ନୂଆଦିଲ୍ଲୀ, (ବାଘୁଆବାର୍ତ୍ତା): ଚାଲିଛି ଆଇପିଏଲ-୧୪ ସିଜିନ୍ । ଆଉ କିଛି ସମୟ ପରେ ଆରମ୍ଭ ହୋବକୁ ଥିବା ଆଇପିଏଲ ଏଲିମିନେଟର ମ୍ୟାଚ୍ । ଏହି ମ୍ୟାଚରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଓ କୋଲକତା ନାଇଟ୍ ରାଇଡର୍ସ ସହିତ ଖେଳ ଆରମ୍ଭ ହେବ । ଯଦି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ହାରେ ତେବେ ଦଳର କ୍ୟାପଟେନ୍ ପୂର୍ବ ଘୋଷଣା ମୁତାବକ ବଡ଼ ଘୋଷଣା କରିପାରନ୍ତି । ଏହି ମ୍ୟାଚ୍ ପୂର୍ବରୁ ପୂର୍ବତନ ଭାରତୀୟ କ୍ରିକେଟର ଆକାଶ ଚୋପ୍ରା ଗୁରୁତ୍ଵପୂର୍ଣ୍ଣ ବୟାନ ଦେଇଛନ୍ତି। ଆକାଶ ଚୋପ୍ରା ନିଜର ଟ୍ଵିଟର ଆକାଉଣ୍ଟରେ ଲେଖିଛନ୍ତି, ତାଙ୍କୁ ଏମିତି ହୃଦବୋଧ ହେଉଛି ଯେ, ଆଉ କିଛି ସମୟ ପରେ ଆମେ ଅଧିନାୟକ ବିରାଟ କୋହଲିଙ୍କୁ ମିସ୍ କରିବା। ଯେଉଁ ଲୋକେ ବିରାଟ କୋହଲିଙ୍କ ନେତୃତ୍ଵ ଉପରେ ପ୍ରଶ୍ନ ଉଠାଉଛନ୍ତି, ସେମାନେ ବି ବିରାଟଙ୍କ ଅଧିନାୟକତ୍ଵ ଏବଂ ରଣନୀତିର ପ୍ରଶଂସା କରିବେ। ଆକାଶ ଚୋପ୍ରାଙ୍କ ଏହି ଟ୍ଵିଟ୍କୁ ନେଇ ବିତର୍କ ଆରମ୍ଭ ହୋଇ ଯାଇଛି। କିଛି ୟୁଜର୍ସ ଲେଖିଛନ୍ତି, ଟେଷ୍ଟରେ ବିରାଟ କୋହଲିଙ୍କ ଅଧିନାୟକତ୍ଵକୁ ଲୋକେ ମିସ୍ କରିବେ, ମାତ୍ର ଦିନିକିଆ ଓ ଟି-୨୦ରେ ଏମିତି କରିବେ ନାହିଁ। ଆଉ କିଛି ୟୁଜର୍ସ ଟ୍ଵିଟ୍ କରିଛନ୍ତି ଯେ, ନିଶ୍ଚିତ ଭାବେ ଆମେ ବିରାଟ କୋହଲିଙ୍କ ଲଢୁଆ ଗୁଣକୁ ମିସ୍ କରିବୁ। ଯେଉଁଭଳି ସେ ଆକ୍ରମଣାତ୍ମକ ଆଭିମୁଖ୍ୟ ଦେଖାଇଥାନ୍ତି ତାହା ବାସ୍ତବରେ ପ୍ରଶଂସନୀୟ। ସୂଚନାନୁସାରେ, ଆଇପିଏଲ ୨୦୨୧ ଆରମ୍ଭ ହେବା ପୂର୍ବରୁ ବିରାଟ କୋହଲି ଘୋଷଣା କରି ସାରିଥିଲେ ଯେ, ଅଧିନାୟକ ଭାବେ ଏହା ତାଙ୍କର ଶେଷ ସିଜିନ। ସେ ଆଗାମୀ ଦିନରେ ବେଙ୍ଗାଲୁରୁ ଦଳରେ ରହିବେ, ମାତ୍ର ନେତୃତ୍ଵ ନେବେ ନାହିଁ। ବିରାଟ କୋହଲି କେବଳ ଆଇପିଏଲରେ ନୁହେଁ ବରଂ ବିଶ୍ଵ କପ୍ ପରେ ଭାରତୀୟ ଟି-୨୦ ଦଳର ଅଧିନାୟକ ପଦ ଛାଡିବେ। ଟି-୨୦ ବିଶ୍ଵ କପ୍ ବିରାଟ କୋହଲିଙ୍କ ଟି-୨୦ରେ ଅଧିନାୟକ ଭାବେ ଶେଷ ଟୁର୍ଣ୍ଣାମେଣ୍ଟ ରହିବ। ତେଣୁ ବିରାଟ ଚାହିଁବେ ଆଇପିଏଲ ହେଉ କି ବିଶ୍ଵ କପ୍ ଦୁଇ ଟୁର୍ଣ୍ଣାମେଣ୍ଟକୁ ଏକ ଉଚ୍ଚସ୍ତରରେ ସମାପ୍ତ କରିବେ।
ଦଳ ହାରିଲେ ବିରାଟ କରିପାରନ୍ତି ବଡ଼ ଘୋଷଣା!
