ଆଡିସନାଲ୍ CSOଙ୍କ ଗାଡି ଧକ୍କାରେ ବାଇକ୍ ଚାଳକ ମୃତ

କେନ୍ଦୁଝର, (ବାଘୁଆବାର୍ତ୍ତା): କେନ୍ଦୁଝର ଅତିରିକ୍ତ ସିଭିଲ ସପ୍ଲାୟ ଅଫିସର ବ୍ରଜ କିଶୋର ମାରାଣ୍ଡିଙ୍କ ଗାଡି ସହ ମୁହାଁମୁହିଁ ଧକ୍କା ହେଲା ବାଇକ୍ । ଦୁର୍ଘଟଣାରେ ଚାଲିଗଲା ବାଇକ୍ ଆରୋହୀଙ୍କ ଜୀବନ । ମୃତକ ମୟୂରଭଞ୍ଜ ଜିଲ୍ଲା ରରୁଆଁ ଥାନା ଘାଗି ଗ୍ରାମର ରାଜେନ୍ଦ୍ର ବେହେରା ବୋଲି ଜଣା ପଡ଼ିଛି । କେନ୍ଦୁଝର ଜିଲ୍ଲା ଉଦୟପୁର ସାହାରପଡା ରାସ୍ତାର ଚାତରପାଣି ନିକଟରେ ଏଭଳି ଘଟଣା ଘଟଣା ଘଟିଛି । ସୂଚନା ମୁତାବତ, ସାହାରପଡା ବ୍ଲକରେ ହୋଉଥିବା ଜିଲ୍ଲାପାଳଙ୍କ ଜନ ଅଭିଯୋଗ ଶୁଣାଣି କାର୍ଯ୍ୟକ୍ରମକୁ କେନ୍ଦୁଝର ଅତିରିକ୍ତ ସିଭିଲ ସପ୍ଲାୟ ଅଫିସର ବ୍ରଜ କିଶୋର ମାରାଣ୍ଡି ଏକ ବୋଲେରୋ ଯୋଗେ ଯାଉଥିଲେ । ରାସ୍ତାରେ ଯିବାବେଳେ ଉଦୟପୁର ସାହାରପଡା ରାସ୍ତାର ଚାତରପାଣି ନିକଟରେ ଏକ ବାଇକ୍ ସହ ମୁହାଁମୁହିଁ ଧକ୍କା ହୋଇଥିଲା । ଫଳରେ ଯୁବକ ଜଣକ ଗୁରୁତର ଅବସ୍ଥାରେ ରାସ୍ତା ଉପରେ ପଡ଼ି ରହିଥିଲେ । ଦୁର୍ଘଟଣା ପରେ ଘଟଣା ସ୍ଥଳରୁ ଅତିରିକ୍ତ ସିଭିଲ ସପ୍ଲାୟ ଅଫିସର ବ୍ରଜକିଶୋର ମାରାଣ୍ଡି ମାନବିକତା ଭୁଲି ଅନ୍ୟ ଗାଡିରେ ଚାଲି ଯାଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ବାଇକ୍ ଅରୋହୀଙ୍କୁ ଉଦ୍ଧାର କରି ୧୦୮ ସହାୟତାରେ ପାଟଣା ମେଡିକାଲକୁ ନେଇଥିଲେ । ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ଏନେଇ ଖବର ପାଇବା ପରେ ଘଟଣା ସ୍ଥଳରେ ପାଟଣା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।