ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଭାପୁର ବ୍ଳକ ଫତେଗଡ଼ ଗ୍ରାମର ବଡ଼ଗୌଡ଼ସାହିର ମିନି ଅଙ୍ଗନବାଡ଼ି କର୍ମୀ ସୁନୀତା ନାୟକ(୨୫) ଗତକାଲି ନିଆଁରେ ପୋଡ଼ି ହୋଇ ଯାଇଥିଲେ। ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ସୁନୀତା ରବିବାର ଅପରାହ୍ନ ୩ ଟା ସମୟରେ ରୋଶେଇ କରିବା ସମୟରେ ନିଆଁରେ ପୋଡିହୋଇ ଗୁରୁତର ହୋଇଥିଲେ । ପ୍ରଥମ ଭାପୁର , ଏହାପରେ ଭୁବନେଶ୍ୱର ଏମସ ଓ ପରେ ଏକ ଘରୋଇ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ରାତି ୨ ଟାରେ ତାଙ୍କର ମୃତ୍ୟୁ ହୋଇଥିଲା। ତାଙ୍କ ଶବ ବ୍ୟବଛେଦ ପରେ ସୋମବାର ଅପରାହ୍ନରେ ଫତେଗଡ଼ ଶ୍ମଶାନରେ ଶେଷ କୃତ୍ୟ କରାଯାଇଛି। ତାଙ୍କ ମୃତ୍ୟୁକୁ ନେଇ ରାଜ୍ୟ ବିଜୁ ଶ୍ରମିକ ସାମ୍ମୁଖ୍ୟ ରାଜ୍ୟ ସହ ସଂପାଦକ ଶ୍ରୀକାନ୍ତ ପଟ୍ଟନାୟକ ଏବଂ ଅଙ୍ଗନବାଡ଼ି କର୍ମୀ ସହାୟିକା ସାମ୍ମୁଖ୍ୟ ସଂଘ ସଭାପତି ଜ୍ୟୋତ୍ସାମୟୀ ପଣ୍ଡା ଶୋକ ବ୍ୟକ୍ତ କରିଛନ୍ତି ।
