ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଟାଉନ ଥାନା ପୁଲିସକୁ ମିଳିଛି ବଡ଼ ସଫଳତା । ଜଣେ ବାଇକ ଲୁଟେରାକୁ ଧରିବାରେ ପୁଲିସକୁ ସଫଳତା ମିଳିଛି । ସୁଚନାନୁସାରେ ନୟାଗଡ଼ ଟାଉନ ଥାନା ଆଇଆଇସି ରଶ୍ମିରଞ୍ଜନ ମହାପାତ୍ରଙ୍କ ନିର୍ଦ୍ଦେଶ କ୍ରମେ ଗତ କାଲି ସନ୍ଧ୍ୟା ୭.୩୦ ସମୟରେ ଖଣ୍ଡପଡ଼ା ରୋଡରେ ପେଟ୍ରୋଲିଂ କରାଯାଉଥିଲା । ସବ ଇନିସପେକ୍ଟର ରଇବାରି ତିରିଆଙ୍କ ନେତୃତ୍ୱରେ ଏକ ପୁଲିସ ଟିମ ରେଲ୍ୱେ ଓଭର ବ୍ରିଜ ନିକଟରେ ସନ୍ଦେହ ହେବାରୁ ଏକ ଗ୍ଲାମର ଗାଡିକୁ ଅଟକାଇଥିଲେ । ଉକ୍ତ ଗାଡି ନମ୍ବରଟି ଭୁଲ ଥିବାରୁ ପୁଲିସର ସନ୍ଦେହ ଅଧୀକ ବଢ଼ିଥିଲା । ତାଙ୍କୁ ଥାନାକୁ ଆଣି ପଚରା ଉଚୁରା କରାଯାଇଥିଲାବେଳେ ଏହା ଚୋରା ଗାଡି ବୋଲି ପ୍ରକାଶ କରିଥିଲା । ଏଥି ସହିତ ତାଙ୍କ ନିକଟରୁ ଆଉ ତିନି ଗୋଟି ଚୋରା ଗାଡି ପୁଲିସ ଜବତ କରିଛି । ଚାରି ଗୋଟି ଗାଡି ମଧ୍ୟରୁ ଦୁଇ ଗୋଟି ଗ୍ଲାମର ଥିବାବେଳେ ଅନ୍ୟ ଦୁଇ ଗୋଟି ଆପାଚି ଗାଡି ରହିଛି । ଅଭିଯୁକ୍ତ ଜଣଙ୍କ ଇଟାମାଟି ଥାନା ଅଧିନସ୍ଥ ଶରଧାପୁର ଗ୍ରାମର ବ୍ରଜକିଶୋର ପ୍ରଧାନଙ୍କ ପୁଅ ଜିତେନ୍ଦ୍ର ପ୍ରଧାନ ବୋଲି ପୁଲିସ ସୁଚନା ଦେଇଛି । ଗତ ୩ ବର୍ଷ ଧରି ଜିତେନ୍ଦ୍ର ପୁରୀ ଓ ନୟାଗଡ଼ ଅଞ୍ଚଳରୁ ଗାଡି ଚୋରି କରୁଥିବା ପ୍ରକାଶ କରିଥିଲା । ନୟାଗଡ଼ ଟାଉନ ଥାନା ପକ୍ଷରୁ କେସ ନଂ- ୩୪୧ରେ ମାମଲା ରୁଜୁ କରାଯାଇ ଜିତେନ୍ଦ୍ରକୁ ଗିରଫ କରାଯାଇଛି ।
