ଖଳିସାହିରେ ଗ୍ରାମବାସୀ ଓ ବ୍ୟବସାୟୀଙ୍କ ଶୋଭାଯାତ୍ରା
ନୟାଗଡ଼, (ବାଘୁଆବାର୍ତ୍ତା) : ନିଶାଦ୍ରବ୍ୟର ଅବାଧ କାରବାର ଯୋଗୁଁ ଖଣ୍ଡପଡ଼ା ଥାନା ଅଧିନ ଖଳିସାହି ଗ୍ରାମରେ ବାରମ୍ବାର ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଉଥିଲା । ଫଳରେ ଗ୍ରାମର ଶାନ୍ତ ପରିବେଶ ଅଶାନ୍ତ ଆଡ଼କୁ ଗତି କରୁଥିଲା । ଗ୍ରାମବାସୀ ଏ ସଂମ୍ପର୍କରେ ପ୍ରଶାସନର ଦୃଷ୍ଟି ଆକର୍ଷଣ କରି କୈାଣସି ସୁଫଳ ନପାଇବା ପରେ ଏକ ନିଶାମୁକ୍ତ ଗ୍ରାମ ଗଠନ ନିମନ୍ତେ ଅଣ୍ଟା ଭିଡ଼ିଛନ୍ତି । ଖଳିସାହି ଗ୍ରାମବାସୀଙ୍କ ପକ୍ଷରୁ ରବିବାର ଦିନ ଆୟୋଜିତ ନିଶାମୁକ୍ତ ଅଭିଯାନରେ ଶତାଧିକ ଲୋକ ସାମିଲ ହୋଇଛନ୍ତି । ସ୍ଥାନୀୟ ଜଗନ୍ନାଥ ମନ୍ଦିର ପରିସରରୁ ନିଶାମୁକ୍ତ ଅଭିଯାନର ଶୁଭାରମ୍ଭ ହୋଇଥିଲା । ପୂର୍ବାହ୍ନ ୧୦ ଘଟିକା ସମୟରେ ଗ୍ରାମବାସୀମାନେ ମନ୍ଦିର ପ୍ରାଙ୍ଗଣରେ ଏକତ୍ରିତ ହୋଇଥିଲେ । ମନ୍ଦିର ପରିସରରୁ ଶାନ୍ତିପୂର୍ଣ୍ଣ ଭାବେ ଏକ ବିଶାଳ ଶୋଭାଯାତ୍ରାରେ ଖଳିସାହି ଗ୍ରାମର ପ୍ରତ୍ୟେକ ସାହିରେ ଏବଂ ନିକଟସ୍ଥ କୋଟପୋଖରୀ ଗ୍ରାମ ପରିକ୍ରମା କରି ଅଂଚଳ ବାସୀଙ୍କୁ ଏ ସଂମ୍ପର୍କରେ ସଚେତନ କରିଥିଲେ । ଖଳିସାହି ବଜାର ଓ ଗଳି କନ୍ଦିରେ ନିଶାଦ୍ରବ୍ୟର କାରବାର ସଂମ୍ପୂର୍ଣ୍ଣ ବନ୍ଦ ଉପରେ ଗ୍ରାମବାସୀମାନେ ରୋକ ଲଗାଇଥିବା ଜଣାପଡ଼ିଛି । ସେହିପରି ନିଶା ସେବନକାରୀ ବ୍ୟକ୍ତି ଖଲିସାହି ବଜାର ଅଂଚଳରେ ଧରା ପଡ଼ନ୍ତି ତାହାଲେ ଆଇନ ଅନୁଯାୟୀ ଦଣ୍ଡିତ ହେବା ସହ ଅର୍ଥ ଜୋରିମାନା ଦେବାର ବ୍ୟବସ୍ଥା କରାଯାଇଥିବା ନେଇ ଅଭିଯାନର ଆବାହକ ମାନଙ୍କଠାରୁ ପ୍ରକାଶ । ଖଳିସାହି ଅଂଚଳରେ ଦେଶୀ ଓ ବିଦେଶୀ ମଦ, ଭାଙ୍ଗ, ଗଂଜେଇ, କୋରେସ୍କ ଅବାଧ ବିକ୍ରି ଉପରେ ଗ୍ରାମବାସୀମାନେ କଟକଣା ଜାରି କରିଛନ୍ତି । କଟକଣା ସତ୍ୱେ ଯଦି କେହି ବ୍ୟକ୍ତି ଚୋରାରେ ନିଶାଦ୍ରବ୍ୟର କାରବାର କରନ୍ତି ତାହେଲେ ଆଇନ ଅନୁଯାୟୀ ଦଣ୍ଡିତ ହେବେ ବୋଲି ଜଣାପଡ଼ିଛି ।
