ବାଲେଶ୍ୱର, (ବାଘୁଆବାର୍ତ୍ତା): କ୍ଷେପଣାସ୍ତ୍ର ଆକାଶର ନୂତନ ସଂସ୍କରଣ ‘ଆକାଶ ପ୍ରାଇମ’ ସଫଳ ପରୀକ୍ଷଣ ଚାନ୍ଦିପୁର ପ୍ରତିରକ୍ଷା ଅନୁସନ୍ଧାନ ଓ ବିକାଶ ସଙ୍ଗଠନ (ଡିଆର୍ଡିଓ) ପକ୍ଷରୁ କରାଯାଇଛି । ପ୍ରଥମଥର ସ୍ୱଦେଶୀ ଜ୍ଞାନ କୌଶଳରେ ନିର୍ମିତ ଏହି ସଫଳ ପରୀକ୍ଷଣ ସହ ବିଶ୍ୱ ପ୍ରତିରକ୍ଷା କ୍ଷେତ୍ରରେ ଭାରତ ଦବ୍ଦବା ଜାରି ରଖିଛି । ଆଇଟିଆରର ୩ ନମ୍ବର ଲଞ୍ଚ ପ୍ୟାଡ୍ରୁ ସୋମବାର ଅପରାହ୍ଣ ସାଢ଼େ ୪ଟାରେ ଏହି ପରୀକ୍ଷଣ କରାଯାଇଥିଲା । ଏହି କ୍ଷେପଣାସ୍ତ୍ର ନିଜର ଟାର୍ଗେଟ୍କୁ ଲକ୍ଷ୍ୟଭେଦ କରିଥିଲା । ଆକାଶ ପ୍ରାଇମ ଭୂପୃଷ୍ଠରୁ ଆକାଶମାର୍ଗକୁ ଲକ୍ଷ୍ୟଭେଦ କରିପାରୁଥିବା ମଧ୍ୟମ ଦୂରଗାମୀ କ୍ଷେପଣାସ୍ତ୍ର । ଏହି କ୍ଷେପଣାସ୍ତ୍ର ରେଡିଓ ଫ୍ରିକ୍ୟୁଏନ୍ସିକୁ ବ୍ୟବହାର କରି ବିଭିନ୍ନ ପାଗ, ବିଭିନ୍ନ ତାପମାତ୍ରାରେ ଏହା ଶତ୍ରୁପକ୍ଷର ଯୁଦ୍ଧ ଜାହାଜର ଗତିରୋଧ ସହ ଧ୍ୱଂସ କରିବାର କ୍ଷମତା ରଖିଛିଫ ଏଥିରେ ଆଣବିକ ଯୁଦ୍ଧାସ୍ତ୍ରକୁ ବ୍ୟବହାର କରାଯାଇପାରିବ । ୨୦୨୩ ସୁଦ୍ଧା ଏହାକୁ ସେନାରେ ସାମିଲ କରାଯିବ । ପ୍ରଥମ ପରୀକ୍ଷଣରେ ସଫଳ ହୋଇଥିବାରୁ ପରବର୍ତ୍ତୀ ସମୟରେ ଏହାର ଉନ୍ନତ ସଂସ୍କରଣ କରାଯିବା ନେଇ ଡିଆର୍ଡିଓ ପକ୍ଷରୁ ସୂଚନା ଦିଆଯାଇଛି । ‘ଆକାଶ ପ୍ରାଇମ’ର ସଫଳ ପରୀକ୍ଷଣ ପରେ ରକ୍ଷାମନ୍ତ୍ରୀ ରାଜନାଥ ସିଂ, ଡିଆର୍ଡିଓ ଚେୟାରମ୍ୟାନ ଡ. ଜି. ସତୀଶ ରେଡ୍ଡୀ ଏହି ପରୀକ୍ଷଣରେ ସାମିଲ ସମସ୍ତ କର୍ମକର୍ତ୍ତାଙ୍କୁ ଅଭିନନ୍ଦନ ଜଣାଇଛନ୍ତି । ଏହି ପରୀକ୍ଷଣ ସହ ବିଶ୍ୱ ପ୍ରତିରକ୍ଷା କ୍ଷେତ୍ରରେ ଭାରତ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି ବୋଲି ଶ୍ରୀ ସିଂ ତାଙ୍କ ପ୍ରତିକ୍ରିୟାରେ କହିଛନ୍ତି ।
