ଚୌଦ୍ୱାର, (ବାଘୁଆବାର୍ତ୍ତା): ଅଜଣା ଗାଡିକୁ ଧକ୍କା ଦେଲା ଡାଲା ଅଟୋ । ଏହି ଭୟଙ୍କର ଦୁର୍ଘଟଣା ପରେ ଗାଡି ଭିତରେ ଚିପି ହୋଇ ଚାଲିଯାଇଛି ହେଲ୍ପରଙ୍କ ଜୀବନ । ବର୍ତ୍ତମାନ ସୁଦ୍ଧା ମୃତକଙ୍କ ପରିଚୟ ମିଳିନଥିବା ବେଳେ ପୋଲିସ ତଦନ୍ତ ଜାରି ରଖିଛି ।କଟକ ଚୌଦ୍ୱାରା ନିକଟ ଟୋଲ୍ଗେଟ୍ ପାଖରେ ଏହି ମର୍ମନ୍ତୁଦ ଦୁର୍ଘଟଣା ଘଟିଛି । ଖବର ଅନୁଯାୟୀ, ମଙ୍ଗଳବାର ଦିନ ସକାଳୁ ଛତିଆରୁ କଟକ ଅଭିମୁଖେ ଆସୁଥିଲା ଏକ ଡାଲା ଅଟୋ । ଅଧାରାସ୍ତାରେ ଏକ ଅଜଣା ଗାଡିକୁ ପଛରୁ ଧକ୍କା ଦେଇଥିଲା ଡାଲା ଅଟୋ । ଯାହାଫଳରେ ଗାଡିରେ ଭିତରେ ଚିପି ହୋଇ ହେଲ୍ପରଙ୍କର ମୃତ୍ୟୁ ହୋଇଥିବା ଜଣାପଡିଛି । ସେପଟେ ଦୁର୍ଘଟଣା ସଂପର୍କରେ ଖବର ପାଇ ରାଜପଥ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ଆଉ ଅଗ୍ନିଶମ ବାହିନୀକୁ ଖବର ଦେଇଥିଲା । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଗାଡିର ଆଗ ଭାଗକୁ କାଟି ହେଲ୍ପର ଜଣଙ୍କୁ ଉଦ୍ଧାର କରିଥିଲେ । ଏହାପରେ ବ୍ୟବଚ୍ଛେଦ ନିମନ୍ତେ କଟକ ବଡ଼ ମେଡିକାଲକୁ ପଠାଇଛି । ଦୁର୍ଘଟଣା ପରେ ଘଟଣାସ୍ଥଳରୁ ଅଟୋ ଚାଳକ ଫେରାର ହୋଇଯାଇଥିବା ସୂଚନା ମିଳିଛି । ବାକି ପୋଲିସ ଘଟଣାର ଛାନ୍ଭିନ୍ ଜାରି ରଖିଛି ।
