ମହିଳାଙ୍କ ଠାରୁ ୫ଲକ୍ଷ ଟଙ୍କା ଥିବା ବ୍ୟାଗକୁ ଝାମ୍ପି ନେଇ ଚମ୍ପଟ ମାରିଲେ ଦୁଇ ଦୁର୍ବୃତ୍ତ

ବୋରିଗୁମ୍ମା, (ବାଘୁଆବାର୍ତ୍ତା): କୋଟପାଡ ସହରରେ ସକ୍ରିୟ ଲୁଟେରା। ଦିନ ଦ୍ୱିପ୍ରହରେ ମହିଳାଙ୍କ ଠାରୁ ୫ଲକ୍ଷ ଟଙ୍କା ଥିବା ବ୍ୟାଗକୁ ଝାମ୍ପି ନେଇ ଚମ୍ପଟ ମାରିଲେ ଦୁଇ ଦୁର୍ବୃତ୍ତ। ମହିଳା ଜଣକ ଟଙ୍କା ବ୍ୟାଗକୁ ରକ୍ଷା କରିବାକୁ ବହୁତ ଚେଷ୍ଟା କରି ରାସ୍ତାରେ ପଡି ଯାଇଥିଲେ ।ରାସ୍ତାରେ ପଡିଯିବାରୁ ଟଙ୍କା ବ୍ୟାଗ ଟି ଛାଡି ଦେଇଥିଲେ ମହିଳା। ମହିଳାଙ୍କ ମୁଣ୍ଡରେ ଆଘାତ ହୋଇଥିବା ବେଳ ତାଙ୍କୁ କୋଟପାଡ ମେଡିକାଲ ରେ ଭର୍ତି କରାଯାଇଛି।ମହିଳା ଜଣକ ହେଲେ କୋଟପାଡ଼ କରଣ ସାହିର ବାସନ୍ତି ପ୍ରଧାନ। ଆଜି ଜୟ ଜଗନ୍ନାଥ ଏସଏଚଜି ଗ୍ରୁପର ଋଣ ଆକାରରେ କୋଟପାଡ଼ ଏସବିଆଇ ଶାଖାରୁ ୫ଲକ୍ଷ ଟଙ୍କା ଉଠାଇ ବ୍ୟାଗରେ ଧରି ଫେରୁଥିଲେ। ଏତିକି ବେଳେ ଲୁଟେରାମାନେ ଏକ ବାଇକରେ ପିଛା କରିଥିଲେ। ସୁନ ସାନ ବାମୁଣ ସାହିରେ ମହିଳାଙ୍କ ଠାରୁ ଟଙ୍କା ବ୍ୟାଗକୁ ଝାମ୍ପି ନେଇ ଚାଲି ଗଲେ ଦୁର୍ବୃତ୍ତ। ଦୁର୍ବୃତ୍ତମାନେ କୋଟପାଡ଼ ସହରରୁ ୫ଲକ୍ଷ ଟଙ୍କା ଲୁଟ କରି ବୋରିଗୁମ୍ମା ପଟେ ବାଇକରେ ଦ୍ରୁତ ଗତିରେ ଆସୁଥିଲେ। ଖବର ପାଇ କୋଟପାଡ଼ ପୋଲିସ ଉକ୍ତ ଲୁଟେରାଙ୍କୁ ଧରିବା ପାଇଁ ସେମାନଙ୍କ ଗାଡ଼ିକୁ ୬୩ ନମ୍ବର ଜାତୀୟ ରାଜପଥରେ ୧୫ ରୁ ୨୦ କିମି ପର୍ୟ୍ୟନ୍ତ ପିଛା କରିଥିଲେ।ପଛପଟେ ପୋଲିସ ଗାଡିକୁ ଦେଖି ନୂଆଗାଁ ଠାରୁ ଏକ ସରୁ କେନାଲ ରାସ୍ତାରେ ଯାଇଥିଲେ। ପୋଲିସ ଉକ୍ତ ଦୁର୍ବୃତ୍ତଙ୍କୁ ଧରିବା କୁ ଯିବା ବେଳେ ପୋଲିସ ଗାଡିଟି ରାସ୍ତାରେ ଓଲଟି ପଡିଥିଲା । ଗାଡି ଓଲଟିବା କାରଣରୁ କୋଟପାଡ଼ ଥାନା ଅଧିକାରୀ ଶେଷ ଦେବ ବେହେରା ଗୁରୁତର ହୋଇଥିବା ଜଣାପଡିଛି। ତାଙ୍କୁ ପ୍ରଥମେ ବୋରିଗୁମ୍ମା ମେଡିକାଲରେ ଭର୍ତ୍ତି କରାଯାଇଥିବା ବେଳେ ତାଙ୍କର ଅଣ୍ଟା ରେ ଆଘାତ କାରଣରୁ ତାଙ୍କୁ ଜୟପୁର ଜିଲା ମେଡିକାଲକୁ ସ୍ଥାନାନ୍ତର କରାଯାଇଛି।ଘଟଣା ସ୍ଥଳରେ ପୋଲିସ ଗାଡି ପଡି ରହିଛି। ଦୁର୍ବୃତ୍ତ ମାନେ ଟଙ୍କା ଲୁଟ କରିବା ସମୟର ସମସ୍ତ ଦୃଶ୍ୟ ସିସି ଫୁଟେଜ ରେ କଏଦ ହୋଇଥିବା ଜଣାପଡିଛି। ସେପଟେ କୋଟପାଡ ଓ ବୋରିଗୁମ୍ମା ପୋଲିସ ୬୩ ନମ୍ବର ଜାତୀୟ ରାଜପଥ ର ଅନେକ ଛକ ରେ ନାକ ବନ୍ଦୀ କରି ଯାଞ୍ଚ କରା ଯାଉଥିବା ବୋରିଗୁମ୍ମା ଏସଡିପିଓ ହରେକୃଷ୍ଣ ମାଝୀ କହିଛନ୍ତି।