ମାଛ ପାଇଁ ଯାଉଥିଲେ ଯୁବକ
ନୟାଗଡ଼,(ବାଘୁଆବାର୍ତ୍ତା): ଲକ୍ ଡାଉନ୍ ପାଇଁ ସାରା ନୟାଗଡ଼ ଜିଲ୍ଲାରେ ପୁଲିସର ବର୍ବରତା ଏବେ ସାମନାକୁ ଆସୁଛି । ଗତକାଲି ଗଣମାଧ୍ୟମ ପ୍ରତିନିଧିଙ୍କୁ ନୟାଗଡ଼ ସଦର ପୁଲିସ ମାଡ଼ ମାରିବା, ବିଭିନ୍ନ ଥାନାରେ ଅଙ୍ଗନବାଡ଼ି କର୍ମୀଙ୍କୁ ପୁଲିସ ନାଲି ଆଖି ଦେଖାଇବା ପରେ ଆଜି ଖୋଦ ରଣପୁର ଥାନା ଅଧିକାରୀ ଜଣେ ଯୁବକଙ୍କୁ ମାରି ହାତ ଭାଙ୍ଗି ଦେଇଥିବା ନେଇ ଅଭିଯୋଗ ସାମନାକୁ ଆସିଛି । ସୂଚନାନୁସାରେ, ଗତ ଶନିବାର ରଣପୁର ହରିଜନ ସାହିର ଭାଗିରଥି ନାହାକଙ୍କ ପୁଅ ସୁଦର ନାହାକ ନିଜ ଘରଠାରୁ କିଛି ଦୂରରେ ଥିବା ମାଛ ଦୋକାନକୁ ମାଛ ପାଇଁ ଯାଉଥିଲେ । ଏହି ସମୟରେ ସେହି ବାଟ ଦେଇ ଯାଉଥିବା ରଣପୁର ଥାନା ଅଧିକାରୀ ରଶ୍ମି ରଂଜନ ଦାଶ, କାହିଁକି ବୁଲୁଛୁ ବୋଲି ପଚାରି ଲାଠି ପାହାର ଦେଇଥିଲେ । ଏହି ମାଡ଼ରେ ସୁଦରଙ୍କ ବାମ ହାତ ଭାଙ୍ଗି ଯାଇଥିବା ବେଳେ ସେ ଭୟରେ କାହାରି ଆଗାରେ ଏହା ପ୍ରକାଶ କରି ନଥିଲେ । ଆଜି ଏନେଇ ସୁଦର ବିଭିନ୍ନ ଗଚ୍ଚମାଧ୍ୟମ ଆଗରେ ଘଟଣାକୁ ନେଇ ଅଭିଯୋଗ କରିଥିବା ଜଣାଯାଇଛି । ସେହିଭଳି ରଣପୁର ଥାନା ଅଧିକାରୀ ଜଣେ ଚାଷୀକୁ ଜମିରେ କାମ କରିବାକୁ ଯାଉଥିବା ବେଳେ ମାଡ଼ ମାରିଥିବା ନେଇ ଅଭିଯୋଗ ସାମନାକୁ ଆସୁଥିବା ବେଳେ ଜଣେ ସ୍ଥାନୀୟ ନେତାଙ୍କୁ ଆଇଆଇସି ଘରୁ ବାହାରକୁ ଆସିବାକୁ ଦେଉନଥିବା ନେଇ ପ୍ରଶାସନ ନିକଟରେ ଅଭିଯୋଗ ହୋଇଛି । ସଂପୃକ୍ତ ନେତାଙ୍କ ଉପରେ ପୂର୍ବ ରାଗ ରଖି ଆଇଆଇସି ଗୋଡ଼ାଇ ପିଟୁଥିବା ନେଇ ସଂପୃକ୍ତ ନେତା ପ୍ରଶାସନ ନିକଟରେ ଅଭିଯୋଗ କରିଛନ୍ତି । ଏପରିକି ଏହି ନେତା ଜଣଙ୍କ ଭୟରେ ଏକ ଘରୋଇ ଆମ୍ବୁଲାନ୍ସ ଯୋଗେ ଏହି ଘଟଣାର ଅଭିଯୋଗ କରିବାକୁ ଜିଲ୍ଲା ପ୍ରଶାସନ ପାଖକୁ ଆସିଥିବା ନେଇ ସହରରେ ଚର୍ଚ୍ଚା ହେଉଛି । ଜିଲ୍ଲାରେ ପୁଲିସର ଏଭଳି ଗୁଣ୍ଡାଗିରି ପ୍ରତି ଏସ୍ପି ଦୃଷ୍ଟି ଦେବା ଆବଶ୍ୟକ ବୋଲି ମତ ପ୍ରକାଶ ପାଇଛି ।
