ଭୁବନେଶ୍ୱର, (ବାଘୁଆବାର୍ତ୍ତା): ରାଜ୍ୟରେ ଗତ ୨୪ ଘଣ୍ଟାରେ ୧୦୨ କରୋନା ସଂକ୍ରମିତ ଚିହ୍ନଟ ହୋଇଛନ୍ତି । ସମ୍ବଲପୁରରେ ସର୍ବାଧିକ ୩୨ ସଂକ୍ରମିତ ବାହାରିଥିବା ବେଳେ ନବରଙ୍ଗପୁରରେ ୩୦ ଚିହ୍ନଟ ହୋଇଛନ୍ତି । ନୂଆପଡ଼ା ଓ ସମ୍ବଲପୁରରେ ୧୧ ଲେଖାଏଁ ରୋଗୀ ବାହାରିଛନ୍ତି । ସେହିଭଳି କଟକରେ ୮ ଓ ବରଗଡ଼ରେ ୫ ଜଣ ପଜିଟିଭି ବାହାରିଥିବା ଜଣାପଡ଼ିଛି । ଅନ୍ୟପଟେ ସୋମବାର ଠାରୁ ସାରା ଦେଶରେ ଦୁଇଦିନିଆ ମକ୍ଡ୍ରିଲ୍ ଆରମ୍ଭ ହେବ । କରୋନା ମୁକାବିଲା ଓ ପରିଚାଳନା ନେଇ ହସ୍ପିଟାଲ୍ କେତେ ପ୍ରସ୍ତୁତ ଅଛନ୍ତି, ତାହା ଉପରେ ମକ୍ଡ୍ରିଲ୍ କରାଯିବ । ଓଡ଼ିଶାରେ ସ୍ୱାସ୍ଥ୍ୟ ବିଭାଗ ଏନେଇ ବ୍ୟାପକ ପ୍ରସ୍ତୁତି କରିଛି । ହସ୍ପିଟାଲ୍ରେ କୋଭିଡ୍ ବେଡ୍ଠାରୁ ଆରମ୍ଭ କରି ଅକ୍ସିଜେନ୍ ପ୍ରସ୍ତୁତି ଉପରେ ଜୋର୍ ଦିଆଯିବ । କୋଭିଡ୍ ୱାର୍ଡ ଦାୟିତ୍ୱରେ ଥିବା ଡାକ୍ତର ଓ ନର୍ସ କେତେ ପ୍ରସ୍ତୁତ ଅଛନ୍ତି ତାହା ମଧ୍ୟ ଯାଞ୍ଚ କରାଯିବ । ଏହାବ୍ୟତୀତ ଟେଷ୍ଟିଂଠାରୁ ଔଷଧ ଷ୍ଟକ୍ ଉପରେ ନୀରିକ୍ଷଣ ହେବ । କୋଭିଡ୍ ପରିଚାଳନା ଓ ଭବିଷ୍ୟତ ଯୋଜନା ଉପରେ ବିଶେଷ ଧ୍ୟାନ ଦିଆଯିବ ନେଇ କ୍ଷେତ୍ର ପସ୍ତୁତ ହେବ । ଦେଶରେ ପୁଣି ଥରେ କରୋନା ସଂକ୍ରମଣ ବୃଦ୍ଧି ପାଇବାରେ ଲାଗିଛି । ଏହାକୁ ଦୃଷ୍ଟିରେ ରଖି ୩ ରାଜ୍ୟ ସରକାର କରୋନା କଟକଣା କଡ଼ାକଡ଼ି କରିଛନ୍ତି । ହରିୟାଣା ସରକାର ସାର୍ବଜନୀନ ସ୍ଥାନରେ ମାସ୍କ ପିନ୍ଧିବାକୁ ବାଧ୍ୟତାମୂଳକ କରିଛନ୍ତି । କେରଳ ସରକାର ଗର୍ଭବତୀ ମହିଳା, ବୟସ୍କ ବ୍ୟକ୍ତି ଓ ରୋଗୀଙ୍କୁ ମାସ୍କ ପିନ୍ଧିବାକୁ ପରାମର୍ଶ ଦେଇଛନ୍ତି । ପୁଡୁଚେରୀ ସରକାର ସାର୍ବଜନୀନ ସ୍ଥାନରେ ମାସ୍କ ବ୍ୟବହାରକୁ ବାଧ୍ୟତାମୂଳକ କରିଛନ୍ତି । ଗତ ୨୪ ଘଣ୍ଟାରେ ଦେଶରେ ୬,୧୫୫ ସଂକ୍ରମିତ ଚିହ୍ନଟ ହୋଇଛନ୍ତି । ଦେଶରେ କରୋନା ସଂକ୍ରମିତ ସଂଖ୍ୟା ୩୧,୧୯୪ରେ ପହଞ୍ଚିଛି । ବଢ଼ୁଥିବା ସଂକ୍ରମଣ ନେଇ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭିୟ ଚଳିତ ସପ୍ତାହରେ ସମୀକ୍ଷା ବୈଠକ କରିଥିଲେ । କୋଭିଡ୍ ମୁକାବିଲା ନେଇ ପ୍ରସ୍ତୁତ ହେବାକୁ ପରାମର୍ଶ ଦେଇଥିଲେ ।
ବଢୁଛି କରୋନା ଗ୍ରାଫ, ଆଜିଠାରୁ ଦୁଇଦିନିଆ ମକ୍ଡ୍ରିଲ୍
