ଦଶପଲ୍ଲା, (ବାଘୁଆବାର୍ତ୍ତା) : ଦଶପଲ୍ଲା ସହର କୃଷ୍ଣଚନ୍ଦ୍ରପୁର ପାଟଣାରେ ବୃଦ୍ଧ ମାୟାଧର ପୃଷ୍ଟି (୭୦)ଙ୍କୁ ଗଳାକାଟି ହତ୍ୟାକାଣ୍ଡ ଘଟଣାର ୩୦ଘଣ୍ଟା ପରେ ମଧ୍ୟ ହତ୍ୟାକାରୀ ନିକଟରେ ପୁଲିସ ପହଞ୍ଚିପାରି ନାହିଁ । ଗତକାଲିଠାରୁ ଫୋରେନ୍ସିକ୍ ଦଳ ହତ୍ୟାକାଣ୍ଡ ସ୍ଥଳରେ ପହଞ୍ଚି ଅନୁସନ୍ଧାନ କରି ଫେରିଯାଇଛନ୍ତି । ବୁଧବାର ରାତି ୮ଟା ବେଳେ ହତ୍ୟାକାଣ୍ଡ ସ୍ଥଳରୁ ଶବକୁ ନୟାଗଡ଼ ଏସ୍ପି ଶଶିଭୂଷଣ ଶତପଥିଙ୍କ ହସ୍ତକ୍ଷେପ ପରେ ଗ୍ରାମବାସୀ ବ୍ୟବଚ୍ଛେଦ ନିମନ୍ତେ ଛାଡିଥିଲେ । ଆଜି ମାୟାଧରଙ୍କ ଶବକୁ ଦଶପଲ୍ଲା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ବ୍ୟବଚ୍ଛେଦ କରାଯାଇଛି । ଗୁରୁବାର ପୂର୍ବାହ୍ନରେ ଭୁବନେଶ୍ୱରରୁ ସନ୍ଧାନୀ କୁକୁର ସହାୟତାରେ ରକ୍ତ ଜୁଡୁବୁଡୁ ଅବସ୍ଥାରେ ପଡିଥିବା ମାୟାଧରଙ୍କ ଶୋଇବା ଗୃହରୁ କୁକୁର ଗାଁମୁଣ୍ଡରେ ଥିବା ବେରେଣୀ ପୋଖରୀ ପର୍ଯ୍ୟନ୍ତ ଯାଇ ପୁନଶ୍ଚ ଘର ନିକଟକୁ ଫେରି ଆସିଥିଲା । ଏହି ଘଟଣା ଅତି ସମ୍ବେଦନଶୀଳ ହୋଇଥିବାରୁ ପୋଲିସ ମୃତ ମାୟାଧରଙ୍କ ବୋହୂ ରଶ୍ମିତା ପୃଷ୍ଟି, ସ୍ତ୍ରୀ-ସୁକାନ୍ତିଙ୍କୁ ତଦନ୍ତ ପରିସରକୁ ଆଣି ଖୋଳତାଡ କରୁଛି । ଏହି ଘଟଣାରେ ଏକ ହତ୍ୟା ମୋକଦ୍ଦମା ରୁଜୁ କରି ନୟାଗଡ଼ ଜିଲ୍ଲା ଅତିରିକ୍ତ ଆରକ୍ଷୀ ଅଧିକ୍ଷକ ଦିଲ୍ଲୀପ କୁମାର ସାହାଣୀ, ଏସ୍ଡିପିଓ ନିରଞ୍ଜନ ପାଢିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ହତ୍ୟାକାଣ୍ଡର ପ୍ରତ୍ୟେକ ଦିଗ ଉପରେ ପୁଲିସ ତୀକ୍ଷ୍ମ ନଜର ରଖିଛି । ଖୁବ୍ଶୀଘ୍ର ହତ୍ୟାକାଣ୍ଡର ସମସ୍ତ ଘଟଣା ଉନ୍ମୋଚନ ହେବ ବୋଲି ଦଶପଲ୍ଲା ଥାନା ଭାରପ୍ରାପ୍ତ ଅଧିକାରୀ ବିଶ୍ୱଜିତ୍ ରାଉତରାୟ ଗଣମାଧ୍ୟମକୁ ଦୃଢୋକ୍ତି ପ୍ରକାଶ କରିଛନ୍ତି । ହତ୍ୟାକାଣ୍ଡରେ ବ୍ୟବହୃତ ଧାରୁଆ ଅସ୍ତ୍ର, କେଉଁ କାରଣରୁ ଏଭଳି ଜଘନ୍ୟ ହତ୍ୟାକାଣ୍ଡ, ପରିବାର ମଧ୍ୟରେ ଥିବା ତିକ୍ତତା ଭଳି ଅନେକ କାରଣକୁ ଆଧାର କରି ପୁଲିସ ତଦନ୍ତ ଉପରେ ଅଧିକ ଗୁରୁତ୍ୱ ଦେଉଥିବା କଥା ତଦନ୍ତକାରୀ ଅଧିକାରୀ ପ୍ରକାଶ କରିଛନ୍ତି ।
