଜୁକୁ ତାଙ୍କ ଘରକୁ ଡାକି ଆଣି ପାଉରୁଟି ଖାଇବାକୁ ଦେଇ ତାଙ୍କ ଝିଅକୁ କିଏ ନେଇଥିଲା ବୋଲି ପଚରାଉଚରା କରୁଥିଲେ । ଯାହାକୁ ନେଇ ଯଦୁପୁର ଗ୍ରାମରେ ଆରମ୍ଭ ହୋଇଥିଲା ଉତ୍ତେଜନା । ବିଜୁକୁ ପରୀର ବାପା ଅଶୋକ ମାରି ଦେବା ଚକ୍ରାନ୍ତରେ ବିଷ ମିଶା ପାଉରୁଟି ଦେଇଥିବା ନେଇ ଶିଶୁର ମା ସବିତା ବେହେରା ଏବଂ ଜେଜେ ମାଆ ଅଭିଯୋଗ କରିବାରୁ ଗାଁର କିଛି ଯୁବକ ପରୀ ପରିବାର ଉପରେ ଆକ୍ରମଣ କରିଥିଲେ । ଆକ୍ରମଣରେ ପରୀ ମାଆଙ୍କ ଗୋଡ଼ ଆଙ୍ଗୁଠି କଟି ଯିବାରୁ ତାଙ୍କୁ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣା ଯାଇଥିଲା । ପାଉରୁଟି ଖାଇଥିବା ୫ ବର୍ଷର ବାଳକ ବିଜୁକୁ ମଧ୍ୟ ବାପା ବୀର ବେହେରା ଏବଂ ଦାଦା ପବିତ୍ର ବେହେରା ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ । ସେଠାରେ ଡାକ୍ତର ଶିଶୁକୁ ଦେଖିବା ପରେ ପ୍ରାଥମିକ ଭାବେ ପଟାସ ପାଣି ଦ୍ୱାରା ଶିଶୁକୁ ବାନ୍ତି କରାଯାଇଥିବା ଏବଂ ପରେ ଶିଶୁ ୱାର୍ଡ଼କୁ ନେଇ ସାଲାଇନ ଲଗା ଯାଇଥିଲା । ଏହି ସମୟରେ ଡାକ୍ତରଖାନାରେ ପରୀ ବାପା ଅଶୋକଙ୍କୁ ଦେଖି ବିଜୁର ବାପା ବୀର ବେହେରା ଏବଂ ଦାଦା ପବିତ୍ର ବେହେରା ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି । ଏହି ଆକ୍ରମଣରେ ଅଶୋକଙ୍କୁ ମୁଣ୍ଡ ଫାଟି ରକ୍ତାକ୍ତ ହୋଇପଡ଼ିଥିବାରୁ ତାଙ୍କ ମୁଣ୍ଡରେ ଷ୍ଟିଚ ପଡ଼ିଛି । ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ବିଜୁର ପ୍ରାଥମିକ ଚିକିତ୍ସା ପରେ ତାଙ୍କୁ ଭୁବନେଶ୍ୱର ସ୍ଥାନାନ୍ତରିତ କରାଯାଇଥିବା ବେଳେ ତାଙ୍କ ପରିବାର ଏନେଇ ନୟାଗଡ଼ ସଦରଥାନାରେ ଅଭିଯୋଗ କରିଛନ୍ତି । ସେହିଭଳି ଭାବେ ଗାଁରେ ଅଶୋକ ଏବଂ ତାଙ୍କ ପରିବାରକୁ କରାଯାଇଥିବା ଆକ୍ରମଣରେ ଅଶୋକ ସଦରଥାନାରେ ଏକ ଏତଲା ଦେଇଥିବା ବେଳେ ଜିଲ୍ଲା ମୁଖ୍ୟ ଚିକିତ୍ସାଳୟରେ ତାଙ୍କ ଉପରେ ହୋଇଥିବା ମରଣାନ୍ତକ ଆକ୍ରମଣକୁ ନେଇ ନୟାଗଡ଼ ଟାଉନଥାନାରେ ମଧ୍ୟ ଏକ ଏତଲା ଦେଇଥିଲେ । ପୁଲିସ ଏହି ଘଟଣାକୁ ନେଇ ଗତକାଲି ବିଳମ୍ବିତ ରାତିରେ ଯଦୁପୁର ଗ୍ରାମରେ ଚଢ଼ାଉ କରି ୧୪ ଜଣଙ୍କୁ ହେପାଜତକୁ ନେଇଥିବା ଜଣାଯାଇଛି । ସେମାନଙ୍କ ମଧ୍ୟରୁ ୧୨ ଜଣଙ୍କୁ ସଦରଥାନା ପୁଲିସ ଗିରଫ କରିଥିବା ବେଳେ ୨ ଜଣଙ୍କୁ ଟାଉନଥାନା ପୁଲିସ ଗିରଫ କରିଛି । ଆଜି ଅଭିଯୁକ୍ତମାନଙ୍କର ଡାକ୍ତରୀ ପରୀକ୍ଷା ଶେଷ ହୋଇଥିବା ବେଳେ କୋର୍ଟ ଚାଲାଣ କରାଯିବ ବୋଲି ଜଣାଯାଇଛି ।
‘ପରୀ’ ପରିବାର ଉପରେ ଆକ୍ରମଣ ଘଟଣା, ୧୪ ଗିରଫ
