ପାଟଣା (ବାଘୁଆବାର୍ତ୍ତା): କେନ୍ଦୁଝର ଜିଲ୍ଲା ପାଟଣା-କନ୍ଦେଇପଶି ରାସ୍ତାରୁ ତୁରୁମୁଙ୍ଗା ଥାନା କନ୍ଦେଇପଶି ପେଟ୍ରୋଲପମ୍ପ ନିକଟରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ମଙ୍ଗଳବାର ଅପରାହ୍ନରେ ବାଇକ ଦୁର୍ଘଟଣା ଘଟି ମାଆର ମୃତ୍ୟୁ ହୋଇଥିବା ବେଳେ ପୁଅ ଆହାତ ହୋଇଛି । ମୃତକ ପାଟଣା ଥାନା ଟାଙ୍ଗରପଡ଼ା ଗ୍ରାମର ବ୍ରଜବନ୍ଧୁ ସାହୁଙ୍କ ସ୍ତ୍ରୀ ବାସନ୍ତୀ ସାହୁ ହୋଇଥିବା ଜଣାପଡିଛି । ସୂଚନା ଅନୁଯାୟୀ, ବାସନ୍ତୀଙ୍କ ସ୍ୱାସ୍ଥ୍ୟ ଅବସ୍ଥା ଭଲ ନଥିବାରୁ ପୁଅ ସୁଦାମ ଚରଣ ସାହୁଙ୍କ ସହ କେନ୍ଦୁଝର ମେଡିକାଲକୁ ସ୍ୱାସ୍ଥ୍ୟ ପରୀକ୍ଷା କରିବାକୁ ଯାଇଥିଲେ । ସ୍ୱାସ୍ଥ୍ୟ ପରୀକ୍ଷା ସାରି ବାଇକରେ ଫେରୁଥିବା ବେଳେ ରାସ୍ତା ଉପରେ ବାଇକ ଆଗକୁ ଛେଳି ପଶିଆସବାରୁ ଦୁର୍ଘଟଣା ଘଟିଥିଲା । ଫଳରେ ବାଇକ ପଛରେ ବସିଥିବା ବାସନ୍ତୀ ଗାଡ଼ିରୁ ଛିଟିକି ପଡିବାରୁ ପିଚୁ ରୋଡ ଉପରେ ତାଙ୍କର ମୁଣ୍ଡ ବାଡେଇ ହୋଇ ଯାଇଥିଲା । ପ୍ରବଳ ରକ୍ତସ୍ରାବ ହେବା ହେତୁ ସେ ଗୁରୁତର ହୋଇ ପଡିଥିଲେ । ସେହି ଅବସ୍ଥାରେ ତାଙ୍କୁ ଆମ୍ବୁଲାନ୍ସ ଯୋଗେ କେନ୍ଦୁଝର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ ହେଁ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି । ଏନେଇ ତୁରୁମୁଙ୍ଗା ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି । ବାସନ୍ତୀଙ୍କ ମୃତ୍ୟୁକୁ ନେଇ ଟାଙ୍ଗରପଡା ଗ୍ରାମରେ ଶୋକର ଛାୟା ଖେଳିଯାଇଛି ।
