ଦଶପଲ୍ଲା, (ବାଘୁଆବାର୍ତ୍ତା) : ଦଶପଲ୍ଲା ସହର କୃଷ୍ଣଚନ୍ଦ୍ରପୁରପାଟଣାରେ ବୁଧବାର ଦିନ ଏକ ବିଭତ୍ସ ହତ୍ୟାକାଣ୍ଡ ଘଟିଛି । ମାୟାଧର ପୃଷ୍ଟି ନାମକ ଜଣେ ୭୦ବର୍ଷ ବୃଦ୍ଧଙ୍କୁ ଗଳାକାଟି ଅତି ନୃଶଂସ ଭାବେ ହତ୍ୟା କରି ହତ୍ୟାକାରୀ ଘଟଣାସ୍ଥଳରୁ ଫେରାର୍ ହୋଇଯାଇଛି । ପୁଲିସ୍ ଘଟଣାସ୍ଥଳରେ ପହଞ୍ଚି ମାୟାଧରଙ୍କ ରକ୍ତ ଜୁଡୁବୁଡୁ ଶବକୁ ଜବତ କରି ଖାନତଲାସି ଆରମ୍ଭ କରିଛି । ନୟାଗଡ଼ରୁ ଫୋରେନ୍ସିକ୍ ଅନୁସନ୍ଧାନ ଦଳ ହତ୍ୟାକାଣ୍ଡ ସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି । ଅଧିକ ଅନୁସନ୍ଧାନ ସକାଶେ ପୁଲିସ କୁକୁର ଭୁବନେଶ୍ୱରରୁ ମଗାଯାଇଥିବା ତଦନ୍ତକାରୀ ଅଧିକାରୀ ସୂଚନା ଦେଇଛନ୍ତି । ପ୍ରାପ୍ତ ଘଟଣାରୁ ପ୍ରକାଶ ଯେ, ସବୁଦିନ ଭଳି ମୟାଧର ନିତ ନିତ୍ୟକର୍ମ ସାରି ଠାକୁର ପୂଜା ଆରମ୍ଭ କରିବା ସହିତ ରୋଷେଇ ପାଇଁ ଡାଲି ଗ୍ୟାସ୍ରେ ବସାଇଥିଲେ । ତାଙ୍କ ପତ୍ନୀ ସୁକାନ୍ତି ଦୁର୍ଗାବଜାର କଲୋନୀସ୍ଥିତ ଏକ କଲେଜ ମେସ୍କୁ ରୋଷେଇ କରିବାକୁ ଯାଇଥିଲେ । ପ୍ରାୟ ଦିନ ୧୧ଟା୪୫ମିନିଟ୍ ସମୟରେ ଘରେ ପହଞ୍ଚିବା ପରେ କବାଟ ଶିକୁଳି ବାହାରପଟୁ ଦିଆଯାଇଛି । ଘରେ ପ୍ରବେଶ କରିବା ପରେ ଡାଲି ଡେକ୍ଚି ପୋଡି ପାଉଁଶ ହୋଇଯାଇଛି । ଶୋଇବା ଘର ଖୋଲିବା ପରେ ସ୍ୱାମୀ ମାୟାଧରଙ୍କ ରକ୍ତଜୁଡୁବୁଡୁ ମୃତଦେହ ଦେଖି ପୋଲିସ୍କୁ ଖବର ଦେଇଥିଲେ । ମାୟାଧରଙ୍କ ୩ଟି ଝିଅ ବିବାହିତା ଏବଂ ଗୋଟିଏ ପୁଅ ୨ବର୍ଷ ପୂର୍ବେ ଏକ ଦୁର୍ଘଟଣାରେ ମୃତ୍ୟୁବରଣ କରିଥିଲା । ବିଧବା ବୋହୁ ଏବଂ ୮ବର୍ଷର ନାତୀ ନୟାଗଡ଼ ନିକଟସ୍ଥ ମଶାଣିଝୋଲା ଗାଁରେ ନିଜ ବାପଘରେ ହରୁଛନ୍ତି । ହତ୍ୟାକାଣ୍ଡର ସୁରାକ ପୋଲିସକୁ ଦୀର୍ଘ ୬ଘଣ୍ଟା ପର୍ଯ୍ୟନ୍ତ ମିଳିପାରି ନାହିଁ । ବୋହୂର ମୋବାଇଲ୍ଟି ସନ୍ଦେହରେ ପୋଲିସ ଜବତ କରିଛି । ପୋଲିସ ସନ୍ଧାନୀ କୁକୁର ଅପେକ୍ଷାରେ ରହିଛି । ଏହି ହତ୍ୟାକାଣ୍ଡ ରହସ୍ୟମୟ ହୋଇଥିବାରୁ ପୁଲିସ୍ ପାଇଁ ବର୍ତ୍ତମାନ ଅପରାଧୀକୁ ଧରିବା ଏକ ଚ୍ୟାଲେଞ୍ଜ ପାଲଟିଛି ବୋଲି ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି । ଜଣେ ଧର୍ମପ୍ରାଣା ତଥା ନିଷ୍ପାପ ବ୍ୟକ୍ତିଙ୍କ ହତ୍ୟାକୁ ନେଇ ଭୟ ସୃଷ୍ଟି ହୋଇଛି ।
