ଭୁବନେଶ୍ୱର,(ବାଘୁଆବାର୍ତ୍ତା) ; ଆଜି ଜଙ୍ଗଲ ଓ ପରିବେଶ, ସଂସଦୀୟ ବ୍ୟାପାର ମନ୍ତ୍ରୀ ଶ୍ରୀ ବିକ୍ରମ କେଶରୀ ଆରୁଖ ଅଂଶୁପା ହ୍ରଦର ୱାଚ୍ ଟାୱାରର ଉଦ୍ଘାଟନ କରିଛନ୍ତି । ଅଂଶୁପାଠାରେ ଆୟୋଜିତ ଏହି ଉଦ୍ଘାଟନ ସମାରୋହରେ ମୁଖ୍ୟ ଅତିଥିଭାଦେ ଯୋଗ ଦେଇ ମନ୍ତ୍ରୀ
ଶ୍ରୀ ଆରୁଖ କହିଲେ ଯେ, ଓଡ଼ିଶାର ଶ୍ରେଷ୍ଠ ମଧୁର ଜଳ ହ୍ରଦ ହେଉଛି ଅଂଶୁପା । ମଧୁରଜଳ, ଜୈବବିବିଧତା ଓ ପ୍ରାକୃତିକ ସୌନ୍ଦର୍ଯ୍ୟ ପାଇଁ ଏହା ଓଡ଼ିଶା ପର୍ଯ୍ୟଟନ ମାନଚିତ୍ରରେ ଏକ ସ୍ୱତନ୍ତ୍ର ସ୍ଥାନ ଅଧିକାର କରିଛି । ପୂର୍ବକାଳରେ ଅଂଶୁପାକୁ ‘ଅଂଶପାଟ’ କୁହାଯାଉଥିଲା । ମହାନଦୀର ଏକ ଅଂଶବିଶେଷ ବୋଲି ଏହାକୁ ବିବେଚନା କରାଯାଏ । ବାଙ୍କି ଉପଖଣ୍ଡର ପ୍ରାୟ ୭ଟି ପଞ୍ଚାୟତର ୨୦ଟି ଗ୍ରାମର ଲୋକଙ୍କ ଜୀବନଜୀବିକା ସହିତ ଅଂଶୁପା ସଂଶ୍ଳିଷ୍ଟ । ୩୮୨ ହେକଫର ପରିମିତ ଏହି ଜଳବ୍ୟାପ୍ତ ଅଞ୍ଚଳରେ ସେମାନଙ୍କ ପାଇଁ ଅନେକ କିଛି ସୁଯୋଗ ରହିଛି । ରାଜା ରାଜୁଡ଼ା ସମୟରୁ ଅଂଶୁପା ହ୍ରଦର ପରିଚାଳନା ସ୍ଥାନୀୟ ଲୋକମାନଙ୍କ ଦ୍ୱାରା କରାଯାଉଥିଲା । ପରବର୍ତ୍ତୀ ସମୟରେ ଅଂଶୁପା ଓ ଏହାର ଅବବାହିକାର ପରିଚାଳନା ଆଠଗଡ଼ ବନଖଣ୍ଡ ଦ୍ୱାରା କରାଗଲା । ୧୯୭୪ ମସିହାଠାରୁ ମୃତ୍ତିକା ସଂରକ୍ଷଣ ବିଭାଗ ଦ୍ୱାରା ବିଭିନ୍ନ ପ୍ରକାରର ମୃତ୍ତିକା ଓ ଜଳ ସଂରକ୍ଷଣ କାର୍ଯ୍ୟକ୍ରମ ହାତକୁ ନିଆଯିବା ସଙ୍ଗେ ସଙ୍ଗେ ଏହାର ନିକଟବର୍ତ୍ତୀ ପାହାଡ଼ମାନଙ୍କରେ କାଜୁ ରୋପଣ କରାଯାଇଥିଲା । ୨୦୦୨-୦୩ ମସିହାରେ ରାଜ୍ୟ ସରକାର ଅଂଶୁପା ହ୍ରଦର ଉନ୍ନତି ଓ ପୁନରୁଦ୍ଧାର ନିମନ୍ତେ ଗୋଟିଏ ବିଧିବଦ୍ଧ ଖସଡ଼ା ପ୍ରସ୍ତୁତ କଲେ । ଏହି ଯୋଜନାଟି କଟକ ଗ୍ରାମ୍ୟ ଉନ୍ନୟନ ସଂସ୍ଥା ମାଧ୍ୟମରେ ମୃତ୍ତିକା ସଂରକ୍ଷଣ ବିଭାଗ ଦ୍ୱାରା କାର୍ଯ୍ୟକାରୀ କରାଗଲା । ବିଶେଷ କରି ଅବବାହିକା ଅଞ୍ଚଳରେ ୪ଟି ଜଳ ବିଭାଜିକାର ଉନ୍ନତି କାର୍ଯ୍ୟ କରାଗଲା । ତେବେ ଏହି ଯୋଜନା ଦ୍ୱାରା ହ୍ରଦର କିଛି ଉନ୍ନତି ସାଧିତ ହେଲା । ୨୦୧୦ ମସିହାରେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦିଗ୍ଦର୍ଶନରେ ଅଂଶୁପା ହ୍ରଦର ଉନ୍ନତି ଦାୟିତ୍ୱ ଚିଲିକା ଉନ୍ନୟନ କର୍ତ୍ତୃପକ୍ଷଙ୍କୁ
ନ୍ୟସ୍ତ କରାଗଲା । ଚିଲିକା ଉନ୍ନୟନ କର୍ତ୍ତୃପକ୍ଷ ସେବେଠାରୁ ହ୍ରଦର ସର୍ବାଙ୍ଗୀନ ଉନ୍ନତି କାର୍ଯ୍ୟରେ ପ୍ରୟାସରତ । ପ୍ରଥମ ପଦକ୍ଷେପରେ ପଙ୍କ ଉଦ୍ଧାର କାର୍ଯ୍ୟ ଓ ଦଳ କାଢ଼ିବା କାର୍ଯ୍ୟ ହୋଇଛି । ସ୍ଥାନୀୟ ଲୋକଙ୍କ ସହଯୋଗରେ ଏହା କରାଯାଉଛି । ବିଗତ ୫ ବର୍ଷ ମଧ୍ୟରେ ପର୍ଯ୍ୟଟନ, ମତ୍ସ୍ୟଚାଷ, ଜଳବିଭାଜିକାର ଉନ୍ନତିକରଣ ଦ୍ୱାରା ସ୍ଥାନୀୟ ଲୋକମାନଙ୍କର ଜୀବନ ଜୀବିକା ଉପରେ ପ୍ରଭାବ ପଡ଼ିପାରିଛି । ସଂପ୍ରତି ପ୍ରାକୃତିକ ପରିବେଶକୁ ସୁରକ୍ଷା ଦେଇ ଓ ପରିବେଶର କୌଣସି କ୍ଷତି ନ ପହଞ୍ଚାଇ ପର୍ଯ୍ୟଟନର ବିକାଶରେ ଗୁରୁତ୍ୱାରୋପ କରାଯାଉଛି । ଏହାଦ୍ୱାରା ସ୍ଥାନୀୟ ଅଞ୍ଚଳରେ ପରିବେଶର ସୁରକ୍ଷା ହେବା ସଙ୍ଗେ ସଙ୍ଗେ ଜୈବ ବିବିଧତାର ସୁରକ୍ଷା ପ୍ରତି ବିଶେଷ ଧ୍ୟାନ ଦିଆଯାଇ ପାରୁଛି । ଅଂଶୁପା ହ୍ରଦ ୨୦୧୫ ମସିହାରୁ ପରିବେଶ ପର୍ଯ୍ୟଟନରେ ଅନ୍ତର୍ଭୁକ୍ତ ହୋଇଛି । ଅଂଶୁପା କୂଳରେ ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ ଦ୍ୱାରା ୧୫ ଏକର ପରିମିତ ସ୍ଥାନରେ ଏକ ପରିବେଶ ଉଦ୍ୟାନ ନିର୍ମିତ ହୋଇଛି । ଏଥିମଧ୍ୟରେ ବିଭିନ୍ନ ପ୍ରକାରର ଦେଶୀ, ବିଦେଶୀ ଫୁଲ ଗଛ, ଔଷଧୀୟ ଗୁଳ୍ମ ଓ ଋତୁ ଅନୁଯାୟୀ ଫୁଲଗଛ ଲଗାଯାଇଅଛି । ମାଛ ଚାଷ ପାଇଁ ଚିଲିକା ଉନ୍ନୟନ କର୍ତ୍ତୃପକ୍ଷ ତରଫରୁ ବିଶେଷଜ୍ଞଙ୍କ ସହାୟତାରେ ବିଭିନ୍ନ ପ୍ରକାରର କାର୍ଯ୍ୟକ୍ରମ ହାତକୁ ନିଆଯାଇଛି । ଅଂଶୁପା ନିକଟବର୍ତ୍ତୀ ମହାନଦୀରେ ଗୋଟିଏ ସେତୁ ନିକଟରେ ନିର୍ମାଣ କରାଯାଇଛି । ମୃତ୍ତିକା
