ବାପ ପୁଅ ଭଣ୍ଡ ବାବା ସାରଥୀ ନାଁରେ ଚଲାଇଥିଲେ ପ୍ରହସନ, ଉଠାଇ ନେଲା ପୋଲିସ

କାମାକ୍ଷାନଗର, (ବାଘୁଆବାର୍ତ୍ତା): ମହଙ୍ଗା ପଡ଼ିଲା ଭଣ୍ଡ ସାରଥି ପ୍ରେମ। କୋଭିଡ ନିୟମ ଉଲଂଘନ କରିବା ସହ ସାହି ମଝିରେ ଭଣ୍ଡ ବାବା ନାମରେ ପ୍ରହସନ କରୁଥିବାର ଗ୍ରାମବାସୀଙ୍କ ତରଫରୁ ଥାନାରେ ଲିଖିତ ଅଭିଯୋଗ ହୋଇଥିଲା ଖବର ପାଇବା ପରେ ବାପ ପୁଅ ଦୁଇ ଜଣଙ୍କୁ ଉଠାଇ ନେଇଛି ପୋଲିସ। ସୂଚନା ମୁତାବକ, ପରଜଙ୍ଗ ବ୍ଲକ କନ୍ଦରସିଂହା ଗ୍ରାମ ଖଳିବାହାଳ ସାହିର ଏକ ଭଣ୍ଡ ସାରଥୀ ଭକ୍ତ ବାପା ଦିବାକର ନାଥ ଓ ପୁଅ ସୁକାନ୍ତ ନାଥ। ବହୁ ଚର୍ଚ୍ଚିତ ଭଣ୍ଡ ସାରଥୀ ବାବାକୁ ପୂଜା କରିବା ସହିତ ସାରଥୀ ଫଟରୁ ମହୁ ଓ ଲହୁଣୀ ବାହାରୁଥିବା ପରିବାର ଲୋକେ ଦାବି କରି ଆସୁଥିଲେ। ଯାହାଦ୍ୱାରା ଉକ୍ତ ଘରକୁ ଦୂର ଦୁରାନ୍ତରୁ ସାରଥୀ ଭକ୍ତଙ୍କ ସୁଅ ଛୁଟିଥିଲା। ତେବେ ବୁଧବାର ସନ୍ଧ୍ୟା ସମୟରେ କୁମାର ପୂର୍ଣ୍ଣିମା ଥିବା ବେଳେ ସେହି ପରିବାର ଲୋକେ ଦୂର ଦୁରାନ୍ତରୁ କିଛି ଭକ୍ତଙ୍କୁ ଡାକି ଭୋଜି ଭାତର ଆୟୋଜନ କରିବା ସହ ସାରଥୀ ଫଟକୁ ରଖି ପୂଜାର୍ଚନା କରୁଥିଲେ। ଯାହାକି ପ୍ରଶାସନର କୌଣସି ଅନୁମତି ନ ଥିଲା। କୋଭିଡ ନିୟମର ଖୋଲା ଖୋଲି ଉଲଂଘନ ଓ ବାରମ୍ବାର ଏପରି ପ୍ରହସସନରେ ଗ୍ରାମବାସୀ ଲଜିତ ହେବାକୁ ପଡିଥିଲା। ତେଣୁ ଗତକାଲି ବୁଧବାର ସନ୍ଧ୍ୟା ସମୟରେ ଭଣ୍ଡ ସାରଥିର ଭକ୍ତମାନେ ଆସର ଜମାଇଥିବା ବେଳେ ଗ୍ରାମବାସୀ ଏକତ୍ରିତ ହୋଇ ଥାନାର ଦ୍ୱାରସ୍ଥ ହୋଇଥିଲେ। ଖବର ପାଇ ଘଟଣା ସ୍ଥଳରେ ପରଜଙ୍ଗ ପୋଲିସ ପହଞ୍ଚି ସଂପୃକ୍ତ ବାପ ପୁଅ ଦୁଇ ଜଣକୁ ପୋଲିସ ଉଠାଇ ନେଇ ଥାନାରେ ଅଟକ ରଖିଛି। ତେବେ ଆଗକୁ ଏପରି ପ୍ରହସନ ଜାରି ରହିଲେ ଗ୍ରାମବାସୀମାନେ ରାଜରାସ୍ତାକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି।