ଆହାର କେନ୍ଦ୍ର କର୍ମଚାରୀଙ୍କୁ ‘କରୋନା ଯୋଦ୍ଧା’ ଘୋଷଣା ଦାବି

ନୟାଗଡ଼, (ବାଘୁଆବାର୍ତ୍ତା) : କରୋନା ମହାମାରୀର ସଂକ୍ରମଣ ସାରା ବିଶ୍ୱବାସୀଙ୍କୁ ଆତଙ୍କିତ କରି ଦେଇଥିବା ବେଳେ ନିଜ ଜୀବନକୁ ପାଣି ଛଡ଼ାଇ ଅତ୍ୟନ୍ତ ଦାମ୍ଭିକତାର ସହ ଅଭାବୀ, ଗରୀବ ଲୋକମାନଙ୍କୁ ମାତ୍ର ୫ଟଙ୍କା ବିନିମୟରେ ଆହାର କେନ୍ଦ୍ରମାନଙ୍କରେ ଶହଶହ ଲୋକଙ୍କୁ ଖାଦ୍ୟ ଯୋଗାଉଥିବା ଆହାର କର୍ମୀମାନେ ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛନ୍ତି । ପ୍ରତ୍ୟହ ସକାଳୁ ସନ୍ଧ୍ୟା ପର୍ଯ୍ୟନ୍ତ ଦିନରାତି ଏକ କରିଦେଇଥିବା ଆହାର କର୍ମୀମାନଙ୍କୁ ରବିବାର ମଧ୍ୟ ଆହାର କେନ୍ଦ୍ର ଖୋଲା ରଖିବା ପାଇଁ ସରକାର ନିର୍ଦ୍ଦେଶ ଦେଇଛନ୍ତି । ଆହାର ଗାଡ଼ି ମାଧ୍ୟମରେ ଜିଲ୍ଲାର ବିଭିନ୍ନ କେନ୍ଦ୍ରମାନଙ୍କରେ ଆହାର କର୍ମୀମାନେ ମନରେ ଭୟ ନରଖି ଖାଦ୍ୟ ପରିବେସଣ କରିଚାଲିଛନ୍ତି । ଅନାହାରରେ କେହି ରହିବେ ନାହିଁ ଲକ୍ଷ୍ୟ ନେଇ ରାଜ୍ୟ ସରକାରଙ୍କ ପରିଚାଳିତ ଆହାର କେନ୍ଦ୍ରରେ କାର୍ଯ୍ୟକରି ଅସହାୟ ଭୋକିଲା ଲୋକଙ୍କ ପେଟକୁ ଆହାର ଯୋଗାଇ ଚାଲିଛନ୍ତି । ଏହି ଦୁର୍ଦ୍ଦିନ ସମୟରେ ଆହାରକେନ୍ଦ୍ର ମାନଙ୍କରେ ନିଷ୍ଠାପର ଭାବେ କାର୍ଯ୍ୟରତ କର୍ମୀମାନଙ୍କୁ “କରୋନା ଯୋଦ୍ଧା’ ଭାବେ ଗଣତି କରିବା ପାଇଁ ବରିଷ୍ଠ ସମାଜସେବୀ ତଥା ରୋଟାରିଆନ୍ ପ୍ରମୋଦ ପଟ୍ଟନାୟକ ଏବଂ ଶ୍ରମିକ ନେତା ଶ୍ରୀକାନ୍ତ ପଟ୍ଟନାୟକ ଜିଲ୍ଲାପାଳ ଡ. ପୋମା ଟୁଡୁଙ୍କ ଜରିଆରେ ମୁଖ୍ୟମନ୍ତ୍ରୀଙ୍କ ନିକଟକୁ ଦାବିପତ୍ର ପଠାଇଛନ୍ତି ।