ନୟାଗଡ଼ ସାଂସ୍କୃତିକ ମହୋତ୍ସବ ‘ଚିତ୍ରରଙ୍ଗ’ ଦ୍ୱିତୀୟ ଦିବସ
ନୟାଗଡ଼, (ବାଘୁଆବାର୍ତ୍ତା) : ନୟାଗଡ଼ର ଅଗ୍ରଣୀ ସାଂସ୍କୃତିକ ଅନୁଷ୍ଠାନ ରାଗେଶ୍ରୀ ନିଳୟମ ଓଡ଼ିଶା ସରକାରଙ୍କ ଭାଷା, ସାହିତ୍ୟ ଓ ସଂସ୍କୃତି ବିଭାଗ ମିଳିତ ଆନୁକୂଲ୍ୟରେ ଆୟୋଜିତ ନୟାଗଡ଼ ସାଂସ୍କୃତିକ ମହୋତ୍ସବ ଚିତ୍ରରଙ୍ଗ ଦ୍ୱିତୀୟ ଦିବସରେ ସାହିତ୍ୟ ଆଲୋଚନା ପର୍ବ ସହ କମଳା ନାଟକ ମଂଚସ୍ଥ ହୋଇଯାଇଛି । ଆୟୋଜିତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ରାଜ୍ୟ ସରକାରଙ୍କ କୃଷି ଓ କୃଷକ ସଶକ୍ତି କରଣ, ମତ୍ସ ଓ ପ୍ରାଣୀ ସଂପଦ ଏବଂ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ କୁମାର ସାହୁ ଯୋଗ ଦେଇଥିବା ବେଳେ ସମ୍ମାନିତ ଅତିଥି ଭାବେ ଆରକ୍ଷୀ ଅଧିକ୍ଷକ ଶଶୀଭୂଷଣ ଶତପଥୀ ଯୋଗ ଦେଇଥିଲେ । ଆଜିର ଦିନରେ କଳା, ସାହିତ୍ୟ, ସଂସ୍କୃତି ଆଗେଇଲେ ଜାତିର ଟେକ ରହିବ ବୋଲି ମୁଖ୍ୟ ଅତିଥି ତାଙ୍କ ବକ୍ତବ୍ୟରେ କହିଥିଲେ । ଆଜିର ସମାଜରେ ନକଲି ମାନଙ୍କ ପ୍ରାଧାନ୍ୟ ବଢ଼ୁଛି ଏବଂ ଅସଲି ମାନଙ୍କ ପ୍ରାଧାନ୍ୟ କମୁଛି ବୋଲି କହିବା ସହ ଅସଲିମାନେ ମେଘ ଆଢ଼ୁଆଳରୁ ସୂର୍ଯ୍ୟ ବାହାରିବା ପରି ସଠିକ ସମୟରେ ସାମ୍ନାକୁ ଆସୁଛନ୍ତି ବୋଲି କହିଥିଲେ । ସୂର୍ଯ୍ୟ ଯେପରି ନିରନ୍ତର ସତ୍ୟ ଅସଲିମାନେ ମଧ୍ୟ ସେହିପରି ନିରନ୍ତର ସତ୍ୟ ବୋଲି ଡ. ସାହୁ କହିଛନ୍ତି । ଏହି ଅବସରରେ ବିଜୟ ତେନ୍ଦୁଲକରଙ୍କ ରଚିତ ତଥା ଚିନ୍ନୟ ଷଡ଼ଙ୍ଗୀଙ୍କ ଅନୁବାଦ ନାଟକ କମଳା ମଂଚସ୍ଥ ହୋଇଯାଇଛି । ଅଭିନ୍ନ ରାଉତରାୟଙ୍କ ନିର୍ଦ୍ଦେଶିତ ଏହି ନାଟକକୁ ଦର୍ଶକ ଉପଭୋଗ କରିଛନ୍ତି । ଆଜିର କାର୍ଯ୍ୟକ୍ରମରେ ମୁଖ୍ୟ ଅତିଥି ସମାଜସେବା, ନାଟକ, ସାହିତ୍ୟ, ଅଭିନୟ, ଚିତ୍ରକଳା, ଶିକ୍ଷା, ସଂଗୀତ କ୍ଷେତ୍ରରେ ସୁନାମ ଅର୍ଜ୍ଜନ କରିଥିବା ବ୍ୟକ୍ତି ବିଶେଷଙ୍କୁ ସମ୍ବର୍ଦ୍ଧିତ କରିଛନ୍ତି । ଏଥି ସହିତ ସମୟର ଡାକ ଏବଂ କପୋତର ସ୍ୱର ପୁସ୍ତକକୁ ଅତିଥିମାନେ ଉନ୍ମୋଚନ କରିଛନ୍ତି । ରାଗେଶ୍ରୀ ନିଳୟମର ସଭାପତି ପ୍ରଭାତ କୁମାର ଦାଶ ଏବଂ ସଂପାଦକ ଶରତ ଚନ୍ଦ୍ର ଆଚାର୍ଯ୍ୟ କାର୍ଯ୍ୟକ୍ରମ ପରିଚାଳନା କରିଥିବା ବେଳେ ଅଧ୍ୟାପକ ଗଣେଶ ମିଶ୍ର ସଂଯୋଜନା କରିଥିଲେ । ପୂର୍ବାହ୍ନରେ ଆୟୋଜିତ ସାହିତ୍ୟ ସଭାରେ ଅତିଥି ଭାବେ ନ୍ୟାଟକାର ଡ. ବିଜୟ କୁମାର ଚୈାଧୁରୀ, ଡ. ଭାରତ ଭୂଷଣ ରଥ, କବି ବସିରନ ବିବି ଯୋଗ ଦେଇଥିଲେ । ଏହି କାର୍ଯ୍ୟକ୍ରମରେ ନୟାଗଡ଼ର ପଥିତଯଶା ଓ ଯୁବ ସାହିତ୍ୟିକଙ୍କ ଆସର, କବିତା ପାଠ, ତର୍କ ବିତର୍କ ଓ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା ।
ନକଲିଙ୍କ ପ୍ରାଧାନ୍ୟ ବଢ଼ୁଛି, ଅସଲିଙ୍କ ପ୍ରାଧାନ୍ୟ କମୁଛି
