ଦୁଇ ବାଇକ ମୁହାଁମୁହିଁ ଧକ୍କା ଫଳରେ ଜଣେ ମୃତ ଓ ତିନି ଗୁରୁତର

ନୂଆପଡା, (ବାଘୁଆବାର୍ତ୍ତା): ନୂଆଁଖାଇ ବାସୀରେ ଅଘଟଣ। ସଦର ବ୍ଲକ ଭଇଁସାତାଲ ପଂଚାୟତ ଭାଲୁକନା ଓ ଟଙ୍ଗୋପାଣି ଗାଁ ମଝି ଛକରେ ଦୁଇ ବାଇକ୍ ମୁହାଁମୁହିଁ ଧକ୍କା ହୋଇଛନ୍ତି। ଦୁର୍ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ୩ ଜଣ ଗୁରୁତର ହୋଇଛନ୍ତି। ସମସ୍ତଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବୁର୍ଲା ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ଆଜି ପୂର୍ବାହ୍ନରେ ସଦର ବ୍ଲକ ମୁଢେଲା ଗାଁର ଉତ୍ତମ ମାଝି ଓ ମଦନ ମାଝୀ ଟଙ୍ଗୋପାଣି ଗାଁ ପଟେ କୌଣସି କାମରେ ଯାଉଥିଲେ । ଅନ୍ୟପଟେ ମହତମତରା ଗାଁର କୁରେନସିଂ ମାଝୀ(୩୫) ଓ ଚୁମାନ ଦୁର୍ଗା(୨୭) ଭାଲୁକନା ଗାଁ ପଟେ କୌଣସି କାମରେ ଆସୁଥିଲେ । ଏହି ସମୟରେ ସଦର ବ୍ଲକ ଭଇଁସାତାଲ ପଂଚାୟତ ଭାଲୁକନା ଓ ଟଙ୍ଗୋପାଣି ଗାଁ ମଝି ଛକରେ ଦୁଇଟି ବାଇକ ମୁହାଁମୁହିଁ ଧକ୍କା ହୋଇଥିଲା । ଫଳରେ ୪ ଜଣ ବାଇକ ଆରୋହି ଛିଟିକି ପଡ଼ିଥିଲେ । ଘଟଣାସ୍ଥଳରେ ଉତ୍ତମ ମାଝୀଙ୍କ ମୁଣ୍ଡରେ ଗଭୀର କ୍ଷତ ଲାଗିବାରୁ ମୃତ୍ୟୁ ହୋଇଥିଲା । ସ୍ଥାନୀୟ ଲୋକେ ଘଟଣା ସ୍ଥଳରେ ପହଞ୍ଚି ମଦନ, କୁରେନସିଂ ଓ ଚମନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ସ୍ଥାନୀୟ ଜିଲ୍ଳା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ତେବେ ମଦନ ମାଝୀଙ୍କ ମୁଣ୍ଡରେ ଗଭୀର କ୍ଷତ ଲାଗିଥିଲା । ମଧ୍ୟାହ୍ନରେ ମଦନଙ୍କ ସ୍ବାସ୍ଥ୍ୟବସ୍ଥା ସଙ୍କଟାପନ୍ନ ହେବାରୁ ଡାକ୍ତର ବୁର୍ଲା ବଡ଼ ମେଡିକାଲକୁ ସ୍ଥାନାନ୍ତର କରିଥିଲେ । ଏବେ କୁରେନ ସିଂ ଓ ଚମନଙ୍କ ମୁଣ୍ଡରେ ଆଘାତ ଲାଗିଥିବା ବେଳେ ଜିଲ୍ଳା ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ତେବେ ଏହି ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ଦୁର୍ଘଟଣାଗ୍ରସ୍ତ ବାଇକକୁ ପୁଲିସ ଜବତ କରି ତଦନ୍ତ ଆରମ୍ଭ କରିଥିବା ପୁଲିସ ସୂଚନା ଦେଇଛି ।