ବିଜେପି ନେତା ଜୟରାମ ପାଙ୍ଗୀ: ଦଳରେ ରହି ଦଣ୍ଡକାରଣ୍ୟ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ଦାବି ପାଇଁ ଲଢେଇ କରିବେ

କୋରାପୁଟ, (ବାଘୁଆବାର୍ତ୍ତା): କିଛିଦିନ ତଳେ ଯାହା କହିଲେ ସେଥିରେ ୟୁଟର୍ଣ୍ଣ ମାରିଛନ୍ତି କୋରାପୁଟର ବରିଷ୍ଠ ବିଜେପି ନେତା ଜୟରାମ ପାଙ୍ଗୀ । ଗଣମାଧ୍ୟମକୁ ଦଳ ଛାଡିବାକୁ କହି ଏବେ ମନା କରିଛନ୍ତି ଏହି ନେତା। ଦଳରେ ରହି ଦଣ୍ଡକାରଣ୍ୟ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ଦାବି ପାଇଁ ଲଢେଇ କରିବେ। କିନ୍ତୁ କୌଣସି ପଦପଦବୀରେ ରହିବେ ନାହିଁ। ଦଳର କେବଳ ଜଣେ ସାଧାରଣ କର୍ମୀ ଭାବେ କାମ କରିବେ ବୋଲି କହିଛନ୍ତି ଜୟରାମ। କୋରାପୁଟ ବିଜେପିରେ କେଣଠେସା ହୋଇ ରହିଥିବା ପୂର୍ବତନ ସାଂସଦ ଜୟରାମ ପାଙ୍ଗୀ ଦଳ ଛାଡିବେ ବୋଲି ଯେଉଁ ଆଲୋଚନା ହେଉଥିଲା ସେଥିରେ ସେ ନିଜେ ପୂର୍ଣ୍ଣଚ୍ଛେଦ ପକାଇଛନ୍ତି । ୨୦୧୭ରେ ବିଜେଡି ଛାଡି ବିଜେପିରେ ଯୋଗ ଦେଇଥିବାବେଳେ ଚଳିତ ମାସ ୫ ତାରିଖରେ ଦଳ ଛାଡି ଦଣ୍ଡକାରଣ୍ୟ ରାଜ୍ୟ ଓ କେନ୍ଦ୍ରାଶାସିତ ଅଞ୍ଚଳ ଦାବିକୁ ଶାଣିତ କରାଯିବ ବୋଲି ସେ କହିଛନ୍ତି । ଚଳିତମାସ ୧୦ ତାରିଖ ପୂର୍ବରୁ ସେ ଦଳ ଛାଡି ଦଣ୍ଡକାରଣ୍ୟ କେନ୍ଦ୍ର ଶାସିତ ଅଞ୍ଚଳ ଗଠନ ପାଇଁ ମଙ୍ଗ ଧରିବେ ବୋଲି ସାମ୍ବାଦିକକୁ କହିଥିଲେ । ୪ ତାରିଖରେ ଦଣ୍ଡକାରଣ୍ୟ ବିକାଶ ପରିଷଦ ଭାବେ ଏକ ସଂଗଠନ ଗଢା ଯାଇଥିବା ବେଳେ ଅବିଭକ୍ତ କୋରାପୁଟ ଜିଲ୍ଲା, ବିଜୟନଗରମ ଓ ପାର୍ବତିପୂରମ ଜିଲ୍ଲାର କିଛି ଅଂଶକୁ ସେ କେନ୍ଦ୍ର ଶାସିତ ଅଞ୍ଚଳ କରିବାକୁ ସଂଗଠନ ଶାଣିତ କରାଯିବ ବୋଲି ସେ କହିଛନ୍ତି।