ସଂରକ୍ଷଣ, ବନୀକରଣ, ଜଳାଶୟ ଖନନ, ମତ୍ସ୍ୟସମ୍ପଦର ଉନ୍ନତିକରଣ ଆଦି ବିଭିନ୍ନ କାର୍ଯ୍ୟକ୍ରମ ଚାଲୁ ରହିଛି । ପର୍ଯ୍ୟଟକମାନଙ୍କ ସୁବିଧା ପାଇଁ ପାର୍କିଂ ସ୍ଥଳର ବିକାଶ ତଥା ଉନ୍ନତିକରଣ ସହିତ ଟିକେଟ୍ କାଉଣ୍ଟର, ଉଭୟ ମହିଳା ଓ ପୁରୁଷ ଶୌଚାଳୟ, ପ୍ରତୀକ୍ଷାଳୟ, ପାନୀୟ ଜଳ ବ୍ୟବସ୍ଥା, ଶିଶୁମାନଙ୍କର ଖେଳ ଉଦ୍ୟାନ ନିର୍ମାଣ କରାଯାଇଛି । ପର୍ଯ୍ୟଟନ ବିଭାଗର ସହଭାଗିତାରେ ଏହି ହ୍ରଦର ଦକ୍ଷିଣ ପାଶ୍ୱର୍ରେ ଥିବା ବିଷ୍ଣୁପୁର ମୌଜାରେ ୪୦ କୋଟି ୬୫ ଲକ୍ଷ ଟଙ୍କା ବିନିଯୋଗରେ ଗୋଟିଏ ବୃହତ ପର୍ଯ୍ୟଟନ ପ୍ରକଳ୍ପର ପରିକଳ୍ପନା କରାଯାଇ ଜମି ଅଧିଗ୍ରହଣ କାର୍ଯ୍ୟକ୍ରମ ଜାରିରହିଛି । ଏହାଦ୍ୱାରା ପର୍ଯ୍ୟଟନ ସହିତ ସ୍ଥାନୀୟ ଜନସାଧାରଣଙ୍କର ଜୀବନ ଜୀବିକାରେ ଉନ୍ନତି ସାଧିତ ହେବ । ଅଂଶୁପା ହ୍ରଦର ଉନ୍ନତିକରଣ ପାଇଁ ସମୁଦାୟ ୧ କୋଟି ୯୭ ଲକ୍ଷ ଟଙ୍କାର ବ୍ୟୟବରାଦ କରାଯାଇ ଅଦ୍ୟାବଧି ଦଳ ସଫେଇ, ପଙ୍କ ଉଦ୍ଧାର, ବିଭିନ୍ନ ନିର୍ମାଣ କାର୍ଯ୍ୟ, ମତ୍ସ୍ୟ ସମ୍ପଦର ବିକାଶ, ସଚେତନତା କାର୍ଯ୍ୟକ୍ରମ କରାଯାଇଛି । ଅଂଶୁପାକୁ ଏକ ଆକର୍ଷଣୀୟ ପର୍ଯ୍ୟଟନ କେନ୍ଦ୍ରରେ ପରିଣତ କରିବା ପାଇଁ ଜଙ୍ଗଲ ଓ ପରିବେଶ ବିଭାଗ ତରଫରୁ ସମସ୍ତ ଉଦ୍ୟମ ଜାରି ରହିଛି । ୨୦୧୯ ମସିହା ଅଗଷ୍ଟ ୧୭ ତାରିଖରେ ମୋ ଅଧ୍ୟକ୍ଷତାରେ ରାଜ୍ୟ ଆର୍ଦ୍ରଭୂମି କର୍ତ୍ତୃପକ୍ଷ ବେଠକ ଅନୁଷ୍ଠିତ ହୋଇଥିଲା । ଏଥିରେ ଅଂଶୁପା ହ୍ରଦର ଉନ୍ନତି ପାଇଁ ୨୧ କୋଟି ୨୩ ଲକ୍ଷ ଟଙ୍କା ବ୍ୟୟବରାଦରେ ଏକ ୫ ବର୍ଷିଆ ସମନ୍ୱିତ ପରିଚାଳନା ଯୋଜନା ଚିଲିକା ଉନ୍ନୟନ କର୍ତ୍ତୃପକ୍ଷ ପକ୍ଷରୁ ପ୍ରସ୍ତୁତ ହୋଇ କେନ୍ଦ୍ର ସରକାରଙ୍କୁ ପ୍ରସ୍ତାବ
