ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ ଜିଲ୍ଲା ଦଶପଲ୍ଲା ବଜାରରେ ଗତକାଲି ରାତିରେ ଏକ ଅଟୋ ଦୁର୍ଘଟଣା ଗ୍ରସ୍ତ ହୋଇଥିବା ବେଳେ ଅଟୋ ଚାଳକଙ୍କ ସନ୍ଦେହ ଜନକ ମୃତ୍ୟୁ ଘଟିଥିବା ଜଣାଯାଇଛି । ସୂଚନାନୁସାରେ, ଗତକାଲି କଳସାଖମଣ ଅଂଚଳର ଆର୍ତ୍ତତ୍ରାଣ ସାହୁ ତାଙ୍କ ଅଟୋ ଧରି ଦଶପଲ୍ଲା ବଜାରକୁ ଆସିଥିଲେ । କୈାଣସି କାମରେ କୁଟିବାରୀ ଗ୍ରାମର ପାଣୁ ଦିହୁଡ଼ୀ ତାଙ୍କ ସହ ଦଶପଲ୍ଲା ଆସିଥିବା ବେଳେ ସେମାନେ କାମ ସାରି ରାତି ୧୦ଟା ବେଳକୁ ଫେରୁଥିଲେ । ରାତିରେ ଦଶପଲ୍ଲାରେ ଥିବା ଏକ ଢାବାରେ ଖାଆପିଅ କରି ଉଭୟ ଫେରୁଥିବା ସମୟରେ ହିରୋ ସୋରୁମଠାରେ ଅଟୋ ଦୁର୍ଘଟଣା ଗ୍ରସ୍ତ ହୋଇଥିବା ଦେଖିବାକୁ ମିଳିଛି । ଦୁର୍ଘଟଣା ଗ୍ରସ୍ତ ଗାଡ଼ି ଭିତରୁ ଆର୍ତ୍ଥତ୍ରାଣଙ୍କ ମୃତଦେହ ଉଦ୍ଧାର କରାଯାଇଥିବା ବେଳେ ତାଙ୍କ ଗଳା କଟା ଯାଇଥିବା ଦେଖିବାକୁ ମିଳିଛି । ଅନ୍ୟପକ୍ଷେ, ତାଙ୍କ ସହ ଆସିଥିବା ପାଣୁଙ୍କର କୈାଣସି ଖୋଜ ଖବର ନଥିବା ଏବଂ ଗଳା କଟା ଯାଇଥିବା କାରଣକୁ ନେଇ ଆର୍ତ୍ତତ୍ରାଣଙ୍କୁ ହତ୍ୟା କରାଯାଇଥିବା ସନ୍ଦେହ ସୃଷ୍ଟି ହୋଇଛି । ଏହି ଘଟଣାରେ ଦଶପଲ୍ଲା ପୁଲିସ ଏକ ମାମଲା ରୁଜୁ କରିବା ସହ ଶବ ବ୍ୟବଚ୍ଛେଦ କରି ପରିବାରକୁ ହସ୍ତାନ୍ତର କରିଛି । ଅନ୍ୟପକ୍ଷେ, ଏହା ଦୁର୍ଘଟଣା ଜନିତ ମୃତ୍ୟୁ ନା ହତ୍ୟାକାଣ୍ଡ ସେ ନେଇ ପୁଲିସ ଖୋଳତାଡ଼ କରୁଥିବା ଜଣାଯାଇଛି ।
