ଅଙ୍ଗନବାଡ଼ି କର୍ମୀ ଓ ସହାୟିକାଙ୍କ ବୈଠକ ଅନୁଷ୍ଠିତ
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲାର ୮ଟି ବ୍ଲକ ମଧ୍ୟରୁ ୩ଟି ବ୍ଲକରେ ଅଙ୍ଗନବାଡ଼ି ଛାତ୍ରଛାତ୍ରୀଙ୍କ ପୋଷାକ କିଣାରେ ଅନିୟମିତତା ହୋଇଥିବା ଅଙ୍ଗନବାଡ଼ି କର୍ମଚାରୀ ସଂଘ ଅଭିଯୋଗ କରିଛି । ସୂଚନାନୁସାରେ, ବିଜୁ ଶ୍ରମିକ ସାମ୍ମୁଖ୍ୟ ସହ ସହବନ୍ଧିତ ଅଙ୍ଗନବାଡ଼ି କର୍ମୀ ଏବଂ ସହାୟିକା ସାମ୍ମୁଖ୍ୟ ଜିଲ୍ଲା କମିର ଏକ ଜରୁରୀ ବୈଠକ ଜିଲ୍ଲା କାର୍ଯ୍ୟାଳୟଠାରେ ଅନୁଷ୍ଠିତ ହୋଇଯାଇଛି । ଅଙ୍ଗନବାଡ଼ି ସଭାନେତ୍ରୀ ଜ୍ୟୋତ୍ସାମୟୀ ପଣ୍ଡାଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ରାଜ୍ୟ ବିଜୁ ଶ୍ରମିକ ସାମ୍ମୁଖ୍ୟ ସହ ସଂପାଦକ ଶ୍ରୀକାନ୍ତ ପଟ୍ଟନାୟକ ଯୋଗ ଦେଇ ବିଭିନ୍ନ ସମସ୍ୟା ସଂମ୍ପର୍କରେ ଆଲୋଚନା କରିଛନ୍ତି । ଏହି ଅବସରରେ ଶ୍ରୀଯୁକ୍ତ ପଟ୍ଟନାୟକ ଯୋଗ ଦେଇ ବ୍ଲକ ସ୍ତରିୟ କମିଟି ଗଠନକୁ ଗୁରୁତ୍ୱ ଦେଇଛନ୍ତି । ଅନ୍ୟପକ୍ଷେ, ଗତକାଲିର ଆଲୋଚନା ସମୟରେ ଜିଲ୍ଲାର ୮ଟି ବ୍ଲକ ମଧ୍ୟରୁ ୫ଟି ବ୍ଲକରେ ପ୍ରାକ୍ ବିଦ୍ୟାଳୟ ଶିଶୁଙ୍କ ପୋଷାକ କିଣିବା ପାଇଁ ଅଙ୍ଗନବାଡ଼ି କର୍ମୀଙ୍କୁ ଅନୁମତି ଦିଆ ଯାଇଥିବା ବେଳେ ଅନ୍ୟ ୩ଟି ବ୍ଲକରେ ସ୍ୱଂୟ ସହାୟକ ଗୋଷ୍ଠୀଙ୍କୁ ପୋଷାକ ସିଲେଇ କରି ଯୋଗାଣ କରିବା ଦାୟିତ୍ୱ ଦିଆଯାଇଥିବା ଆଲୋଚନା ହୋଇଛି । ଖଣ୍ଡପଡ଼ା, ଦଶପଲ୍ଲା ଓ ଓଡ଼ଗାଁ ବ୍ଲକରେ ସ୍ୱୟଂ ସହାୟିକା ଗୋଷ୍ଠୀଙ୍କୁ ପୋଷାକ ସିଲେଇ କରି ଯୋଗାଣ କରିବାକୁ ଟେଣ୍ଡର ଦିଆଯାଇଛି । ମାତ୍ର ଏହି ବ୍ଲକରେ ଟେଣ୍ଡର ନେଇଥିବା ଗୋଷ୍ଠୀ ପୋଷାକ ସିଲେଇ ନକରି ବାହାରୁ ଶସ୍ତା ପୋଷାକ କିଣି ଯୋଗାଣ କରୁଥିବା ନେଇ ଜିଲ୍ଲା କମିଟି ଅଭିଯୋଗ କରିଛି । ଯାହାକୁ ନେଇ ଜିଲ୍ଲା କମିଟି ଆଜି ସମାଜମଙ୍ଗଳ ଅଧିକାରୀଙ୍କୁ ଏକ ଦାବିପତ୍ର ପ୍ରଦାନ କରିଥିବା ଜଣାଯାଇଛି । ଏଥିସହିତ ସୁପରଭାଇଜରମାନେ ଦୀର୍ଘଦିନ ଧରି ଗୋଟିଏ ସ୍ଥାନରେ ଆସ୍ଥାନ ଜମାଇଥିବାରୁ ଏଭଳି ବହୁ ଅନିୟମିତତା ହେଉଥିବା ମଧ୍ୟ ଅଭିଯୋଗ କରାଯାଇଛି । ଆଜିର କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସଂପାଦିକା ସୁଶ୍ରୀ ସଂଗୀତା ମହାପାତ୍ର, କୋଷାଧ୍ୟକ୍ଷ ଗୀତାଞ୍ଜଳୀ ସେଠୀ, ଉପଦେଷ୍ଟା ବିମୋଦିନୀ ଦେବୀ ଏବଂ ଅନେକ ଅଙ୍ଗନବାଡ଼ି କର୍ମୀ ଯୋଗ ଦେଇଥିଲେ ।
