ନୟାଗଡ଼,(ବାଘୁଆବାର୍ତ୍ତା ବ୍ୟୁରୋ): ନୟାଗଡ଼ ଜିଲ୍ଲା ଅନ୍ତର୍ଗତ ରଣପୁର ବ୍ଲକ୍ ରାଜସୁନାଖଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଘଟିଛି ଏକ ଅଘଟଣ । ଯାହାକୁ ନେଇ ଚାରିଆଡେ ଚର୍ଚ୍ଚା ଜୋର୍ ଧରିଛି । ଜଣେ ଗର୍ଭବତୀ ମହିଳାଙ୍କ ଅଧା ପ୍ରସବ ବେଳେ ଲେବର ରୁମ୍ ଛାଡି ଡାକ୍ତର ପଳାଇଯାଇଥିବା ଜଣାପଡିଛି । ଚିକିତ୍ସା ଅବହେଳାରୁ ନବଜାତକ ଶିଶୁ ମୃତ୍ୟୁକୁ ନେଇ ଏ ଅଭିଯୋଗ କରିଛନ୍ତି ପରିବାର ଲୋକ । ରଣପୁର ବ୍ଲକ୍ ଅନ୍ତର୍ଗତ ସାନକିଲ ଗାଁର ପ୍ରମୋଦ ସାହୁଙ୍କ ପତ୍ନୀଙ୍କର ପ୍ରସବ ଜନ୍ତ୍ରଣା ହେବାରୁ ତାଙ୍କୁ ରାଜସୁନାଖଳା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଏକ ଶିଶୁପୁତ୍ର ଜନ୍ମ ବେଳେ ପ୍ରସବ ଅଧାରୁ ଛାଡି ଡାକ୍ତର ପଳାଇଯାଇଥିବା ଅଭିଯୋଗ ହୋଇଛି । ଷ୍ଟାଫ୍ ନର୍ସମାନେ ଶିଶୁପୁତ୍ରକୁ ପ୍ରସବ କରାଇଥିବା ବେଳେ ଉକ୍ତ ଶିଶୁଟିର ମୃତ୍ୟୁ ହୋଇଛି ବୋଲି ପ୍ରମୋଦ ଅଭିଯୋଗ କରିଛନ୍ତି । ପୂର୍ବରୁ ପ୍ରମୋଦ ଓ ତାଙ୍କ ପତ୍ନୀଙ୍କୁ ଏହି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ସ୍ତ୍ରୀ ଓ ପ୍ରସୁତିରୋଗ ବିଶେଷଜ୍ଞ ଭାବେ କାର୍ଯ୍ୟ କରୁଥିବା ଡାକ୍ତର ଏସ୍. ଜିବ୍ରାଇଲ ଖାଁଙ୍କ ପାଖରେ ଚିକିତ୍ସା ହେଉଥିଲେ । ଏପ୍ରିଲ ମାସ ୪ ତାରିଖରେ ପ୍ରସବ ହେବ ବୋଲି ଡାକ୍ତର ତାରିଖ ଦେଇଥିଲେ । ମାସେ ପୂର୍ବରୁ ପ୍ରମୋଦ ତାଙ୍କ ପତ୍ନୀଙ୍କୁ ଡାକ୍ତରଖାନାକୁ ଆଣିଥିଲେ । ଅଭିଯୋଗ କ୍ରମେ ଡାକ୍ତର ପ୍ରସବ ପାଇଁ ଇଞ୍ଜେକ୍ସନ ଦେଇ ଅଧା ପ୍ରସବ ବେଳେ ଛାଡି ପଳାଇଯାଇଥିବା ପ୍ରମୋଦ ଏବଂ ତାଙ୍କ ଗ୍ରାମବାସୀ ଅଭିଯୋଗ କରିଛନ୍ତି ।
