ନୟାଗଡ଼, (ବାଘୁଆବାର୍ତ୍ତା) : ନୟାଗଡ ଜିଲ୍ଲା ରଣପୁର ଥାନା ଅଂଚଳରେ ଚାକିରୀ କରାଇଦେବା ନାମରେ ଯୁବକ ମାନଙ୍କଠାରୁ ଟଙ୍କା ଠକି ନେଇଥିବା ବ୍ୟକ୍ତି ରଣପୁର ପୁଲିସ ଦ୍ୱାରା ଗିରଫ ହୋଇଛନ୍ତି । ଗିରଫ ହୋଇଥିବା ବ୍ୟକ୍ତି ହେଲେ ନୟାଗଡ ନିକଟସ୍ଥ ବାରବାଟି ଗ୍ରାମର ଦିନବନ୍ଧୁ ସାହୁ ଓରଫ୍ ନିଲୁ । ସୂଚନାନୁସାରେ, ନିଲୁ ରଣପୁର ,ଲୋଧାଚୁଆ ଓ ଗୋପାଳପୁର ଆଦି ଅଂଚଳରୁ ପ୍ରାୟ ୩୮ଜଣରୁ ଉଦ୍ଧ୍ୱର୍ ଯୁବକଙ୍କଠାରୁ ଚାକିରୀ କରାଇଦେବା ବାହାନା କରି ଟଙ୍କା ଠକି ନେଇଥିଲେ । ଏସଆଇଏସ ନାମକ ଏକ ସିକ୍ୟୁରିଟି ସଂସ୍ଥା ମାଧ୍ୟମରେ ମାସିକ ୧୦ହଜାର ୫ଶହ ଟଙ୍କା ଦରମାରେ ଆଖପାଖ ଡାକ୍ତରଖାନା ମାନଙ୍କରେ ସିକ୍ୟୁରିିଟି ଗାର୍ଡ ନିଯୁକ୍ତି ଦେବା ପାଇଁ ପ୍ରଲୋଭନ ଦେଖାଇଥିଲେ । ସିକ୍ୟୁରିଟି ଗାର୍ଡ ନିଯୁକ୍ତି ପୁର୍ବରୁ ଡ୍ରେସ୍ ପାଇଁ ୫ ହଜାର ରୁ ୭ ହଜାର ଟଙ୍କା ପର୍ଯ୍ୟନ୍ତ ପିଲା ପିଛା ଆଦାୟ କରି ନେଇଥିଲେ । ତା ପରଠାରୁ ସେ ବାବୁଙ୍କର ଆଉ ଦେଖା ନଥିଲା । ମୋବାଇଲ୍ ଫୋନ କୁ ଫୋନ କଲେ ସବୁବେଳେ ସୁଇଚ୍ ଅଫ୍ ରହୁଥିଲା । ଫଳରେ ଟଙ୍କା ଦେଇଥିବା ପିଲା ମାନେ ହତାଶ ହୋଇ ପଡିଥିଲେ । ଗତ କାଲି ନୟାଗଡ ଜିଲ୍ଲା ଲାଠିପଡା ଅଂଚଳରୁ ସେହି ଯୁବକ ଅଭିନବ ଉପାୟରେ ଅନ୍ୟ ପିାଲଙ୍କଠାରୁ ଟଙ୍କା ଆଦାୟ କରୁଥିବା ଖବର ପାଇ ରଣପୁର ଅଂଚଳରୁ ଟଙ୍କା ଦେଇଥିବା ପିଲାମାନେ ସେଠାରେ ପହଁଚି ସେହି ଠକ ଯୁବକକୁ ଧରି ନେଇଥିଲେ । ଯୁବକକୁ ରଣପୁର ପୋଲିସ୍ ନିକଟରେ ହାଜର କରାଇଥିଲେ । ଠକାମିରେ ଶିକାର ହୋଇଥିବା ଯୁବକ ମାନଙ୍କଠାରୁ ଏତଲା ପାଇ ପୋଲିସ୍ ଠକେଇ ଅଭିଯୋଗରେ ନିଲୁ ସାହୁଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣା ପଡିଛି । ଯୁବକର ଜାମିନ୍ ଆବେଦନ ନାମଞ୍ଜୁର ହେବାରୁ ଯୁବକକୁ ରଣପୁର ଜେଲ ହାଜତକୁ ପଠାଇ ଦିଆଯାଇଛି ।
