ଦୁଇଜଣଙ୍କୁ ବିଭିନ୍ନ ଦଫାରେ ୧୨ ବର୍ଷ ଜେଲ୍‌

ମରାଣନ୍ତକ ଆକ୍ରମଣ ଘଟଣା

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ଓଡ଼ଗାଁ ଥାନା ଅନ୍ତର୍ଗତ ଜାମୁସାହି ଗ୍ରାମର ଦୁଇଜଣଙ୍କୁ ବିଭିନ୍ନ ଦଫାରେ ୧୨ ବର୍ଷ ସଶ୍ରମ କାରାଦଣ୍ଡାଦେଶ ସହ ଏକ ହଜାର ଟଙ୍କା ଜୋରିମାନା ଆଦେଶ ଦେଇଛନ୍ତି ନୟାଗଡ଼ ଜିଲ୍ଲା ମୁଖ୍ୟ ବିଚାରବିଭାଗୀୟ ବିଚାରପତି ମାନସ କୁମାର ପଣ୍ଡା । ସୂଚନାନୁସାରେ, ୨୦୧୫ ମସିହା ଜୁନ ୨୬ ତାରିଖରେ ପୂର୍ବାହ୍ନରେ ଜାମୁସାହି ଗ୍ରାମର ବନମାଳୀ ଜେନା ଏବଂ ତାଙ୍କ ଭାଇ ନକୁଳ ଜେନା ଏବଂ ପୁତିରା ଅମୂଲ୍ୟ ଜେନା ଗଣ୍ଡଗୋଳ ହୋଇଥିଲା । ନକୁଳ ଓ ଅମୂଲ୍ୟଙ୍କ ଆକ୍ରମଣରେ ବନମାଳୀଙ୍କ ଅବସ୍ଥା ସଂଙ୍କଟାପର୍ଣ୍ଣ ହୋଇ ଯାଇଥିଲା । ଏହି ଘଟଣାରେ ପୁଲିସ ନକୁଳ ଜେନାଙ୍କୁ ଗିରଫ କରିଥିବା ବେଳେ ଅମୂଲ୍ୟ ଉଚ୍ଚ ନ୍ୟାୟାଳୟର ଆଦେଶ ବଳରେ ଜାମିନ ପାଇଥିଲେ । ଏହି ଘଟଣାର ଅଭିଯୋଗ ଫର୍ଦ୍ଦ ପୁଲିସ କୋର୍ଟରେ ଦାଖଲା କରିବା ପରେ ଘଟଣାର ଗମ୍ଭିରତା ଦୃଷ୍ଟିରୁ ଏହା ମୁଖ୍ୟ ବିଚାରବିଭାଗୀୟ ମାଜିଷ୍ଟେଟଙ୍କ ଅଦାଲତକୁ ସ୍ଥାନାନ୍ତରିତ ହୋଇଥିଲା । ସାକ୍ଷୀଙ୍କ ବୟାନକୁ ତର୍ଜ୍ଜମା କରି ବିଚାରପତି ଆସାମୀ ନକୁଳ ଜେନା ଏବଂ ଅମୂଲ୍ୟ ଜେନାଙ୍କୁ ଦୋଷୀ ସାବ୍ୟସ୍ତ କରି ଉଭୟଙ୍କୁ ଭାରତୀୟ ପିଙ୍ଗଲ କୋର୍ଟ ଦଫା ୩୦୭ରେ ଅନୁଯାୟୀ ୭ବର୍ଷ ସଶ୍ରମ କାରାଦଣ୍ଡାଦେଶ ଏବଂ ଏକ ହଜାର ଜୋରିମାନା, ଦଫା ୩୨୪ରେ ୨ବର୍ଷ ସଶ୍ରମ କାରାଦଣ୍ଡା ଦେଶ, ଦଫା ୫୦୬ରେ ୩ ବର୍ଷ ସଶ୍ରମ କାରାଦଣ୍ଡା ଦେଶ ଦେଇଥିବା ବେଳେ ଏହାକୁ ଏକକାଳୀନ ଭୋଗ କରିବା ପାଇଁ ବିଚାରପତି ତାଙ୍କ ରାୟରେ ଉଲ୍ଲେଖ କରିଛନ୍ତି । ଏହି ମାମଲାକୁ ଅତିରିକ୍ତ ପବ୍ଲିକ ପ୍ରୋସିକ୍ୟୁଟର ଅମୀୟ ପଟ୍ଟନାୟକ ପରିଚାଳନା କରିଥିଲେ ।