ଭୁବନେଶ୍ୱର, (ବାଘୁଆବାର୍ତ୍ତା): ଦଶ କି ୨୦ ହଜାର ନୁହେଁ । ବିଲ୍ ପାସ୍ ପାଇଁ ଠିକାଦାରଙ୍କୁ ୧ ଲକ୍ଷ ଟଙ୍କା ମାଗିଥିଲେ ଯନ୍ତ୍ରୀ । ୧ ଲକ୍ଷ ଟଙ୍କା ଲାଞ୍ଚ ନେଲା ବେଳେ ଭୁବନେଶ୍ୱର ଭିଜିଲାନ୍ସ ଡିଭିଜନ ତାଙ୍କୁ ଗିରଫ କରିଛି । ଭିଜିଲାନ୍ସ ପଞ୍ଝାରେ ପଡ଼ିଥିବା ଏହି ବାବୁ ଜଣଙ୍କ ହେଲେ ଗ୍ରାମ୍ୟ ନିର୍ମାଣ (ଜନସ୍ୱାସ୍ଥ୍ୟ) ବିଭାଗ ସହକାରୀ ଯନ୍ତ୍ରୀ (ଏଇ) ନରେଶ କୁମାର ଦାସ । ଭିଜିଲାନ୍ସ ଅଧିକାରୀମାନେ ୧ ଲକ୍ଷ ଲାଞ୍ଚ ଟଙ୍କାକୁ ସହ ତାଙ୍କ ପାଖରୁ ୨ ଲକ୍ଷ ୨୬ ହଜାର ଟଙ୍କା ଏବଂ ଭଡ଼ା ଘରୁ ୧.୩୦ ଲକ୍ଷ ଟଙ୍କା ସମେତ ନଗଦ ୩.୫୬ ଟଙ୍କା ଜବତ କରାଯାଇଛି। ଜଣେ ଠିକାଦାରଙ୍କର ୭ ଲକ୍ଷ ଟଙ୍କା ବିଲ୍ ବାକି ଥିଲା । ଉକ୍ତ ବିଲ୍ ପାସ୍ ପାଇଁ ଠିକାଦାର ଜଣଙ୍କ ନରେଶଙ୍କ ପାଖକୁ ଯାଇଥିଲେ । ନରେଶ ବିଭିନ୍ନ ବାହାନାରେ ଦିନ ଗଡ଼ାଇ ଚାଲିଥିଲେ । ତେବେ ଗତ ସପ୍ତାହରେ ଠିକାଦାରଙ୍କୁ ନରେଶ କହିଥିଲେ ଦେଢ଼ ଲକ୍ଷ ଟଙ୍କା ଦେଲେ ୭ ଲକ୍ଷ ଟଙ୍କାର ବିଲ୍ ପାସ୍ କରି ଦେବେ । ଏତେ ଟଙ୍କା ଦେବାକୁ ନରେଶ ରାଜି ହୋଇ ନଥିଲେ । ଶେଷରେ ୧ ଲକ୍ଷ ଟଙ୍କାରେ କଥା ଛିଡ଼ିଥିଲା । ଠିକାଦାର ଜଣଙ୍କ ଏନେଇ ଭିଜିଲାନ୍ସ ଅଫିସ୍ରେ ଜଣାଇଥିଲେ । ତାଙ୍କୁ ଧରିବା ପାଇଁ ଭିଜିଲାନ୍ସ ଟିମ୍ ଯୋଜନା କରିଥିଲେ । ବୁଧବାର ଟଙ୍କା ନେଇ ଅଫିସ୍ ଆସିବାକୁ କହିଥିଲେ ନରେଶ । ଏଇଙ୍କ କଥା ମାନି ଠିକାଦାର ୧ ଲକ୍ଷ (୫ଶହ ଟଙ୍କିଆ) ନେଇ ପ୍ରଥମେ ଭିଜିଲାନ୍ସ ଅଫିସ୍କୁ ଯାଇଥିଲେ । ପୂର୍ବରୁ ଉକ୍ତ ଟଙ୍କାରେ ଥିବା ସିରିୟଲ୍ ନମ୍ବର ଭିଜିଲାନ୍ସ ଅଧିକାରୀମାନେ ସାକ୍ଷୀମାନଙ୍କ ଉପସ୍ଥିତରେ ଲେଖି ରଖିଥିଲେ । ତା’ପରେ ଉକ୍ତ ଟଙ୍କାରେ କେମିକାଲ୍ ବୋଳି ଠିକାଦାରଙ୍କୁ ଦେଇଥିଲେ ଭିଜିଲାନ୍ସ ଟିମ୍ । ଟଙ୍କା ନେଇ ଅଫିସ୍ରେ ସେ ଏଇଙ୍କୁ ଦେଇଥିଲେ ଠିକାଦାର । ଏହି ସମୟରେ ଭିଜିଲାନ୍ସ ଟିମ୍ ନରେଶଙ୍କୁ ଗିରଫ କରିଥିଲା । ତା’ପରେ ନରେଶଙ୍କ ଅଫିସ୍ ଚ୍ୟାମ୍ବର ଯାଞ୍ଚ କରିଥିଲେ । ଯାଞ୍ଚ ସମୟରେ ଆଉ ୧ ଲକ୍ଷ ୨୬ ହଜାର ଟଙ୍କା ମିଳିଥିଲା । ଉକ୍ତ ଟଙ୍କା ବିଷୟରେ ସେ ଭିଜିଲାନ୍ସକୁ କୌଣସି ସନ୍ତୋଷଜନକ ଉତ୍ତର ଦେଇପାରି ନଥିଲେ । ଭିଜିଲାନ୍ସ ଅଧିକାରୀମାନେ ତାଙ୍କୁ ଗିରଫ କରି କୋର୍ଟ ଚାଲାଣ କରିଛନ୍ତି । ଆୟବହିର୍ଭୂତ ସମ୍ପତ୍ତି ଠୁଳ ନେଇ ତାଙ୍କ ଘରେ ଚଢ଼ଉ କରାଯିବ ବୋଲି ଭିଜିଲାନ୍ସ ବିଭାଗ ପକ୍ଷରୁ ଜଣାପଡିଛି ।
ଜନସ୍ୱାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ନରେଶ କୁମାର ଦାସ ଗିରଫ