ଦିଆଯାଇଛି । କେନ୍ଦ୍ର ସରକାରଙ୍କଠାରୁ ଏହି ଅର୍ଥରାଶି ଆସିଲେ ସମନ୍ୱିତ ପରିଚାଳନା ଯୋଜନା ଅନୁଯାୟୀ ଅଂଶୁପା ହ୍ରଦର ବ୍ୟାପକ ଉନ୍ନତି ସାଧିତ ହେବ । ଅଂଶୁପା ହ୍ରଦର ସମୁଚିତ ସଂରକ୍ଷଣ ଓ ଉତ୍କର୍ଷ ସାଧନ ଦିଗରେ ଅର୍ଥ କୌଣସି ଅନ୍ତରାୟ ହେବ ନାହିଁ । ଏହାଦ୍ୱାରା କଟକ ଜିଲ୍ଲାର ସର୍ବୋତ୍କୃଷ୍ଟ ପର୍ଯ୍ୟଟନସ୍ଥଳୀ ରୂପେ ଏହି ହ୍ରଦ ସାବ୍ୟସ୍ତ ହେବ । ଏହି ହ୍ରଦକୁ ସରସ, ସୁନ୍ଦର କରିବା ଓ ଏହା ପର୍ଯ୍ୟଟକମାନଙ୍କ ପାଇଁ ଯେପରି ଆକର୍ଷଣର କେନ୍ଦ୍ରବିନ୍ଦୁ ହେବ, ରାଜ୍ୟ ସରକାରଙ୍କ ପକ୍ଷରୁ ଏଥିପାଇଁ ସମସ୍ତ ଉଦ୍ୟମ କରାଯିବ ବୋଲି ଶ୍ରୀ ଆରୁଖ ପ୍ରକାଶ କରିଥିଲେ । ସୂଚନାଯୋଗ୍ୟ ଯେ, ଗତ ୨୦୨୦ ଅପ୍ରେଲ ମାସରୁ ଅଂଶୁପା ହ୍ରଦର ୱାଚ୍ ଟାୱାରର ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା ଓ ଡିସେମ୍ବର ମାସରେ ଏହା ସମାପ୍ତ ହୋଇଥିଲା । ୩୫ ଲକ୍ଷ ଟଙ୍କା ବିନିଯୋଗ କରାଯାଇ ଏହି ୱାଚ୍ ଟାୱାର ନିର୍ମାଣ କରାଯାଇଛି । ଅଂଶୁପା ହ୍ରଦର ସଂରକ୍ଷଣ ଓ ପରିଚାଳନା ଦିଗରେ ଏହା ମହତ୍ତ୍ୱପୂର୍ଣ୍ଣ ସାବ୍ୟସ୍ତ ହେବ । ଅଂଶୁପା ଉନ୍ନୟନ କମିଟିର ସଭାପତି ଶ୍ରୀ ଗତିକୃଷ୍ଣ ସ୍ୱାଇଁ ସ୍ୱାଗତ ଭାଷଣ ଦେଇଥିଲେ । ବାଙ୍କୀର ଉପଜିଲ୍ଲାପାଳ ଶ୍ରୀ ରଞ୍ଜନ କୁମାର ଜେନା, ଚିଲିକା ଉନ୍ନୟନ କର୍ତ୍ତୃପକ୍ଷଙ୍କ ମୁଖ୍ୟ କାର୍ଯ୍ୟନିର୍ବାହୀ ଶ୍ରୀ ସୁଶାନ୍ତ
ନନ୍ଦ, ବାଙ୍କୀ ବିଧାୟକ ଶ୍ରୀ ଦେବୀରଞ୍ଜନ ତି୍ରପାଠୀ, ବାଙ୍କୀର ପୂର୍ବତନ ବିଧାୟକ ଶ୍ରୀ ପ୍ରଭାତ କୁମାର ତି୍ରପାଠୀ ପ୍ରମୁଖ ଅଂଶୁପା ହ୍ରଦର ସୌନ୍ଦର୍ଯ୍ୟକରଣ ଉପରେ ଗୁରୁତ୍ୱାରୋପ କରିଥିଲେ । ଜିଲ୍ଲା ପରିଷଦ ସଦସ୍ୟ ଶ୍ରୀ ମାନସ ମହାପାତ୍ର ଧନ୍ୟବାଦ ଦେଇଥିଲେ ।
ଅଂଶୁପା ୱାଚ୍ ଟାୱାର ଲୋକାର୍ପିତ
