ଡା. ଦିକ୍ଷୀତଙ୍କ କ୍ୱାର୍ଟରରେ ସିଡିଏମଓଙ୍କ ଚଢ଼ାଉ, ୨ ଅଟକ

ନୟାଗଡ଼,(ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟର ଶିଶୁ ବିଶେଷଜ୍ଞ ଡାକ୍ତର ଆଶିଷ ଦିକ୍ଷୀତ ତାଙ୍କ କ୍ୱାର୍ଟରରେ ରୋଗୀ ଦେଖୁଥିବା ସମୟରେ ଆଜି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଡା. ମକରନ୍ଦ ବେଉରା ସ୍ୱତନ୍ତ୍ର ଟିମ୍ ସହ ଅଚାନକ ଚଢ଼ାଉ କରିଥିଲେ । ଚଢ଼ାଉ ସମୟରେ ସେଠାରେ ୫୦ରୁ ଉଦ୍ଧ୍ୱର୍ ଲୋକ ରୁଣ୍ଡ ହୋଇଥିବା ବେଳେ ଡାକ୍ତର ଘର ଭିତରେ ରୋଗୀ ଦେଖୁଥିଲେ । ଜିଲ୍ଲା ମୁଖ୍ୟ ଚିକିତ୍ସାଳୟରୁ ରୋଗୀଙ୍କୁ ଡାକି ଡାକ୍ତରଙ୍କ ପାଖେ ଛାଡ଼ୁଥିବା ୨ ଜଣ ଦଲାଲକୁ ସିଡିଏମଓ ଧରି ପୁଲିସ ଜିମା ଦେଇଛନ୍ତି । ପୁଲିସ ତାଙ୍କୁ ଡାକ୍ତରଖାନା ଫାଣ୍ଡିରେ ଅଟକ ରଖିଛି । ୨ ଜଣ ହେଉଛନ୍ତି ନୟାଗଡ଼ର ସୋମେଶ ବିଶ୍ୱାଳ ଏବଂ ଗୋଡ଼ିଆଳିର ରାଧେଶ୍ୟାମ ବିଶ୍ୱାଳ । ୨ ଅଭିଯୁକ୍ତଙ୍କ କହିବା ମୁତାବକ ଡା. ଦିକ୍ଷୀତ ୨ ଶହ ଟଙ୍କା ଲେଖାଏଁ ଫିସ ନେଇ ରୋଗୀ ଦେଖନ୍ତି, ଆଜି ବ୍ୟକ୍ତିଗତ ଆକ୍ରୋଶରୁ ଡାକ୍ତରଙ୍କ ଘରେ ଚଢ଼ାଉ ହୋଇଛି । ଅନ୍ୟପକ୍ଷେ ସେମାନେ ଡାକ୍ତରଙ୍କ ବ୍ୟକ୍ତିଗତ କର୍ମଚାରୀ ବୋଲି ସଫେଇ ଦେଇଛନ୍ତି । ଏନେଇ ଡାକ୍ତର ଦିକ୍ଷୀତଙ୍କ ମତାମତ ମିଳିପାରି ନାହିଁ । ଡା. ଦିକ୍ଷୀତ ସରକାରୀ ଡାକ୍ତରଖାନାରେ ଚାକିରି କରୁଥିବା ବେଳେ ଏଠାରେ ଓପିଡି ଡ୍ୟୁଟି ନକରି ଘରେ ରୋଗୀ ଦେଖୁଥିଲେ, ଯେଉଁଥିପାଇଁ ଚଢ଼ାଉ କରାଯାଇଛି ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ସୂଚନା ଦେଇଛନ୍ତି ।