ପାଟଣାଗଡ଼, (ବାଘୁଆବାର୍ତ୍ତା): ୧୫ ଜଣ ଦାଦନ ଶ୍ରମିକ ଉଦ୍ଧାର। ବେଳପଡା ପୋଲିସ ପେଟ୍ରୋଲିଙ୍ଗ କରୁଥିବା ସମୟରେ ବନମାଲ ଛକରେ ଏକ ବଲୋରୋ ଗାଡି ଉପରେ ସନ୍ଦେହ ହେବାରୁ ଅଟକାଇଥିଲା। ସେହି ଗାଡିରୁ ୧୫ଜଣ ଦାଦନ ଶ୍ରମିକ ଅନ୍ୟ ରାଜ୍ୟକୁ କାମ କରିବାକୁ ଯାଉଥିଲେ। ଗାଡ଼ିକୁ ଅଟକାଇ ପୋଲିସ ସେମାନଙ୍କୁ ପଚରାଉଚରା କରିବା ପରେ ସମସ୍ତଙ୍କୁ ଥାନାକୁ ଆଣି ଅଧିକ ପଚରାଉଚରା କରିଥିଲା। ସେମାନେ ଆନ୍ଧ୍ରପ୍ରଦେଶର ଏକ ଇଟା ଭାଟିକୁ ଯାଉଥିଲେ ବୋଲି କହିଥିଲେ । ଏହି ସମୟରେ ଶ୍ରମିକମାନଙ୍କୁ ନେଉଥିବା ନିଲାଞ୍ଚଲ ବଛାର ନାମକ ଏକ ସର୍ଦାର ସହ ଗାଡିର ଚାଳକ ଦେବରାଜ ଠେଲାକୁ ପୋଲିସ ଗିରଫ କରିବା ସହ ବଲୋରୋ ଗାଡିକୁ ଜବତ କରିଥିଲା। ଏହାପରେ ଶ୍ରମିକମାନଙ୍କୁ ନିଜ ନିଜ ଘରକୁ ପଠାଇ ଦିଆଯାଇଛି ବୋଲି ଥାନା ଅଧିକାରୀ ବୁଲୁ ମୁଣ୍ଡା ପ୍ରକାଶ କରିଛନ୍ତି। ଉକ୍ତ ଦାଦନ ଶ୍ରମିକମାନେ ହେଲେ ତୁରେକେଲା ଥାନା ଅଞ୍ଚଳର । ବର୍ତ୍ତମାନ ଏହି ଅଞ୍ଚଳରେ ଦାଦନଚାଲାଣ ଋତୁ ଆରମ୍ଭ ହେଉଥିବା ବେଳେ ଏହାକୁ ରୋକିବା ପାଇଁ ପ୍ରଶାସନ କଡାକଡି କରିବା ପାଇଁ ଅଞ୍ଚଳରେ ଦାବି ହେଉଛି।
