ଜଳେଶ୍ୱର (ବାଘୁଆବାର୍ତ୍ତା): ଜଳେଶ୍ୱର ୫୭ ନମ୍ବର ରାଜ୍ୟ ରାଜପଥ ନିକଟରେ ସିରିଜ ଦୁର୍ଘଟଣା ଘଟିଛି। ପ୍ରଥମେ ଏକ ଡମ୍ପର ଓ ଧାନବୋଝେଇ ଟାଟା ଏସ୍ଇ ମୁହାଁମୁହିଁ ଧକ୍କା ହେବା ପରେ ପଛଆଡ଼ୁ ଡମ୍ପରକୁ ପିଟିଲା ଅଲ୍ଟୋ କାର। ଏହିଦୁର୍ଘଟଣାରେ ଦୁଇ ଜଣଙ୍କର ମୃତ୍ୟୁ ହୋଇଛି। ଖବର ଅନୁସାରେ, ଜଳେଶ୍ୱର ଥାନା ଅନ୍ତର୍ଗତ ଅମ୍ବାଳିଅଠା ନିକଟରେ ପ୍ରଥମେ ଏକ ଡମ୍ପର ଓ ଧାନ ବୋଝେଇ ଟାଟା ଏସ୍ଇ ମଧ୍ୟରେ ମୁହାଁ ମୁହିଁ ଧକ୍କା ହୋଇଥିଲା। ଏହାପରେ ଚନ୍ଦନେଶ୍ୱର ପଟୁ ଆସୁଥିବା ଏକ ଅଲ୍ଟୋ କାର୍ ଆସି ସିଧା ଡମ୍ପରେ ପିଟି ହୋଇଥିଲା। ଏହି ଦୁର୍ଘଟଣାରେ ଟାଟା ଏସିଇ ଡ୍ରାଇଭର ଓ ହେଲ୍ପରଙ୍କ ମୃତ୍ୟୁ ଘଟିଛି। ମୃତକମାନେ ହେଉଛନ୍ତି ଜଳେଶ୍ୱରର ବ୍ଲକ ଅନ୍ତର୍ଗତ ଆରୁହା ଗ୍ରାମର ସିଦ୍ଧେଶ୍ୱର ବେହେରା ଓ କୁଳମଣି ବେହେରା। ଉଭୟ ସମ୍ପର୍କରେ କକା ଓ ପୁତୁରା ବୋଲି ଜଣାପଡ଼ିଛି। ସିରିଜ୍ ଦୁର୍ଘଟଣା ପରେ ଉତ୍ତ୍ୟକ୍ତ ଲୋକମାନେ ଡମ୍ପର ଡ୍ରାଇଭରର ହାତ ଗୋଡ଼ ବାନ୍ଧି ଦବା ସହ ରାସ୍ତା ଅବରୋଧ କରିଥିଲେ। ଘଟଣା ସ୍ଥଳରେ ଉତ୍ତେଜନା ପ୍ରକାଶ ପାଇବା ପରେ ଖବର ପାଇ ଜଳେଶ୍ୱର ପୋଲିସ ପହଞ୍ଚି ଡ୍ରାଇଭରକୁ ଉଦ୍ଧାର କରିବା ତଦନ୍ତ ଜାରି ରଖିଛି।
ଡମ୍ପର ଓ ଟାଟା ଗାଡି ମୁହାଁମୁହିଁ, ପଛରୁ ପିଟିଲା କାର, ଦଦା ଓ ପୁତୁରା ମୃତ
