ବାରିପଦା, (ବାଘୁଆବାର୍ତ୍ତା): ବାରିପଦା ବନଖଣ୍ଡ ଅଧିନସ୍ଥ ଦେଉଳି ବନାଞ୍ଚଳର ଝାରପୋଖରିଆ ଜାମଶୋଲା ରାସ୍ତାର ଗୋଷାଣୀ ଛକ ନିକଟରେ ବନ କର୍ମଚାରୀ ଚଢାଉ କରି ୨ଟି ହାତୀ ଦାନ୍ତ ଜବତ କରିଛି । ଏଥିସହ ୪ ଜଣ ଗିରଫ ହୋଇଛନ୍ତି। ହାତୀ ଦାନ୍ତ ବିକ୍ରି ପାଇଁ ରାଜ୍ୟ ବାହାରକୁ ଚାଲାଣ ହେଉଥିବା ବେଳେ ବନ ବିଭାଗର ଏନଫୋର୍ସମେଣ୍ଟ ଟିମ୍ ଚଢାଉ କରିଥିଲା। ଏକ ବାଇକ୍ ରେ ଦୁଇଜଣ ୨ଟି ହାତୀଦାନ୍ତକୁ ଗାମୁଛାରେ ବାନ୍ଧି ଏକ ବ୍ୟାଗରେ ନେଉଥିଲେ। ସେମାନଙ୍କୁ ସୁରକ୍ଷା ଦେଇ ଆଉ ୨ ଜଣ ଅନ୍ୟ ଏକ ବାଇକ୍ ରେ ସେମାନଙ୍କ ସହିତ ଯାଉଥିଲେ। ବିଶେଷ ସୂତ୍ରରୁ ଖବର ପାଇ ବନବିଭାଗ କର୍ମଚାରୀ ସେମାନଙ୍କ ପିଛା କରିଥିଲା। ଗୋଷାଣୀ ଛକ ନିକଟରେ ବନବିଭାଗ କର୍ମଚାରୀ ୪ ଜଣଙ୍କୁ କାବୁ କରିବା ସହ ହାତୀ ଦାନ୍ତ ଜବତ କରିଥିଲା। ଗିରଫ ଅଭିଯୁକ୍ତଙ୍କ ମଧ୍ୟରେ ୨ ଜଣ ଝାଡ଼ଖଣ୍ଡର ଆନ୍ତଃରାଜ୍ୟ ହାତୀଦାନ୍ତ ବ୍ୟବସାୟୀ ଥିବା ବେଳେ ଦୁଇଜଣ ମୟୂରଭଞ୍ଜର ରାସଗୋବିନ୍ଦପୁର ଅଞ୍ଚଳର ବୋଲି ଜଣା ପଡ଼ିଛି। ଗିରଫ ଅଭିଯୁକ୍ତମାନେ ହେଲେ ଝାରଖଣ୍ଡ ରାଜ୍ୟ ପଶ୍ଚିମ ସିଂ ଭୁମ୍ ଜିଲ୍ଲାର ମଙ୍ଗଲ ସୋରେନ୍ ଏବଂ ସୁରେଇ ସୋରେନ୍। ମୟୂରଭଞ୍ଜ ରାସଗୋବିନ୍ଦପୁର ଅଞ୍ଚଳର ବାର୍ଷା ମୁର୍ମୁ ଓ ଯୋଗେଶ୍ୱର ନାଏକ । ହାତୀ ଦାନ୍ତୁ ଦୁଇଟିରୁ ଗୋଟିକର ଓଜନ ଏକ କେଜି ହୋଇଥିବା ବେଳେ ଅନ୍ୟଟି ଏକ କେଜି ୨୦ ଗ୍ରାମ । ପ୍ରାଥମିକ ତଦନ୍ତ ପରେ ହାତୀ ଦାନ୍ତ ଦୁଇଟିକୁ ଫରେନ୍ସିକ୍ ଲ୍ୟାବକୁ ପଠାଯାଇ ଅଧିକ ତଥ୍ୟ ସଂଗ୍ରହ କରାଯିବ ବୋଲି ବାରିପଦା ଏସି.ଏଫ୍ ରବିନାରାୟଣ ମହାନ୍ତି କହିଛନ୍ତି ।
