ଉଦଳା (ବାଘୁଆବାର୍ତ୍ତା): ନିଶା ନିବାରଣ କେନ୍ଦ୍ର ବିରୋଧରେ ସାଂଘାତିକ ଅଭିଯୋଗ । ପରିବାରର ଚାପରେ ଜଣେ ଯୁବକଙ୍କୁ ନିଶା ନିବାରଣ କେନ୍ଦ୍ରକୁ ଆଣି ସେଠାରେ ତାଙ୍କୁ ଦିଆଯାଇଛି ଅକଥନୀୟ ନିର୍ୟାତନା । ଏହାକୁ ନେଇ ଯୁବକ ଜଣକ ଅଭିଯୋଗ କରିଛନ୍ତି । ରାଜବରହମପୁର ଥାନା ଟାଙ୍ଗଣା ଗ୍ରାମର ଯୁବକ ସୁମନ ରାଏ ଜଣେ ଯୁବତୀଙ୍କୁ ପ୍ରେମ ବିବାହ କରିଥିଲେ । ପ୍ରେମ ବିବାହ ପରେ ଘର ଲୋକେ ବିରୋଧ କରିବା ସହିତ ଉଦ୍ଦେଶ୍ୟମୂଳକ ଭାବେ ତାଙ୍କୁ ଉଦଳା ଥାନା ଅଧିନରେ ଥିବା ଆଶା ନିଶା ନିବାରଣ କେନ୍ଦ୍ରକୁ ପଠାଇଥିଲେ । ଯୁବକଙ୍କୁ ବିଚ୍ ରାସ୍ତାରୁ ଏକ କାରରେ ଜବରଦସ୍ତି ନିଶା ନିବାରଣ କେନ୍ଦ୍ରର କର୍ମଚାରୀ ଏବଂ ମାଲିକ ସୁମନଙ୍କୁ ମାରପିଟ କରି ଗାଡିରେ ଭର୍ତ୍ତି କରି ନିଶା ନିବାରଣ କେନ୍ଦ୍ରରେ ଆଣି ରଖିଥିଲେ । ସେଠାରେ ତାଙ୍କୁ ଖାଇବାକୁ ନ ଦେବା ସହିତ ତାଙ୍କ ହାତଗୋଡ ବାନ୍ଧି ଦେଇ ଏକ ଘର ଭିତରେ ଭର୍ତ୍ତି କରି ଦେଇଥିଲେ । ଏପରିକି ସେ ବିବାହ କରିଥିବା ଯୁବତୀଙ୍କୁ ଛାଡିଲେ ଯାଇ ତାଙ୍କୁ ନିଶା ନିବାରଣ କେନ୍ଦ୍ରରୁ ମୁକ୍ତି କରାଯିବ ବୋଲି ଧମକ ମଧ୍ୟ ଦେଇଥିଲେ । ଏପରିକି ନିର୍ୟ୍ୟାତନା ସହି ନପାରି ସୁମନ ଫିନାଇଲ ପିଇ ଗୁରୁତର ହୋଇଥିବା ବେଳେ ନିଶା ନିବାରଣ କେନ୍ଦ୍ର କର୍ତ୍ତୃପକ୍ଷ ତାଙ୍କୁ ଚିକିତ୍ସା କରାଇବା ପରିବର୍ତ୍ତେ ପୁଣି ଫିନାଇଲ ଆଣି ପିଇବାକୁ କହିଥିଲେ । ଏପରିକି ନିଶା ନିବାରଣ କେନ୍ଦ୍ରରେ ତାଙ୍କର ମୃତ୍ୟୁ ହେଲେ ସୁଦ୍ଧା କେହି ତାଙ୍କର କିଛି କରିପାରିବେ ନାହିଁ ବୋଲି ନିଶା ନିବାରଣ କେନ୍ଦ୍ର କର୍ତ୍ତୃପକ୍ଷ କହିଥିଲେ । ସୁମନଙ୍କ ସାଙ୍ଗ କିଛି ଦିନ ପରେ ସୁମନଙ୍କୁ ନିଶା ନିବାରଣ କେନ୍ଦ୍ରରୁ ମୁକୁଳାଇବା ପରେ ତାଙ୍କ ପ୍ରତି କେନ୍ଦ୍ରରେ ହୋଇଥିବା ଅକଥନୀୟ ଅତ୍ୟାଚାରକୁ ନେଇ ସେ ଉଦଳା ଥାନାରେ ଲିଖିତ ଅଭିଯୋଗ କରିଛନ୍ତି । ନିଶା ନିବାରଣ କେନ୍ଦ୍ରରେ ସୁମନଙ୍କୁ ହାତଗୋଡ ବାନ୍ଧି ପକାଇ ରଖିବା ସହିତ ନିସ୍ତୁକ ମାଡ ମଧ୍ୟ ମରାଯାଇଥିବା ଅଭିଯୋଗ କରିଛନ୍ତି ସୁମନ । ଘଟଣା ବାବଦରେ ନିଶା ନିବାରଣ କେନ୍ଦ୍ର ଅଧିକାରୀ ବିଭିନ୍ନ ବାହାନା ଦେଖାଇ କୌଣସି ପ୍ରତିକ୍ରିୟା ଦେଇନାହାନ୍ତି । ଏହାକୁ ନେଇ ଉକ୍ତ ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି ।
ପ୍ରେମ ବିବାହ ହେଲା କାଳ, ନିଶା ନିବାରଣ କେନ୍ଦ୍ର ବିରୁଦ୍ଧରେ ଅଭିଯୋଗ, ଥାନାରେ ମାମଲା
