ନୂଆଦିଲ୍ଲୀ (ବାଘୁଆବାର୍ତ୍ତା): କରୋନା ଭାଇରସର ପ୍ରକୋପ ମଧ୍ୟରେ ଅଲଗା ଅଲଗା ଜାଗାରେ ଲକଡାଉନ ପରି କଟକଣାର ପ୍ରଭାବ ଦେଖିବାକୁ ମିଳିଛି । ଭାରତରେ ଗତ କିଛି ଦିନ ହେବ କରୋନା ସଂକ୍ରମଣର ନୂତନ ମାମଲାରେ ହ୍ରାସ ଘଟିଛି । ଗ୍ରାମାଞ୍ଚଳରେ କରୋନା ଭାଇରସର ପ୍ରଭାବକୁ ଦୃଷ୍ଟିରେ ରଖି କେନ୍ଦ୍ର ସରକାର ନୂତନ ମାର୍ଗଦର୍ଶିକା ଜାରି କରିଛନ୍ତି । ସରକାର କହିଛନ୍ତି, ଏବେ ଧିରେ ଧିରେ କରୋନା ଭାଇରସର ପ୍ରକୋପ ଗାଁ ଆଦିବାସୀ ବହୁଳ ଓ ସହର ଉପକଣ୍ଠ ଅଞ୍ଚଳରେ ଦେଖିବାକୁ ମିଳିଛି । ମାର୍ଗଦର୍ଶିକା ଜାରି କରି ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ କହିଛି, ଗ୍ରାମାଞ୍ଚଳରେ କରୋନାର ମୁକାବିଲା ପାଇଁ ପ୍ରାଥମିକ ସ୍ତରରେ ସ୍ୱାସ୍ଥ୍ୟ ଭିତ୍ତିଭୂମିକୁ ମଜବୁତ କରିବାର ଆବଶ୍ୟକତା ରହିଛି । ପ୍ରତିଟି ସ୍ତରରେ ସଜାଗ ରହିବା ଜରୁରୀ । ଗ୍ରାମାଞ୍ଚଳରେ ନୂତନ ସଂକ୍ରମିତଙ୍କ ସଂଖ୍ୟା ବଢ଼ୁଥିବା ଦେଖିବାକୁ ମିଳିଛି । ସର୍ଭେଲାନ୍ସ, ସ୍କ୍ରିିନିଂ ଓ ଆଇସୋଲେସନ ଉପରେ ଗୁରୁତ୍ୱ ଦେବାକୁ ନିର୍ଦ୍ଦେଶ ଦିଆଯାଇଛି । ସ୍ୱାସ୍ଥ୍ୟ ମନ୍ତ୍ରଣାଳୟର ଗାଇଡ ଲାଇନ ଅନୁଯାୟ୍ରୀ, ପ୍ରତିଟି ଗାଁରେ ସ୍ୱାସ୍ଥ୍ୟ ସ୍ୱଛତା ଓ ପୋଷଣ କମିଟି ସାହାଯ୍ୟରେ ଆଶାକର୍ମୀଙ୍କ ଦ୍ୱାରା ନିୟମିତ ସମୟରେ ଇନଫ୍ଲୁଏଞ୍ଜା ପରି ରୋଗ, ଗମ୍ଭୀର ଶ୍ୱସନ ସଂକ୍ରମଣ ପରି ରୋଗ ଉପରେ ନଜର ରଖାଯିବ । ଲକ୍ଷଣ ଥିଲେ ସ୍ୱାସ୍ଥ୍ୟ ଅଧିକାରୀଙ୍କ ସହ ଟେଲିକନସଲଟିଂରେ ପରାମର୍ଶ ନେବେ । ଜଟିଳ ରୋଗ କିମ୍ବା ଅକ୍ସିଜେନ କମ ଥିଲେ ହସ୍ପିଟାଲ ଯିବାକୁ ନିର୍ଦ୍ଦେଶ ଦିଆଯାଇଛି । ସବୁ ସ୍ୱାସ୍ଥ୍ୟ କେନ୍ଦ୍ରରେ ଓପିଡି ନିର୍ଦ୍ଦିଷ୍ଟ ସମୟରେ ଖୋଲିବାକୁ, ଏଏନଏମଙ୍କୁ ରାପିଡ ଆଣ୍ଟିଜେନ ଟେଷ୍ଟ ପାଇଁ ପ୍ରଶିକ୍ଷଣ ଦେବାକୁ ନିର୍ଦ୍ଦେଶ ହୋଇଛି । କୋଭିଡ ପରିଚାଳନା ପାଇଁ ତ୍ରିସ୍ତରୀୟ ବ୍ୟବସ୍ଥା ଏବଂ ଗୁରୁତର ରୋଗୀଙ୍କୁ କୋଭିଡ ହସ୍ପିଟାଲରେ ଭର୍ତ୍ତି କରିବାକୁ ନିର୍ଦ୍ଦେଶ ଦିଆଯାଇଛି ।
ଗାଁ ଗଣ୍ଡାରେ ବ୍ୟାପିଲାଣି କରୋନା, ନୂଆ ଗାଇଡ ଲାଇନ ଜାରି, ନଜର ରଖିବେ ଆଶାକର୍ମୀ ଏଏନଏମ
