ନୟାଗଡ଼, (ବାଘୁଆବାର୍ତ୍ତା): ନୟାଗଡ଼ ଜିଲ୍ଲା ବରିଷ୍ଠ ନାଗରିକ ମଞ୍ଚର ସାଧାରଣ ଅଧିବେଶନ ଅନୁଷ୍ଠିତ ହୋଇଯାଇଛି । ଭର୍ଚୁଆଲ ମାଧ୍ୟମରେ ହୋଇଥିବା ଏହି ଅଧିବେଶନରେ ନିଜ ନିଜ ଘରେ ରହି ନୟାଗଡ଼ ସହରର ଶତାଧିକ ବରିଷ୍ଠ ନାଗରିକ, ପରସ୍ପରକୁ ଦେଖି, ଶୁଣି ପାରିଥିବାରୁ ଖୁସି ବ୍ୟକ୍ତ କରିଥିଲେ । ସଂଘର ସଭାପତି ଶ୍ରୀ କୁବେର ସାହୁ ସଭାରେ ସଭାପତିତ୍ୱ କରିଥିବା ବେଳେ ମୂଖ୍ୟ ଅତିଥି ଭାବେ ମନ୍ତ୍ରୀ ଡକ୍ଟର ଅରୁଣ କୁମାର ସାହୁ ଯୋଗ ଦେଇଥିଲେ । ମୂଖ୍ୟ ଅତିଥି ତାଙ୍କ ବକ୍ତବ୍ୟରେ ବରିଷ୍ଠ ନାଗରିକ ମାନଙ୍କୁ ସମାଜର ଅମୂଲ୍ୟ ମାନବ ସମ୍ବଳ ଭାବେ ବିବେଚନା କରିବା ଉଚିତ ବୋଲି କହିଥିଲେ, “ସେମାନଙ୍କର ଆଶୀର୍ବାଦର ଚମତ୍କାରୀ ପ୍ରଭାବ କେବଳ ଅନୁଭବ କରିହୁଏ କହି ହୁଏ ନାହିଁ”, ଏକାଠି ବସିବା, ଦୁଃଖ ସୁଖ ବାଣ୍ଟିବା ବହୁତ ବଡ଼ କଥା ହୋଇଥାଏ କହିବା ସହିତ ସମସ୍ତଙ୍କର ସୁସ୍ଥତା ଦୀର୍ଘ ଜୀବନ କାମନା କରିଥିଲେ । ଗତ କରୋନା କାଳରେ ଆମ ମାନଙ୍କ ଠାରୁ ବିଦାୟ ନେଇଥିବା ସମସ୍ତ ଗୁରୁଜନ ମାନଙ୍କ ପାଇଁ ଅମର ଆତ୍ମାଙ୍କର ଶାନ୍ତି କାମନା କରିବା ସହ, ବରିଷ୍ଠ ନାଗରିକ ମଞ୍ଚର ମହିଳା ଶାଖାଟିଏ ମଧ୍ୟ ଖୋଲିବା ଆବଶ୍ୟକ ବୋଲି ମତ ରଖିଥିଲେ । ଉକ୍ତ ବୈଠକରେ ବରିଷ୍ଠ ରୋଟାରିଆନ ପ୍ରମୋଦ ପଟ୍ଟନାୟକ, ଗୋଦାବରୀ ସାହୁ, ବେଣୁଧର ସାହୁ, ନିରଞ୍ଜନ ନାୟକ, ଗୋପାଳ ଚନ୍ଦ୍ର ନାୟକ ନିଜର ମତ ରଖିଥିଲେ । ଅବସରପ୍ରାପ୍ତ ପ୍ରଧାନ ଶିକ୍ଷକ ତଥା ସଂଗଠକ, ସମାଜସେବୀ ଶ୍ରୀଯୁକ୍ତ ହରିହର ମିଶ୍ର, ମନ୍ତ୍ରୀ ମହୋଦୟଙ୍କୁ ଆଶୀର୍ବାଦ ଦେବା ସହିତ, ନୟାଗଡ଼ର ବିକାଶରେ ଯାହାକିଛି ଭୂମିକା ନିର୍ବାହ କରିବାକୁ ହେବ, ସେମାନେ କରିବେ ବୋଲି ଦୃଢ଼ ପ୍ରତିଶୃତି ଦେଇଥିଲେ । ଦୁଇଘଣ୍ଟା ଅବଧିର ଏ ଆଲୋଚନା ସଭାରେ ବର୍ଷୀୟାନ ସମାଜସେବୀ ଶ୍ରୀଯୁକ୍ତ ସୁରେନ୍ଦ୍ର ନାଥ ମହାପାତ୍ର ଧନ୍ୟବାଦ ଅର୍ପଣ କରିଥିଲେ ।
